Read Chambeali यूहन्ना 6 Bible Online

यूहन्ना 6 - Chambeali bible

यूहन्ना 6

¹इनाह् गल्लां रे बाद यीशु गलील प्रदेश री झीला मतलब की तिबिरियुस री झीला रे पार चली गे

²कने इक्क बड़ी भीड़ तिसरे पीच्छे चली पेई किजोकी जे चमत्कार से बिमारा पर दसदा थिया से तिन्हा जो दिखदे थिये

³तां यीशु पहाड़ा पर चढ़ी करी अपणे चेल्‍लेयां कने उत्ते बेई गे

⁵जिस बेल्ले यीशु ने अपणी हाख्खियां चुकी करी इक्क बड्डी भीड़ जो अपणे पासे आंदे दिख्खेया, तां फिलिप्पुस जो बोल्लेया, असी इन्हा रे खाणे तांइ रोट्टी कुते का रोटी खरीदी करी लेई आण

⁶तिसने ए गल्ल तिसजो परखणे तिकर बोल्ली किजोकी सेह़ अप्पु जाणदा थिया कि तिसने कै करणा

⁷फिलिप्पुस ने तिसजो जवाब दित्ता, कि दो सौ दीनार[12] री रोट्टी भी तिनेरे तांइ पूरी नी होणी कि तिन्हा तिस बिच का हर इक्क जो थोड़ी-थोड़ी भी मिली जाए।

⁸तिसेरे चेल्‍लेयां बिच का शमौन पतरस रा भ्याल अन्द्रियास ने तिसजो बोल्लेया

⁹इत्ते इक्क मुडां है जिस का जौ री पांज्ज रोट्टियां ते दो मच्छियाँ हिन पर इतणे लोक्कां तांइ पूरी नी होणियां।

¹⁰यीशु ने बोल्लेया लोकां जो बिठाई देओ तिस जगाह् बड्डा वरी घा थिया तां मणू जिहना बिच मणू री गिनती तकरिबन पांज्ज हजार थी बेई गे

¹¹तां यीशु ने रोटियां लित्ती ते शुक्रिया करी के बैणे बाले जो बन्ड़ी दित्तीयां ते तिय्यां ही मच्छियाँ जितणी से चाह्‍ंदे थिये बन्डी दितियां।

¹²जां से खाई करी से रजी गे तां तिन्हा ने अपणे चेल्‍लेयां जो बोल्लेया बचे रे रोट्टी रे टोकरे किठ्ठे करी लिओ कि किच्‍छ भी सूटे ना जाण।

¹³ते तिन्हा ने तिसजो कठेरया कने जो री पांज्ज रोट्टी रे टुकड़े जे खाणे वालया का बचे करदे थिये बाहरा टोकरिया भरियां।

¹⁴तां जे चमत्कार तिसने करी दखाया तिसजो दिख्खी करी मणू बोलणा लगे, से भविष्यवाणी करणे वाला जे दुनिया अन्दर आणे वाले थिया, पक्का ऐई है

¹⁵यीशु ए जाणी करी कि सेह़ मेरे जो राजा बणाणे तांइ पकड़ना चाह्‍ंदे हिन फिरी से पहाड पर किल्ला चली गेया।

¹⁶जिस बेल्ले सँझ होई तां तिसेरे चेल्‍ले झील रे किनारे चली गे।

¹⁷कने किस्ती पर चढ़ी करी झील रे पार कफरनहूम कस्बे जो जाणे लगे तिस बेल्ले निहारा होई गे रा थिया कने यीशु तिस बेल्ले तक तिन्हेरे का नी आए रा थिया।

¹⁸तूफान री वजह कने झिलां अन्दर छलारां उठणे लगियां

¹⁹जिस बेल्ले से चप्पु मारदे-मारदे लगभग छे किलोमीटर चली गे, तां तिन्हा ने यीशु जो झील पर चली करी किस्ती रे नेड़े आंदे दिख्खेया ते डरी गे।

²⁰पर तिसने तिन्हा जो बोल्लेया, डरो मत! मैं है!

