Read Chambeali प्रेरितां रे कम्म 10 Bible Online

प्रेरितां रे कम्म 10 - Chambeali bible

प्रेरितां रे कम्म 10

¹कैसरिया कस्बे बिच कुरनेलियुस नां रा इक्क मणू थिया, जे इतालियानी नां री पलटन रा सरदार थिया।

²से परमेश्वर रा भक्त मणू थिया, ते सारा टब्बर परमेश्वर रा डर मन्दा थिया, ते गरीब यहूदियां जो बड़ा दान दिंदे थिये, ते लगातार परमेश्वर कने प्रार्थना करदे थिये।

³इक्क दिन, धियाड़ी रे त्रै बजे[13] तिसने इक्क दर्शन दिख्खेया तिसने साफ-साफ दिख्खेया कि परमेश्वर रा इक्क स्वर्गदूत तिसका आया ते बोल्लेया, ओ कुरनेलियुस,

⁴कुरनेलियुस ने ध्यान कने तिस स्वर्गदूत जो दिख्खेया, ते डरी करी बोल्लेया, ओ प्रभु जी ए कै है? स्वर्गदूत ने तिसजो बोल्लेया, तेरी प्रार्थना ते तेरे दान जो परमेश्वर ने ग्रहण कित्ते रा है।

⁵ते अवे याफा कस्बे बिच मणूआं जो भेज्जी करी शमौन जो, जिस जो कि पतरस भी बोल्दे, सद्दी लै,

⁶शमौन चमड़े रा धन्धा करणे वाले रे मणू रे घरे परोणा है, जिसेरा घर समुन्द्र कनारे है।

⁷जां स्वर्गदूत तिन्हा जो से गल्लां दस्सी करी तित्ते का चली गेया, तां कुरनेलियुस ने अपणे दो नौक्करां जो सद्देया ते इक्क सिपाई जो सद्देया जे परमेश्वर रे बड़ा भक्त थिया,

⁸ते तिन्हा जो सब गल्लां दस्सी करी याफा कस्बे बिच पतरस जो सद्दणे तांइ भेज्जेया।

⁹दूए दिन, धियाड़ी बेल्ले जां से सफर बिच थिये ते याफा कस्बे बिच का पुजणे वाले थिये, ते तिस्सी पतरस प्रार्थना करणे तांइ छत पर चढ़ी गेया।

¹⁰ते तिसजो भूख लग्गी, ते किच्‍छ खाणा चाह्‍ंदा थिया, पर जां रोट्टी बणेया करदी थी, तिस्सी बेल्ले से बेहोश होई गेया,

¹¹ते पतरस ने दर्शन बिच दिख्खेया, कि स्वर्ग खुली गेया, ते इक्क बड्डी चाद्दर चारो कुणे का धरती पास्से टंगी दित्ती गयी।

¹²जिस बिच धरती रे हर तरिक्के रे चौपाए ते रेगंणेवाले जानवर ते आसमान रे पक्षी थिये, जिन्हा बिच से जानवर भी थिये जे मूसा रे कानून रे हिसाब कने असुच्चे मन्ने जांदे थिये।

¹³ते तिसजो इक्क इदेयी अवाज सुणिती, कि ओ पतरस, उठ, मारी के खा!

¹⁴पर पतरस ने बोल्लेया, नी प्रभु, कदी भी नी, किजोकी मैं कदी कोई भिठ्ठी चीज नी खाई।

¹⁵फिरी दूज्जी वरी तिसजो अवाज सुणिती, कि जे किच्‍छ परमेश्वर ने सुच्चा कित्ते रा है, तिसजो तू भिठ्ठा मत बोल।

¹⁶त्रै वरी इय्यां ही होया, तां तिस्सी बेल्ले से चाद्दर आसमान जो चुक्की लित्ती गयी।

¹⁷जां पतरस अपणे मन बिच सोच्चेया ही करदा थिया, कि इस दर्शन रा कै मतलब होई सकदा, तां तिस्सी बेल्ले, से मणू जिन्हा जो कुरनेलियुस ने भेज्जेया थिया, शमौन री डेवढ़ी पर आई खड़े होये।

¹⁸ते हक्क लाई कि कै शमौन जिस जो पतरस भी बोलदे, परोणा बणी करी इत्ते ही है ना रुके रा?

