Read Chambeali यूहन्ना 5 Bible Online

यूहन्ना 5 - Chambeali bible

यूहन्ना 5

¹इन्हा गल्लां रे बाद यहूदियां रा इक्क त्योहर होया, ते यीशु यरुशलेम सहर बिच गे।

²यरुशलेम सहर अन्दर भेड्डू-फाटक रे नेड़े इक्क पाणी रा तला है, जिस जो इब्रानी भाषा अन्दर बैतहसदा बोल्दे इसेरे कनारे पर पंज्ज बरांड़े बणे रे हिन।

³इस बिच मते सारे बिमार, अन्ने, लट्टे, सूक्के अंगा वाले पेई रैह्‍ंदे थिये,

⁴किजोकी ठैहराये रे समय पर परमेश्वर रे स्वर्गदूत कुण्ड बिच उतरी करी पाणी जो हिलाया करदे थिये। पाणी हिलदे ही जे पैल्ले कुण्ड बिच उतरी जादां थिया तिसेरी कोई भी बीमारी ठीक होई जादीं थी।

⁵तित्ते इक्क मणू थिया जे अठ्ठती साला रा बीमारी अन्दर पेरा थिया

⁶यीशु ने तिसजो पे रा दिख्खी करी ए समजी गे कि से बड़े दिना रा इस्सी हालत बिच पेरा है तिसने पुछया, “क्‍या तू ठीक होणा चाह्‍ंदा?”

⁷तिस बिमार मणू ने तिसजो जवाब दित्ता, “ओ प्रभु, मेरी मदद करणे वाला कोई भी नी है कि जां से पाणी हिलाया जाए तां मेरे जो तिस तलां बिच उतारे, पर मेरे पुजदे-पुजदे कोई दुज्जा मेरे का पैल्ले उत्तरी जांदा।”

⁸यीशु ने तिसजो बोल्लेया, “उठ अपणा मन्जा चुक्क, ते चल फिर!”

⁹तिस यहूदी मणू रा अधरंग तिस्सी बेल्ले ठीक होई गेया ते से उठी करी चलणा-फिरणा लग्गी पेया, पर ए सब किच्‍छ विश्राम दिन पर होया थिया,

¹⁰यहूदी अगुवे तिस मणू जो टोकणा लग्गी पये, “विश्राम दिन पर इय्यां अपणी पन्द लेई करी मूसा रे नियम रे हिसाब कने चलणा-फिरणा मना है।”

¹¹तिसने तिन्हा जो जवाब दिता, “जिन्नी मेरे जो ठीक कित्ता तिसी ने मेरे जो बोल्लेया कि अपणा मंजा चुक ते चल फिर।”

¹²तिन्हा ने तिसका पुछया, “से कुण मणू है जिनिये तिज्जो बोल्लेया, मंजा चुक कने चल फिर?”

¹³पर जे ठीक होए रा थिया से नी जाणदा थिया कि से कुण है, किजोकी यीशु तित्ते का इक्क भीड़ बिच तिन्हेरी नजरां का ओझल होई गे थिये।

¹⁴इन्हा गल्लां रे बाद से मणू यीशु जो मन्दिर रे अंगण बिच मिल्लेया, यीशु ने तिसजों बोल्लेया, दिख्ख, तू ठीक होई गे रा है: फिरी पाप मत करदा, इय्यां न हो कि इसेरे का भी कोई बड्डी मुसीबत तेरे पर आई पे।

¹⁵तिस मणू ने जाई करी यहूदियां अधिकारियां जो बोल्ली दित्ता कि जिनिये मेरे जो ठीक कित्ता से यीशु है।

¹⁶इसेरी वजह कने यहूदी यीशु जो सताणा लगे किजोकी से इदेय कम्म विश्राम दिन पर करदा थिया।

¹⁷इस पर यीशु ने तिसजो बोल्लेया, मेरे पिता परमेश्वर ने हल्ले कम्म करेया करदे हिन, ते मैं भी कम्म करेया करदा है।

¹⁸इस वजह कने यहूदी होर भी बधी करी तिसजो मारणे री कोसीस करणा लगे किजोकी सेह न सिर्फ विश्राम दिन रे रीति रीवाज जो तोडदा थिया पर परमेश्वर जो अपणा बाबा बोल्ली करी अप्पु जो परमेश्वर रे बराबर करदा थिया।

¹⁹इस पर यीशु ने तिन्हा जो बोल्लेया, मैं तुसा जो सच-सच बोलदा, पुत्तर अपणी मर्जी कने किच्‍छ नी करी सकदा, पर सिर्फ से ही, जे परमेश्वर पिता जो करदे दिखदा, किजोकी जिन्हा-जिन्हा कम्मां जो “पिता” करदा, तिसजो पुत्तर भी तिसी तरिक्के करदा।

²⁰किजोकी परमेश्वर पिता पुत्तर कने प्यार करदा कने जे-जे कम्म से करदा, से सारे तिसजो दिखांदा है कने से इसका का भी बड्डे-बड्डे कम्म तिसजो दिखांगा ताकि तुसा हैरान न हो।

²¹जिय्यां पिता, मरे रे लोक्कां जो जिन्दा करदे, तिय्यां ही पुत्तर भी जिन्हा जो चाह्‍ंदा तिन्हा जो फिरी जिन्दा करदा।

²²परमेश्वर पिता कुसकी रा हिसाब-किताब नी करदा, पर हिसाब-किताब करणे रा सारा कम्म पुत्तर जो सौंपी दित्तेया गे रा है,

²³ताकि सब जणे जिय्यां परमेश्वर पिता री बड़ाई करदे तिय्यां ही पुत्तर री भी बड़ाई करेया करण। जे पुत्तर री बड़ाई नी करदा, से पिता री, जिन्हा ने तिसजो भेज्जे रा है, बड़ाई नी करदा।

