Read Chambeali प्रेरितां रे कम्म 1 Bible Online

प्रेरितां रे कम्म 1 - Chambeali bible

प्रेरितां रे कम्म 1

¹ओ आदरणीय थियुफिलुस, मैं पैल्ली कताब उन्हा सारी गल्लां रे बारे बिच लिख्खे री थी जे यीशु अपणी सेवकाई री सुरुआत का लेई करी अपणे स्वर्ग पर चुक्की लित्ते जाणे तिकर सिखांदे रे,

²अपणे स्वर्ग पर चुक्के जाणे का पैल्ले तिन्हा ने अपणे चुणे रे प्रेरितां जो पवित्रात्मा री ताकत कने हुकम दित्ते।

³ते तिन्हा ने दुख झेलणे रे मरणे का बाद अप्पु जो अपणे प्रेरितां रे सामणे पक्के सबुतां कने ए साबित कित्ता कि से फिरी मरे रे लोक्कां बिच का जिन्दे होई गेरे हिन, ते चाली दिनां तिकर से तिन्हा सामणे प्रकट हुंदे रे, ते परमेश्वर रे राज री गल्लां करदे रे।

⁴जां से सारे कठ्ठे थिया तां यीशु ने तिन्हा कने मिली करी तिन्हा जो हुकम दित्तेया, यरुशलेम सहर जो ना छड्डो, पर पिता रे तिस वादे रे पूरा होणे रा इतंजार करो, जिसेरी गल्ल तुसा मेरे का सुणी चुके रे हो।

⁵किजोकी यूहन्ना ने तां पाणी बिच बपतिस्मा दित्ते रा है पर थोड़े रोज्जां बाद तुसा जो पवित्रात्मा रा बपतिस्मा मिलणा[1]।

⁶अते तिन्हा ने कठ्ठे होई करी तिन्हा का पूच्छेया, ओ प्रभु, कै तुसा अब्बे ही इस्राएल जो रोमी साम्राज्य री गुलामी का अजाद करी के इस्राएली राज जो फिरी स्थापित करी दैणा?

⁷यीशु ने तिन्हा जो जवाब दित्तेया, “से कुस बेल्ले या कुस युग बिच होणी, से सिर्फ परमेश्वर रे हक बिच हिन ते से तुसा रे जानणे तांइ नी हिन।

⁸पर जां पवित्रात्मा तुसा पर आणा तां तुसा ताकत पाणी ते तुसा यरुशलेम सहर ते सारी यहूदियां प्रदेश ते सामरिया प्रदेश बिच, ते दुनिया रे हर कुणे तिकर तुसा मेरे गवाह बणना।”

⁹ए बोल्ली करी ओ तिन्हेरे दिखदे-दिखदे ही परमेश्वर ने तिन्हा जो स्वर्ग पर चुक्की लित्ता, ते बदलां ने तिन्हेरे जो प्रेरितां री हाख्खियां का लुकाई लित्तेया।

¹⁰तिन्हेरे जाणे रे बेल्ले जां से आसमान पास्से दिख्खेया करदे थिये, तां चाणचक्के ही, दो मणू चिट्टे कपड़ेयां अंदर तिन्हेरे सामणे आई खड़ित्ते,

¹¹ते तिन्हेरे जो बोल्लेया, ओ गलीली मणूओं, तुसा किजो खड़ी करी आसमान पास्से दिख्खेया करदे हिन? ए ही यीशु, जे तुसा रे का स्वर्ग पर चुक्की लित्ते गेरे हिन, जिस तरिक्के कने तुसा उन्हा जो स्वर्ग पर जादें दिख्खेया तिसी तरिक्के कने उन्हा ने फिरी हटणा।

¹²“जां स्वर्गदूत तित्ते का हटी गे तां चेल्‍ले जैतून नां रे पहाड़ा का यरुशलेम सहर जो हटी आए जे तिस जगाह् का इक्क किलोमीटर री दुरी पर है।”