¹⁹पतरस जे दर्शन रे बारे सोच्चेया ही करदा थिया, तिस बेल्ले पवित्रात्मा ने तिसजो बोल्लेया, दिख्ख, त्रै मणू तेरी तोप बिच हिन।

²⁰इधेरे तांइ थल्ले जा, ते बे-झिझक तिन्हा कने चली जा, किजोकी मैं ही तिन्हा जो भेज्जे रा है।

²¹तां पतरस ने थल्ले उतरी करी तिन्हा मणूआं जो बोल्लेया, दिख्खो, जिसेरी तोप तुसा पाये री है, से मैं ही है, तुसा री आणे री वजह कै है?

²²तिन्हा ने बोल्लेया, कुरनेलियुस हाकिम जे भला अते पवित्र कने परमेश्वर रा डर मनणे वाला ते सबणी यहूदियां बिच ठीक नां वाला मणू है, तिस स्वर्गदूत ने तिज्जो अपणे घरे सदणे तांइ ते जे किच्‍छ तुसा बोल्णा तिसजो असा जो सुनणे तांइ बोल्ले रा है

²³तां तिसने तिन्हा जो अन्दर सद्दी करी तिन्हेरी मेहमान नवाजी कित्ती। ते दूज्जे रोज, से तिन्हा कने गेया, ते याफा रे भाईयां बिच का केई तिन्हा कने गे

²⁴त्रिये रोज से कैसरिया कस्बे बिच पूज्जे, ते कुरनेलियुस अपणे रिस्तेदारां ते अपणे प्यारे मित्रां कने तिन्हा जो भालेया करदा थिया।

²⁵जां पतरस अन्दर आया करदा थिया, तां कुरनेलियुस तिन्हा का आई करी मिल्लेया, ते पैर बंदी करी तिन्हा जो प्रणाम कित्ती

²⁶पर पतरस ने तिसजो उठाई करी बोल्लेया, “खड़ी जा, मेरे जो प्रणाम मत कर, किजोकी मैं भी तां मणू है।”

²⁷ते तिस कने गल्ल-बात करदे-करदे अन्दर गेया, ते बड़े मणूआं जो इकठ्ठ दिख्खी करी

²⁸तिन्हा जो बोल्लेया, तुसा जाणदे हिन, कि गैर यहूदियां कने मिल्णा-जुलणा या तिन्हेरे तित्ते जाणा असा यहूदी मणूआं तांइ तिन्हेरे विधान रे खिलाफ है, पर परमेश्वर ने मेरे जो दस्से रा है, कि कुसकी भी मणू जो अपवित्र या असुच्चा नी बोल्ले।

²⁹इधेरे तांइ मेरे जो जां सद्देया, तां बिना किच्‍छ बोल्ले रे चली आया, अवे तुसा मेरे दस्सो कि मेरे जो कुस कम्म तांइ सद्दे रा है?

³⁰कुरनेलियुस ने बोल्लेया, कि इस बेल्ले पूरे चार रोज पैल्ले मैं अपणे घरे त्रै बजे[14] प्रार्थना करेया करदा थिया, कि तिस बेल्ले, इक्क मणू चमकीले कपड़े पाई करी, मेरे मुहाग्गर आई खड़ा होया।

³¹ते बोलणे लग्गेया, ओ कुरनेलियुस, तेरी प्रार्थना ते तेरे दान जो परमेश्वर ने ग्रहण कित्ते रा है,

³²इधेरे तांइ कुसकी जो याफा भेज्जी करी शमौन जिस जो कि पतरस भी बोल्दे, सद्द, से समुन्द्र रे कनारे शमौन नां रे चमड़े रा धन्धा करणे वाले रे घरे परोणा बणी करी रुके रा है।

