Read Chambeali यूहन्ना 4 Bible Online

यूहन्ना 4 - Chambeali bible

यूहन्ना 4

¹फिरी जां प्रभु जी जो पता लग्गेया कि फरीसियां ने सुणे रा है कि यीशु यूहन्ना का भी जादा चेल्‍ले बणांदा ते तिन्हा जो बपतिस्मा दिन्दा

²हालांकि यीशु अप्पु नी पर तिसेरे चेल्‍ले बपतिस्मा दिंदे थिये।

³तां से अपणे चेल्‍लेयां कने यहूदियां प्रदेश जो छडी करी फिरी गलील प्रदेश जो चली पये।

⁴कने तिन्हा जो सामरिया प्रदेश का होई करी जाणा जरुरी थिया।

⁵इस तांइ से सुखार नां रे सामरिया प्रदेश रे इक्क ग्रां तिकर आया, जे तिस जमीन रे नेड़े है जिस जो याकूब ने अपणे निक्के यूसुफ जो दिता थिया,

⁶ते इस्राएली लोक्कां रे पुरखे, याकूब रा खोद्दे रा कुआँ भी तित्ते थिया, ते यीशु रस्ते रा थकी करी तिस कुएं पर इय्यां ही बेई गेया। ए तकरिबन बारा बजे रे लगभग थिया।

⁷इतणे बिच इक्क सामरिया प्रदेश री जनानी पाणी भरणे आई यीशु ने तिसजो बोल्लेया, मेरे जो पाणी पिया

⁸किजोकी तिसेरे चेल्‍ले तां ग्रां बिच रोट्टी खरीदणे गेरे थिये।

⁹तिस सामरिया प्रदेश री जनानी ने तिसजो बोल्लेया, तू यहूदी होई करी मेरे जदेई सामरी [8]जनानी का पाणी किजो मगंदा?

¹⁰यीशु ने जवाब दित्ता, जे तू परमेश्वर रे वरदान जो जाणदी जे से तिज्जो दैणा चाह्‍ंदे, कने ए भी नी जाणदी कि से कुण है जे तिज्जो बोलदा, मेरे जो पाणी पिया, तां तू तिसका मंगदी कने से तिज्जो जिन्दगी रा पाणी दिंदा।

¹¹जनानी ने तिसजो बोल्लेया, ओ प्रभु तेरे का तां पाणी भरणे तांइ किच्‍छ है भी नी कने कुआँ डुग्गा है, तां सेह़ जिन्दगी रा पाणी तेरे का कुत्ते का आया?

¹²कै तू असा रे बाबे याकूब का बड्डा है जिस ने असा जो ए कुआँ दित्ते रा है, कने अप्पु ही अपणे पुत्तर कने अपणे डंगरा समेत इस बिच का पीन्दा

¹³यीशु ने जवाब दिता जे कोई ए पाणी पिंगा तिन्नी फिरी प्यासा होणा

¹⁴पर जे कोई तिस पाणी बिच का पिन्गा, जे मैं तिसजो दैणा, तिसजो फिरी कदी भी प्यास नी लगणी पर जे पाणी मैं तिसजो दैणा, तिसेरा उस मणू अन्दर इक्क सोता बणी जाणा जे हमेसा तिकर रैह्णा।

¹⁵जनानी ने तिसजो बोल्लेया, ओ प्रभु ए पाणी मेरे जो दे तां कि मैं प्यासी न होवा कने पाणी भरणे जो इनी दुर न आए

¹⁶यीशु ने तिसजो बोल्लेया, जा अपणे लाड़े जो इत्ते सद्दी लेई आ

¹⁷जनानी ने जवाब दिता, मैं ते बिना लाड़े रे है यीशु ने तिसजो बोल्लेया, तू ठीक बोलदी है कि मैं बिना लाड़े रे ए

¹⁸किजोकी तू पांज्ज लाड़े करी चुकी री है कने अब्बे जिस मर्द कने है से भी तेरा लाड़ा नी है ए तू सच ही बोल्लेया

¹⁹जनानी ने तिन्हा जो बोल्लेया, ओ प्रभु जी, मेरे जो लगदा कि तुसा भविष्यद्वक्ता हिन

