Read Chambeali यूहन्ना 8 Bible Online

यूहन्ना 8 - Chambeali bible

यूहन्ना 8

²कने भ्यागा-भ्यागा यीशु फिरी मन्दिर रे अंगण बिच आए, ते मते सारे मणू तिसका आए, ते से बेई करी तिन्हा जो उपदेस दैणे लग्गे।

³जां से बोल्लेया ही करदे थिये तां शास्त्रि ते फरीसी मणू इक्क जनानी जो लयाये, जे व्यभिचार करदे पकड़ी गे री थी, अते तिसजो लोक्कां सामणे खड़ा करी के यीशु जो बोल्लेया,

⁴ओ गुरु, ए जनानी व्यभिचार करदे पकड़ीत्ती।

⁵मूसा रे कानून बिच मूसा ने असा जो हुकम दित्तेया है कि इदेइ जनानी जो पत्थर कने मारी छडणा चाएदा[15]: तुसा कै बोलदे कि असा जो इस जनानी इस जनानी कने करणा चाएदा?

⁶तिन्हा ने यीशु जो परखणे तांइ ए गल्ल बोल्ली[16] ताकि तिस पर कोई दोष लगाई सकण, पर यीशु झुकी करी उंगली कने जमीन पर किच्‍छ लिखणा लग्गेया।

⁷जां से तिसका पूच्छेया करदे थिये, तां यीशु ने सिधे होई करी तिन्हा जो बोल्लेया, कि तुसा रे बिच का जिनिये कदी पाप ना कित्ते रा हो, से इसजो पैल्ला बट्टा मारे।

⁸कने फिरी झुकी करी दुनिया पर लिखणे लगया

⁹ए जाणदे होए कि से सारे ही पाप्पी हिन, इक्क-इक्क करी के, छोटे का लेई करी बड्डे तिकर सारे तिस जगाह् का चली गे, ते यीशु ते से जनानी तिस जगाह् पर किल्ले रेई गे।

¹⁰यीशु ने सिधे होई करी तिसका पुछया, ओ जनानी से कुत्ते गेई? कै कुसी ने भी तिज्जो सजा नी दित्ती?

¹¹तिस जनानी ने बोल्लेया, ओ प्रभु, कुसकी ने भी नी: यीशु ने बोल्लेया, मैं भी तिज्जो सजा नी दिन्दा। जा, ते फिरी दुबारा पाप मत करदी।

¹²तां यीशु ने तिन्हा मणूआं जो बोल्लेया, दुनिया री रौसनी मैं है, ते जे कोई मेरे मेरी गल्लां मन्नी करी मेरे पीच्छे चलगा, तिनिये पाप रे न्याहरे बिच नी रैह्णा, पर तिसका हमेसा री जिन्दगी री रौसनी होणी।

¹³फरीसियों ने तिसजो बोल्लेया, तू अपणी गवाई अप्पु दिन्दा इधेरे तांइ तेरी गवाई सच्ची नी।

¹⁴यीशु ने तिन्हा जो जवाब दित्या कि जे मैं अपणी गवाई अप्पु दिन्दा हाँ, तां भी मेरी गवाई ठीक हैं, किजोकी मैं जाणदा, कि मैं कुते का आया कने कुते जो जान्दा? पर तुसा नी जाणदे कि मैं कुते का आन्दा कने कुतें जो जान्दा

¹⁵तुसा इन्सानी तौर-तरिक्के रे हिसाब कने मेरा हिसाब-किताब करदे, पर मैं कुसकी रा हिसाब-किताब नी करदा।

¹⁶पर जे मैं हिसाब-किताब करां भी, तां मेरा हिसाब-किताब सच्चा हैं किजोकी मैं किल्ला नी, पर मैं है ते मेरे कने पिता है जिन्हा ने मेरे जों भेज्जे रा है।

¹⁷कने तुसा री मूसा रे कानून बिच भी लिख्खे रा है कि दो जणेया री गवाई सच मन्नी जांदी।

¹⁸इक्क ते मैं अप्पु अपणी गवाई दिन्दां, हाँ, कने दुजा बाबा मेरी गवाई दिन्दा हैं जिन्हा ने मेरे जो भेज्जे रा है।

¹⁹तिन्हा ने तिसजो बोल्लेया, तेरा पिता कुते है? “यीशु ने जवाब दित्ता, ना तुसा मेरे जो जाणदे ते ना पिता जो, जे तुसा मेरे जो जाणदे तां पिता जो भी जाणदे।”

²⁰ए गल्लां तिन्हा ने मन्दिर रे अंगण बिच उपदेस दिन्दे होए भण्डार घर[17] बिच बोल्ली, कने कुसी ने तिसजो नी पकड़ेया किजोकी तिसेरा हल्ले तिन्हेरा पकड़ी करी सताए ते मारे जाणे रा बेल्ला नी आया थिया।

²¹यीशु ने फिरी तिन्हा जो बोल्लेया, मैं जान्दा ते तुसा ने मेरे जो तोपणा, पर तुसा अपणे पाप री माफी पाए बगैर ही मरी जाणा: जित्ते मैं जादां तित्ते तुसा नी आई सकदे।

²²इस पर यहूदी अधिकारियां ने बोल्लेया, कै से अप्पु जो मारी दिंगा, जो से बोलदा कि जित्ते मैं जान्दा उत्ते तुसा नी आई सकदे?