²⁴मैं तुसा रे कने सच-सच बोलदा, जे मेरा वचन सुणी करी मेरे भेजणे वाले पर विश्वास करदा हमेसा री जिन्दगी तिसका है, कने तिस पर सजा रा हुकम नी हुन्दा पर से मौत [10]जो टप्पी करी हमेसा री जिन्दगी बिच जाई चुके रा है।

²⁵ते मैं तुसा जो सच-सच बोलदा कि से बेल्ला आया करदा है बल्कि अब्बे ही है कि जां मरे रे लोक्कां ने मेरी यानी परमेश्वर रे पुत्तर री अवाज जो सुनणा अते जिन्ने जणेया ने सुनणा तिन्हा ने हमेसा तिकर जीणा।

²⁶किजोकी जिस तरिक्के बाबा अप्पु अन्दर जिन्दगी रखदा तिसी तरिक्के तिसने पुत्तर जो भी ए हक्क दितेरा है कि अप्पु बिच जिन्दगी रखे

²⁷ते परमेश्वर ने मेरे जो हर इन्सान पर, तिन्हेरा हिसाब-किताब करणे रा भी हक्क दित्ते रा है, किजोकी मैं मणू रा पुत्तर है।

²⁸इस बिच हैरान मत हो, किजोकी से वक्त आया करदा है कि मरे रे लोक्कां ने तिन्हेरी अवाज सुणी करी वापिस जिन्दे होई जाणा ते अपणी कब्रां का बाहर निकली आणा।

²⁹जिन्हा ने भलाई जिन्दगी बिताए री है, तिन्हा जो हमेसा री जिन्दगी पाणे तांइ मरे रे लोक्कां बिच का फिरी जिन्दा कित्तेया जाणा, ते जिन्हा ने पाप री जिन्दगी बिताए री है, तिन्हा जो हमेसा री सजा भूगतणे तांइ जिन्दा कित्ता जाणा।

³⁰मैं अप्पु का किच्‍छ नी करी सकदा, जदेया मेरे जो “पिता” करणे तांइ बोलदे से ही करदा। मैं हिसाब-किताब करदा कने मेरा हिसाब-किताब सच्चा है किजोकी मैं अपणी मर्जी नी पर अपणे भेजणे वाले री मर्जी पूरी करणा चाहन्दा।

³¹जे मैं अपणी ही गवाई अप्पु देयां तां मेरी गवाई सच्ची नी ए।

³²पर “पिता” मेरे बारे बिच गवाई दिंदे ते मैं जाणदा जेडी मेरी गवाई दिन्दा से सच्ची है

³³तुसा यूहन्ना का पुछवाणे तांइ अपणे मणू भेज्जे थिये ते तिनिये सच्चाई री गवाई दित्ती।

³⁴पर मैं अपणे बारे बिच मणू री गवाई नी चाहन्दा तां भी ए गल्लां इस तांइ बोलदा कि तुसा जो छुटकारा मिल्ले।

³⁵से तां बलदा कने चमकदा होया दीया है कने तुसा जो थोड़ी देर तक तिसेरी रौसनी बिच मस्त होणा ठीक लग्गेया

³⁶पर मेरे का जेड़ी गवाई है से यूहन्ना री गवाई का बड्डी है, किजोकी जेडा कम्म “पिता” ने मेरे जो पूरा करणे जो दित्ते रा है, से ही कम्म मेरी गवाह है, कि “पिता” ने मेरे जो भेज्जे रा है।

³⁷कने “पिता” जिनिये मेरे जो भेज्जे रा है, तिसी ने मेरी गवाई दित्ती री है तुसा न कदी तिन्हा जो सूणेया ते न तिन्हा जो दिख्खेया।

³⁸ते परमेश्वर रा बसेख तुसा रे मन बिच नी है, किजोकी परमेश्वर ने मेरे जो भेज्जे रा है ते तुसा मेरा विश्वास नी करदे।

³⁹तुसा पवित्रशास्त्र जो पढ़दे किजोकी सोचदे कि तिस बिच तुसा जो हमेसा री जिन्दगी मिलदी ते ए ही है जे मेरी गवाई दिंदा।

⁴⁰फिरी भी तुसा हमेसा री जिन्दगी पाणे तिकर मेरे का आणा नी चाह्‍ंदे।

⁴¹मैं मणूआं का बड़ाई नी चाहन्दा।

⁴²पर मैं जाणदा कि तुसा परमेश्वर जो दिल कने प्यार नी करदे।

⁴³“पिता” ने मेरे जो अधिकार देई करी तुसा का भेज्जे रा है, ते तुसा मेरे जो नी अपणांदे, पर जे अगर होर कोई अपणे ही अधिकार [11]कने आए तां तिसजो अपणाई लिंदे।

⁴⁴तुसा इक्क-दुजे का बड़ाई चाह्‍ंदे, कने से बड़ाई जे इक्क मात्र परमेश्वर रे पासे का है, नी चाहंदे, कुस तरिक्के कने मेरा विश्वास करी सकगे?

⁴⁵इय्यां मत समझो कि मैं बाबे रे सामणे तुसा पर दोष लगांगा, तुसा पर दोष लगाणे वाला तां मूसा है जिस पर तुसा आस लाई करी बैठ्ठे रे हिन।

⁴⁶किजोकी जे अगर तुसा मूसा रा विश्वास करदे तां मेरा भी विश्वास करदे, इस तांइ की तिसने मेरे बारे बिच लिखेरा है

⁴⁷पर जे तुसा मूसा रे कानून बिच लिख्खे री गल्लां पर विश्वास नी करदे तां मेरी गल्लां पर विश्वास किय्यां करी करगें।