²¹ते से तिसजो किस्ती पर चढ़ाणे तांइ तैयार होए ते से किस्ती तिस जगाह् पर जाई पूजी गई जित्ते से जाए करदे थिये।

²²अगले दिन तिस भीड़ ने जे झील रे किनारे ही रुकी गे थिये, तिन्हा ने दिख्खेया कि यीशु रे चेल्‍ले इक्को-इक्क किस्ती लेई करी चली गेरे हिन, तां तिन्हा जो समझ आई गेया कि यीशु अपणे चेल्‍लेयां कने नी गेरे हिन।

²³तां बाकि किस्तियां, गलीली समुन्द्र रे किनारे बसे रे इक्क सहर तिबिरियुस बिच तिस जगाह् पर आई, जित्ते तिन्हा ने प्रभु रा शुकर करणे का बाद रोट्टी खाई थी।

²⁴इस तांइ जिस बेल्ले भीड़ ने दिख्खेया कि इत्ते ना यीशु है कने ना तिसेरे चेल्‍ले, तां सेह़ भी किश्तिया पर चढ़ी करी यीशु जो तोपदे कफरनहूम कस्बे का पूज्जे।

²⁵झील रे पार जिस बेल्ले से तिस कने मिल्ले तां बोल्लेया, ओ गुरु, तू इत्ते कुस बेल्ले आया।

²⁶यीशु ने जवाब दिता, मैं तुसा कने सच-सच बोलदा तुसा मेरे जो इधेरे तांइ नी थिये तोपदे किजोकी तुसा ने मेरे का चिन्ह-चमत्कार दिख्खे पर इधेरे तांइ किजोकी तुसा रोट्टियां खाई करी रज्जे थिये।

²⁷मुकी जाणे वाली रोट्टी तांइ परिश्रम न करो, पर तिस रोट्टी तांइ मैहनत करो जे कि हमेसा री जिन्दगी तक रैह्‍ंदी, जिस जो मणू रा पुत्तर, जे मैं ही है, तुसा जो दिंगा, किजोकी पिता परमेश्वर ने ए करणा रा अधिकार भी दित्ते रा है।

²⁸तिन्हा ने तिसजो बोल्लेया, परमेश्वर रा कम्म करणे तांइ असी कै करिये?

²⁹यीशु ने तिन्हा जो जवाब दित्ता परमेश्वर तुसा का ए चाह्‍ंदे कि तुसा मणू तिस पर विश्वास करो जिस जो परमेश्वर ने भेज्जे रा है।

³⁰तां तिन्हा ने तिसजो बोल्लेया, फिरी तू कुण सी निशानी दिखान्दा है कि असी तिसजो दिख्खी करी तुसा पर विश्वास करण? तू कुण देय्या कम्म दसदा?

³¹असा रे पूरखां ने बणा अन्दर मन्ना खाया, जिय्यां कि पवित्रशास्त्र बिच लिख्खे रा है, कि परमेश्वर ने तिन्हा लोक्कां जो खाणे तांइ स्वर्ग का रोट्टी दित्ती।

³²यीशु ने तिन्हा जो बोल्लेया, मैं तुसा जो सच-सच बोलदा कि मूसा ने तुसा जो से रोट्टी स्वर्ग का नी दित्ती, पर मेरा पिता तुसा जो सच्ची रोट्टी स्वर्ग का दिंदा।

³³परमेश्वर री रोट्टी ओ ही है, जेडी स्वर्ग का उत्तरी करी दुनिया रे लोक्कां जो जिन्दगी दिन्दी।

³⁴तां तिन्हा ने बोल्लेया, ओ प्रभु ए रोट्टी असा जो हमेसा देया कर।

³⁵यीशु ने तिन्हा जो बोल्लेया, हमेसा री जिन्दगी री रोट्टी मैं ही है: जे मेरे का आंगा से कदी भी भूखा नी रैह्णा ते जेडा मेरे पर विश्वास करगां से कदी भी प्यासा नी रिगां