²⁰असा रे पुरखे ने इसी पहाड़ पर अराधना कित्ती, ते यहूदी मणू बोलदे की जित्ते अराधना करणी चाएदी से जगाह् यरुशलेम सहर बिच है।

²¹यीशु ने तिसजो बोल्लेया, ओ जनानी मेरी गल्ल रा विश्वास कर कि से बेल्ला आंदा है कि न तां तुसा इस पहाड पर बाबे री भक्ति करणी ना ही यरुशलेम बिच

²²तुसा सामरी कस्बे रे मणू जिस जो नी जाणदे, तिसेरी अराधना करदे, ते असी यहूदी मणू जिस जो जाणदे तिसेरी अराधना करदे, किजोकी छुटकारा यहूदियां बिच का है।

²³पर से बेल्ला आणे वाला है हालांकि अब्बे भी है जिस बिच सच्चे भक्त बाबे री भक्ति आत्‍मा कने सच्चाई कने करणी किजोकी बाबा अपणे तांइ इदेए भक्तां जो तोपदा

²⁴परमेश्वर आत्‍मा है इधेरे तांइ जरुरी है कि तिसेरी अराधना करणे वाला आत्‍मा ते सच्चाई कने अराधना करे।

²⁵जनानी ने तिसजो बोल्लेया, मैं जाणदी कि मसीह जे ख्रिस्त है, आणे वाला है, जिस बेल्ले तिसने आणा तां सारी गल्लां असा जो दसणियां।

²⁶यीशु ने तिसजो बोल्लेया मैं जे किच्‍छ तेरे कने बोल्लेया करदा है, मैं से ही ए।

²⁷इतणे बिच ही तिसेरे चेल्‍ले आई गे कने हैरान होई गे कि से जनानी कने गल्ल करे करदा फिरी भी कुसी ने नी पुछया, कि तू कै चाहन्दा है या कुस तांइ तिसेरे कने गल्लां करे करदा?

²⁸तां जनानी घड़ा छडी करी ग्रां बिच चली गई ते मणूआं जो बोलणा लग्गी

²⁹आओ कने इस मणू जो दिखो जिस ने सारा किच्‍छ जे मैं अपणी जिन्दगी बिच कित्ते रा थिया मेरे जो दस्सी दित्ता, कुत्ते ए ही तां मसीह नी है?

³⁰इधेरे तांइ से सहर का निकली करी यीशु का आणा लगे।

³¹इसेरे बिच यीशु रे चेल्‍लेयां ने छन्दे करी के बोल्लेया कि ओ गुरु कुछ खाई लियो

³²पर तिसने तिन्हा जो बोल्लेया मेरे का खाणे वास्ते इदेइ रोट्टी है जिसेरे बारे बिच तुसा नी जाणदे

³³तां चेल्‍लेयां ने आपस बिच बोल्लेया, कै कोई तिसेरे तिकर किच्‍छ खाणे जो लाए रा है।

³⁴यीशु ने तिन्हा जो बोल्लेया, मेरी रोट्टी से है कि परमेश्वर जिन्हा ने मेरे जो भेज्जे रा है, तिन्हेरी मर्जी रे हिसाब कने चलां ते तिसेरा कम्म पूरा करां।

³⁵कै तुसा इय्यां नी बोलदे, फसलां कटणे जो हल्ले तांइ भी चार महिन्ने बचे रे हिन? मैं तुसा जो बोलदा, अपणी हाख्खियां चुक्की करी इन्हा लोक्कां जो दिख्खो, ए तिस पके री फसल सांई हिन जे कटीणे तांइ तैयार है।

³⁶फसल कटणे वाले जो बदिया मजूरी मिलदी, ते बाड्डी वाली फसल से मणू हिन जिन्हा जो से हमेसा री जिन्दगी बिच पूजांदे। बीह् बाणे वाले ते फसल कटणे वाले दोन्नां जो बड़ा वरी आनंद मिलणा!