²³यीशु ने तिन्हा लोक्कां जो बोल्लेया, तुसा मणूआं का पैदा होए रे हिन, पर मैं स्वर्ग का आए रा है, ते मैं इस दुनिया रे लोक्कां बिच का नी है।

²⁴इस तांइ मैं तुसा जो बोलदा, कि तुसा अपणे पाप री माफी पाए बगैर ही मरी जाणा किजोकी तुसा विश्वास नी कित्ता कि मैं से ही हैं, अपणे पाप री माफी पाए बगैर ही मरी जाणा।

²⁵यहूदी अधिकारियां ने तिसजो बोल्लेया, तू कुण है? यीशु ने तिन्हा जो बोल्लेया, मैं से ही है जे सुरु का तुसा जो बोलदा आए रा है।

²⁶मेरे का तुसा रे बारे बिच बोलणे ते तुसा पर इल्जाम लाणे तांइ मता किच्‍छ है। पर परमेश्वर, जिन्हा ने मेरे जो इस दुनिया रे लोक्कां का भेज्जे रा है, से सच्चा है, ते जे किच्‍छ मैं तिसका सूणेया, से ही दुनिया रे लोक्कां कने बोलदा।

²⁷से न समजे कि असा जो पिता रे बारे बिच दसदा।

²⁸तां यीशु ने बोल्लेया, कि जां तुसा मणू रे पुत्तर, जो ऊचें पर चढ़ांगे, तां जाणगें कि मैं से ही हैं, ते मैं अपणे आप का किच्‍छ नी करदा, पर पिता मेरे जो जिय्यां सिखान्दा, से ही गल्लां मैं बोलदा।

²⁹कने मेरा भेजणे वाला मेरे कने है तिन्ही मेरे जो कल्ला नी छडेया, किजोकी मैं हमेसा से ही कम्म करदा, जिस का से खुस हुन्दा:

³⁰से हल्ले ए गल्लां बोल्लेया ही करदे थिये कि मते जणेया ने तिन्हा पर विश्वास कित्ता।

³¹तां यीशु ने तिन्हा यहूदी लोक्कां कने ए बोल्लेया जिन्हा ने तिन्हा पर विश्वास कित्तेया थिया, जे तुसा मेरे शिक्षा बिच बणी रैहन्गे, तां हकीकत बिच मेरे चेल्‍ले ठैहरगे।

³²तुसा सच्चाई जो जाणो, ते सच्चाई ने तुसा जो अजाद करणा।

³³तिन्हा ने उन्हा जो जवाब दित्ता, असी तां अब्राहम रे ‍खानदान का हिन, ते कदी कुसकी रे गुलाम नी होए, फिर तुसा किय्यां बोलदे की तुसा अजाद होई जाणा?

³⁴यीशु ने तिन्हा जो जवाब दित्ता, मैं तुसा जो सच-सच बोलदा कि जे कोई पाप करदा, तां से पाप रा गुलाम है।

³⁵नौक्कर हमेसा घरे नी रैहन्दा, पुत्तर हमेसा रैहन्दा।

³⁶इस तांइ जे पुत्तर तुसा जो अजाद करगा, तां सच्ची तुसा अजाद होई जाणा

³⁷मैं जाणदा कि तुसा अब्राहम रे ‍खानदान का हिन तां भी तांइ तुसा मेरे जो मारी रखणा चाह्‍ंदे किजोकी मेरी शिक्षा जो नी मनदे।

³⁸मैं से ही बोलदा जे अपणे पिता कने रैहन्दे बेल्ले दिख्खे रा है; ते तुसा से ही करदे जे तुसा ने अपणे पूरखां का सुणे रा है।

³⁹तिन्हा ने तिन्हेरे जो जवाब दित्ता, असा रा पुरखा ता अब्राहम है, यीशु ने तिन्हा जो बोल्लेया, जे अगर तुसा अब्राहम री औलाद हुदें तां अब्राहम सांई कम्म भी करदे।

⁴⁰पर अवे तुसा मेरे जो मारी रखणा चाह्‍ंदे जिन्निए तुसा जो ओ सच्ची गल्ल दस्सी जे परमेश्वर का सूणेया। इदेया तां अब्राहम ने नी कित्ता थिया।