¹³जां से यरुशलेम बिच पूज्जे, तां भोड़ी पर गे जित्ते पतरस ते यूहन्ना ते याकूब ते अन्द्रियास ते फिलिप्पुस ते थोमा ते बरतुल्मै ते मत्ती ते हलफई रा मुडां याकूब ते शमौन जे जेलोतेस नां रे समुह रा मणू थिया ते याकूब रा मुडां यहूदा रैहन्दे थिये।

¹⁴ए सारे मती जनानियां ते यीशु री मां मरियम ते तिन्हेरे अपणे भ्यालां कने इक्क मन होई करी प्रार्थना बिच लग्गी रेय।

¹⁵तिन्हा ही दिनां बिच पतरस संगी विश्वासियां रे बिच जे इक्क सौ भी लोक्कां रे नेड़े-तेड़े थिये, खड़ी करी बोलणा लगेया,

¹⁶ओ विश्वासियों, जरुरी थिया कि पवित्रशास्त्र रा ओ लेख पूरा हो जे पवित्रात्मा ने दाऊद रे जरिए का यहूदा रे बारे बिच पैल्ले का बोल्ले रा थिया, जिनिये यीशु रे पकड़ने वालेयां री मदद कित्ती थी,

¹⁷किजोकी से ता असा बिच का इक्क थिया, ते इस सेवकाई बिच हिस्सेदार होया,

¹⁸जिय्यां कि तुसा जाणदे तिन्निए पाप री कमाई कने इक्क खेत्तर खरीदी लित्ता, ते सरे रे भारे पेया ते तिसेरा पेट फटी गेया ते तिसेरी सारी आन्द्रां निकली आई। [2]

¹⁹इस गल्ल जो यरुशलेम सहर रे सारे रैह्णे वाले जाणी गे, इत्ते तिकर कि तिस खेत्तर रा ना तिन्हेरी भाषा बिच हकलदमा मतलब की खून रा खेत्तर पेई गेया।

²⁰“जिय्यां की दाऊद ने भजन सहिंता बिच लिख्खे रा है, तिसेरा घर उजड़ी जाए, ते तिसेरे बिच कोई ना बसे, ते भजन संहिता बिच दाऊद ने लिख्खे रा है, तिसेरा औहदा कोई होर लेई लै।”

²¹इधेरे तांइ जिन्ने मणू यूहन्ना रे बपतिस्मा का लेई करी यीशु मसीह रे स्वर्ग पर चुक्के जाणे तिकर असा कने हर जगाह् बराबर रे, तिन्हा बिच का ही कोई इक्क तिसेरी जगाह् पर चुणेया जाए,

²²ठीक है कि तिन्हेरे बिच का इक्क मणू हमारे कने यीशु रे मरे रे लोक्कां बिच का फिरी जिन्दे होणे रा गवाह होई जाए।

²³तां तिन्हा ने बाकि लोक्कां बिच का दो लोक्कां जो खड़ा कित्ता, पैल्ले यूसुफ जो जिस जो बरसब्बास कहलादां, जिसेरा दुआ ना यूस्तुस है, ते दूए मत्तियाह जो,

²⁴ते ए प्रार्थना कित्ती, ओ प्रभु तुसा जे सारेयां रे मनां जो जाणदे, ए प्रकट करो कि इन्हा दोन्नां बिच का तुसा कुस जो चुणे रा है,

²⁵कि से इस सेवकाई ते प्रेरिताई रा हक्क लै, जिस जो यहूदा मरणे का बाद खाली छड्डी करी तिस जगाह् पर चली गेया जित्ते तिसजो अपणे कम्मां रे हिसाब कने होणा चाएदा।

²⁶तां तिन्हा ने तिन्हेरे नां री चीठ्ठियां पाई, ते चीठ्ठी मत्तियाह रे नां पर निकली अते से तिन्हा ग्यारह प्रेरितां कने गिणेया गेया।