³⁷किजोकी इत्ते ए कहावत ठीक बैन्दी है कि बाणे वाला होर है ते कटणे वाला होर

³⁸मैं तुसा जो से खेतर कटणे तांइ भेज्जेया जिस बिच तुसा कोई मैहनत नी कित्ती। दूज्जेयां ने मैहनत कित्ती कने तुसा तिसेरी मैहनत रे फल्ल रे हिस्सेदार होए।

³⁹उस कस्बे बिच बड़े-वरी सामरिया प्रदेश रे लोक्कां ने तिस जनानी रे बोलणे पर यीशु पर विश्वास कित्ता किजोकी तिसने सारेयां जो ए बोल्लेया थिया कि तिसने सब किच्‍छ जे मैं अपणी जिन्दगी बिच कित्ते रा थिया से मेरे जो दस्सी दिता।

⁴⁰जिस बेल्ले सामरिया प्रदेश रे मणू तिसेरे नेड़े आए तां तिसरे छन्दे करणे लगे कि असा रे का इत्ते रे ते से तित्ते दो दिन तक रुकेया

⁴¹तिन्हा रे बसेख री वजह कने होर भी कई मणूआं ने तिस पर विश्वास कित्ता।

⁴²अते तिस जनानी जो बोल्लेया, अवे असी तेरे बोलणे कने विश्वास नी करदे किजोकी असी अप्पु ही सुणी लिता कने जाणदे हिन कि ऐई सच्चो ही दुनिया छुटकारा दैणे वाले है।

⁴³फिरी तिन्हा दो दिना रे बाद से तित्ते का निकली करी गलील प्रदेश जो चली गे।

⁴⁴किजोकी यीशु ने अप्पु ही गवाई दित्ती कि भविष्यद्वक्ता अपणे देस अन्दर आदर-खातर हासल नी करी सकदा

⁴⁵जां से गलील प्रदेश बिच आया तां गलील प्रदेशी तिस कने बड़ी-वरी खुसी कने मिल्ले किजोकी जिन्ने कम्म तिसने यरुशलेम बिच त्योहर रे बेल्ले कित्ते थिये तिन्हा ने उन्हा सारया कमा जो दिखया थिया, किजोकी से सारे भी त्योहर बिच गेरे थिये।

⁴⁶तां से फिरी गलील प्रदेश रे काना कस्बे बिच आए जित्ते तिन्हा ने पाणी जो अंगूर रा रस्स बणाया थिया, तित्ते राज्जे रा इक्क नौक्कर थिया जिसेरा मुंडा कफरनहूम कस्बे बिच बिमार थिया।

⁴⁷से ए सुणी करी कि यीशु यहूदियां का गलील प्रदेश बिच आई गेरे हिन, तिसेरे का गेया कने तिसेरे छन्दे करणा लग्गेया चली करी मेरे निक्के जो ठीक कर किजोकी से मरणे वाला थिया।

⁴⁸यीशु ने तिसजो बोल्लेया, जिस बेल्ले तक तुसा चमत्कार नी दिख्खी लैणे तिस बेल्ला तक तुसा कदी विश्वास नी करणा कि मैं मसीह है।

⁴⁹राज्जे रे नौक्कर ने तिसजो बोल्लेया, ओ प्रभु मेरे निक्के री मौत होणे का पहले तित्ते चल

⁵⁰यीशु ने तिसजो बोल्लेया, जा तेरा निक्का जिन्दा है तिस मणू ने यीशु री बोल्ली री गल्ल रा विश्वास कित्ता कने चली गेया

⁵¹से हल्ले रस्ते बिच ही थिया कि तिसेरे नौक्कर ने तिसका आई करी बोल्लेया कि तेरा निक्का जिन्दा है।

⁵²यीशु ने तिसका पूच्छेया, से कुस बेल्ले से ठीक होणा लग्गेया थिया? तिन्हा ने तिसजो बोल्लेया, कल धियाड़ी इक्क बजे[9] रे करीब बिच तिसेरा बुखार उतरी गेया।

⁵³तां तिस बेल्ले तिसेरे प्यो जो पता लग्गी गेया कि ए तिसी बेल्ले होया, जां यीशु ने तिसजो बोल्लेया कि तेरे निक्के ने नी मरणा। तिस मणू ते तिसेरे पूरे परिवार ने यीशु पर विश्वास कित्ता।

⁵⁴ए दूज्जी निशानी थी जे यीशु ने यहूदियां प्रदेश का गलील प्रदेश जो हटी आणे का बाद कित्ता थिया।