³⁶पर जिय्यां मैं तुसा जो बोल्लेया थिया, कि तुसा ने मेरे जो दिख्खी भी लित्या तां भी मेरा विश्वास नी करदे।

³⁷जिस कुसकी जो मेरा “पिता” मेरे जो दिंदा, से मेरे का आंगा, ते जे कोई मेरे का आदां, तिसजो मैं कदी भी नी नक्कारणा।

³⁸किजोकी मैं अपणी मर्जी कने नी, पर अपणे “पिता” री मर्जी पूरी करणे तांइ स्वर्ग का उतरेया।

³⁹पर मेरे “पिता” री इच्छा ए है कि जे किच्‍छ तिन्ही मेरे जो दित्ता है, उस बिच का मैं किच्‍छ न गवाई देयां पर तिसजो आखरी दिन फिरी जिन्दा करणा,

⁴⁰किजोकी मेरे “पिता” री इच्छा ए है कि जे कोई पुत्तर जो दिख्खे, कने तिस पर विश्वास रखे, से हमेसा री जिन्दगी पाये कने मैं तिसजो आखरी दिन फिरी जिन्दा करणा।

⁴¹फिरी यहूदी मणू यीशु पर बुड़बुड़ाणे लग्गे, इस तांइ कि तिन्ही बोल्लेया थिया कि जेडी रोट्टी स्वर्ग का उतरी है, से मैं है

⁴²फिरी तिन्हां ने बोल्लेया कै ए यूसुफ रा मुंडा यीशु नी है, जिस्स रे अम्मा बाबे जो असी जाणदे? तां फिरी ए किजो बोलदा कि मैं स्वर्ग का उतरया है।

⁴³यीशु ने तिन्हा जो जवाब दित्या, कि अप्पु बिच मत बडबडाओ।

⁴⁴कोई मेरे का नी आई सकदा, जा तक “पिता” जिन्हा ने मेरे जो भेज्जे रा है, तिसजो मेरे का ना लेई आए, फिरी मैं तिसजो आखरी दिन फिरी जिन्दा करगां।

⁴⁵कुसकी भविष्यद्वक्ता री कताब बिच ए लिख्खे रा है, कि से सब परमेश्वर रे पासे का सिखाए रे होणे जिन्नी भी बाबे का सूणेया कने सिखया, से मेरे का आन्दा।

⁴⁶इय्यां नी है कि कुसकी ने भी “पिता” जो नी दिख्खेया, पर मैं परमेश्वर जो दिख्खे रा है, जे अप्पु परमेश्वर रे पास्से का आए रा है।

⁴⁷मैं तुसा जो सच-सच बोलदा, कि जे कोई विश्वास करदा, हमेसा री जिन्दगी तिसेरी ही है।

⁴⁸जिन्दगी री रोटी, मैं ही हैं।

⁴⁹तुसा रे पुरखे ने मन्ना खाया ते मरी गे

⁵⁰ए से रोट्टी है जेडी स्वर्ग का उत्तरी है ताकि मणू तिस बिच का खाए ते न मरण

⁵¹हमेसा री जिन्दगी री रोट्टी, जे स्वर्ग का उतरे री है, से मैं है, जे कोई इस रोट्टी जो खान्दा, तिनिये हमेसा तांइ जिन्दा रैह्णा ते जे रोट्टी मैं दुनिया रे लोक्कां जो जिन्दगी तांइ दैणी, से मेरा सरीर है।

⁵²इस पर यहूदी मणू ए बोल्ली करी अप्पु मिते लडने लगे, कि ए मणू किय्यां अपणा सरीर खाणे जो देई सकदा।

⁵³यीशु ने तिन्हा जो बोल्लेया मैं तुसा जो सच-सच बोलदा जां तांइ मणू रे पुत्तर, जे मैं ही है रा सरीर नी खांगे, कने तिसेरा खून नी पींगे, तुसा बिच जिन्दगी नी है।

⁵⁴जे कोई मेरा सरीर खान्दा, कने मेरा खून पीन्दा, हमेसा री जिन्दगी तिसेरी है, कने मैं अन्त रे दिना फिरी तिसजो जिन्दा करणा।