⁴¹तुसा अपणे प्यो सांई कम्म करदे, तिन्हा ने उन्हेरे जो बोल्लेया, असी हल्ड़ नी जम्मे, असा रा इक्क प्यो है, मतलब परमेश्वर।

⁴²यीशु ने तिन्हा जो बोल्लेय, जे परमेश्वर तुसा रा प्यो हुदां, तां तुसा मेरे कने प्यार करदे, किजोकी मैं परमेश्वर रे पास्से का आए रा है, मैं अप्पु नी आया, पर तिनहा ने ही मेरे जो भेज्जेया।

⁴³तुसा मेरी गल्ल किजो नी समजदे? इस तांइ किजोकी तुसा मेरा शिक्षा जो सुणी नी सकदे।

⁴⁴तुसा अपणे प्यो शैतान रे पास्से का हिन ते अपणे प्यो री मर्जी जो पूरा करणा चांह्दे, से ता हमेसा का ही खून्नी है, तिसेरा सच्चाई कने कोई लैणा-दैणा नी है, किजोकी सच्चाई तिस बिच है ही नी। जां से झूठ बोलदा, तां अपणी आदत कने ही बोलदा किजोकी से झूठ्ठा है, बल्कि झूठ रा प्यो है।

⁴⁵पर मैं जे सच बोलदा, इस तांइ तुसा मेरा विश्वास नी करदे।

⁴⁶तुसा बिच कुण मेरे जो पाप्पी ठैहरादां? जां मैं सच बोलदा तां तुसा मेरा विश्वास किजो नी करदे?

⁴⁷जे परमेश्वर रे पास्से का हुदां, से परमेश्वर री गल्लां जो सूणदा, ते तुसा इस तांइ नी सूणदे किजोकी परमेश्वर रे पास्से का नी हिन।

⁴⁸ए सुणी करी यहूदियां ने तिन्हा जो बोल्लेया, कै असी ठीक नी बोलदे कि तू सामरिया प्रदेश रा है, ते तेरे बिच दुष्टात्मा है?

⁴⁹यीशु ने जवाब दित्ता, मेरे बिच दुष्टात्मा नी पर मैं प्यो री बड़ाई करदा ते तुसा मेरी बेजती करदे,

⁵⁰पर मैं अपणी बड़ाई नी कराणा चाह्‍ंदा, इक्क है जे चाह्‍ंदा कि मेरी बड़ाई हो, ते से इंसाफ करदा।

⁵¹मैं तुसा कने सच-सच बोलदा कि जे कोई मणू मेरी शिक्षा जो मनदा, तां तिसने कदी भी नी मरणा।

⁵²यहूदियां ने तिन्हा जो बोल्लेया, अवे असी जाणी लित्ता की तेरे अन्दर दुष्टात्मा है, अब्राहम मरी गेया, ते भविष्यद्वक्ता भी मरी गे, ते तुसा बोलदे जे कोई मेरे शिक्षा जो मनगा, तिसने कदी भी नी मरणा।

⁵³असा रे पुरखा अब्राहम तां मरी गेया, कै तुसा तिन्हा का भी बड्डे हिन? ते भविष्यद्वक्ता भी मरी गे तुसा अपणे आप जो कै दसदा?

⁵⁴यीशु ने जवाब दित्ता, जे अगर मैं अप्पु अपणी बड़ाई करां, तां मेरी बड़ाई किच्‍छ नी पर मेरी बड़ाई करणे वाला मेरा पिता है, जिस जो तुसा बोलदे कि तुसा रा परमेश्वर है।

⁵⁵तुसा तां तिन्हा जो नी जाणदे: पर मैं तिन्हा जो जाणदा, पर जे अगर मैं बोल्लां कि मैं तिन्हा जो नी जाणदा, तां मैं तुसा सांई झूठ्ठा ठैहरणा, पर मैं तिन्हा जो जाणदा ते तिन्हेरी शिक्षा जो मनदा।

⁵⁶तुसा रा पुरखा अब्राहम मेरे दिन दिखणे तांइ उम्मीद कने बड्डा वरी मगन थिया, ते उन्निए दिख्खेया, ते बड्डा खुस होया।

⁵⁷यहूदियां ने तिन्हा जो बोल्लेया, हल्ले तिकर तुसा पजांह साल्ले रे भी नी हिन, फिरी भी तुसा अब्राहम जो दिख्खे रा है?

⁵⁸यीशु ने तिन्हा जो बोल्लेया, मैं तुसा जो सच-सच बोलदा, कि अब्राहम रे पैदा होणे रे पैल्ले का भी मैं है।

⁵⁹तां तिन्हा ने उन्हेरे जो मारणे तांइ बट्टे चुक्के, पर यीशु लुकी करी मन्दिर रे अंगण का निकली गे।