⁵⁵किजोकी मेरा सरीर असलियत बिच खाणे री चीज है ते मेरा खून असलियत बिच पीणे री चीज है,

⁵⁶जे मेरा सरीर खान्दा ते मेरा खून पीन्दा, तिनिये हमेसा तिकर मेरे अन्दर बणी रैह्णा, ते मैं तिस बिच

⁵⁷जिय्यां जिन्दे पिता ने मेरे जो भेज्जेया ते मैं पिता री वजह कने जिन्दा है, तिय्यां ही से भी जे मेरे जो खाणा, तिनिये भी मेरी वजह कने जिन्दा रैह्णा।

⁵⁸जेड़ी रोट्टी स्वर्ग का उतरी, ए ही है, से तिस रोटी सांई नी जिस जो बाब्बे-दाद्दे ने खाया ते मरी गे, जे कोई ए रोट्टी खांगा, से हमेसा जिन्दा रैहन्गा।

⁵⁹ए गल्लां तिन्ही कफरनहूम कस्बे रे इक्क सभास्थल बिच उपदेस दिन्दे बेल्ले बोल्ली।

⁶⁰तिसेरे दूए चेल्‍ले[13] बिच मत्ते जणे ने ए सुणी करी बोल्ले, कि ए गल्ल तां मनणे तांइ मुस्किल है ते इसजो कुण सुणी सकदा?

⁶¹यीशु ने अपणे मन बिच ए जाणी करी कि मेरे चेल्‍ले अप्पु बिच इस गल्ल पर बुड़बुड़ाया करदे हिन, तिन्हा जो पूच्छेया कै इस गल्ल कने तुसा जो ठेस लग्गी?

⁶²पर जे तुसा मणू रे पुत्तर, जे मैं ही है जो जित्ते से पैल्ले थिया, उत्ते का उप्पर जांदे दिखगे, तां कै हुगां?

⁶³आत्‍मा ते जिन्दगी दिंदी, पर सरीर कने किच्‍छ फैदा नी है, जेडी गल्लां मैं तुसा जो बोल्ली, से पवित्रात्मा रे पास्से का है, जे जिन्दगी दिंदा।

⁶⁴पर तुसा बिच किन्ने इदेए मणू हिन जे विश्वास नी करदे: किजोकी यीशु ता पैल्ले का ही जाणदे थिये कि जे विश्वास नी करदे से कुण हिन? ते कुनिये मेरे जो पकडवाणा।

⁶⁵फिरी तिन्हा ने बोल्लेया, इस तांइ मैं तुसा जो बोल्लेया थिया जां तांइ कुसकी जो पिता रे पास्से का वरदान ना मिल्ले, तां तांइ से मेरे का नी आई सकदा।

⁶⁶इसेरे बाद यीशु रे दूए मते चेल्‍ले [14]तिन्हा जो छड्डी करी चली गे, ते तिन्हेरी गल्लां जो मनणा छड्डी दित्तेया।

⁶⁷तां यीशु ने तिन्हा बारा चेल्‍लेयां जो बोल्लेया, कै तुसा भी चली जाणा चाहदें?

⁶⁸शमौन पतरस ने तिसजो जवाब दिता, ओ प्रभु, असी कुसका जाईए? तुसा का हमेसा री जिन्दगी रे वचन हिन।

⁶⁹असा ने तुसा बिच विश्वास कित्या, कने जाणी गे हिन, कि परमेश्वर रा भेज्जे रे पवित्र मसीह तू ही है।

⁷⁰यीशु ने तिन्हा जो जवाब दित्ता, कि मैं तुसा बारा जणेया जो मैं चुणी लित्ते रा है पर तां भी तुसा बिच इक्क जणे जो शैतान ने काबू बिच करी लित्ते रा है।

⁷¹ए यीशु ने शमौन इस्करियोती रे पुत्तर यहूदा रे बारे बोल्लेया, किजोकी ए ओई बारह बिच का इक्क थिया, जे यीशु जो पकड़वाणे पर थिया।