³³तां मैं झट तेरे का मणू भेज्जी दित्ते, ते तुसा खरा कित्ता, जे आई गे, अवे असा सब परमेश्वर रे सामणे हिन, ताकि जे किच्‍छ परमेश्वर ने तुसा कने बोल्लेया तिसजो सूणन।

³⁴तां पतरस ने बोल्लेया, अवे मेरे जो पक्का होई गेया कि परमेश्वर कुसकी कने भी भेदभाव नी करदा

³⁵पर परमेश्वर हर जाति जे रा डर मनदे ते भले कम्म करदे, तिन्हा जो से अपणाई लिंदे।

³⁶जे बसेख तिन्हा ने इस्राएल बिच भेज्जेया, हालाकिं तिन्हा ने मसीह यीशु, जे सबणी रे प्रभु हिन रे जरिए सांती रा सुब बसेख सुणाया।

³⁷से गल्लां तुसा जाणदे हिन यूहन्ना रे बपतिस्मा रे प्रचार रे बाद गलील प्रदेश का सुरु होई करी सारे यहूदियां प्रदेश बिच फैली गेया।

³⁸परमेश्वर ने कुस तरिक्के कने नासरत कस्बे रे यीशु, जो पवित्रात्मा ते ताकत कने अभिषेक कित्तेया: से भलाई रे कम्म करदे, ते सारेयां जो जे शैतान रे सताए रे थिये, जाई-जाई करी ठीक करदे रे, किजोकी परमेश्वर तिन्हा कने थिये।

³⁹अते असा उन्हा सबणी कम्मां रे गवाह हिन, जे तिन्हा ने यहूदियां प्रदेश ते यरुशलेम सहर बिच भी कित्ते थिये, ते यहूदी अधिकारियां ने यीशु जो सुली पर टंगी करी मारी छड्डेया।

⁴⁰पर परमेश्वर ने तिन्हा जो तिज्जे रोज मुर्देयां बिच का जिंदा करी दित्तेया।

⁴¹सबणी मणूआं ने तिन्हा जो नी दिख्खेया पर तिन्हा गवाह जो जिन्हा जो परमेश्वर ने पैल्ले ही चुणी लेरां थिया, मतलब असा जो, जिन्हा ने तिन्हेरे मुर्देयां बिच का फिरी जिंदा होई जाणे का बाद, तिन्हा कने खाया-पित्तेया।

⁴²ते तिन्हा ने असा जो हुकम दित्तेया, कि सारे मणूआं बिच प्रचार करो, ते गवाई देयो, कि यीशु ही परमेश्वर रे पुत्तर हिन, जिन्हा जो परमेश्वर ने मरे रे लोक्कां रा फैसला करणे तांइ चुणे रा है।

⁴³सब भविष्यद्वक्ता तिन्हेरी गवाई दिंदे, कि जे कोई तिन्हा पर विश्वास करगा, तिसजो मसीह यीशु रे जरिए पाप्पां री माफी मिलण।

⁴⁴पतरस ए गल्लां बोल्लेया ही करदा थिया, कि पवित्रात्मा वचन सब सुनणे वाले लोक्कां पर उतरी आया।

⁴⁵ते जितणे लोक्कां रा खतना होये रा थिया जे पतरस कने आये थिये, से सब हैरान होई गे कि गैर यहूदियां पर भी पवित्रात्मा रा दान दित्तेया गेया।

⁴⁶किजोकी तिन्हा ने उन्हा जो अलग-अलग भाषा बोल्दे ते परमेश्वर री बड़ाई करदे सूणेया। इस पर पतरस ने बोल्लेया।

⁴⁷इस गल्ल पर पतरस ने बोल्लेया, कै कोई इन्हा मणूआं जो बपतिस्मा दैणे का पाणी रोक्की सकदा? इन्हा जो भी परमेश्वर का पवित्रात्मा तिय्यां ही मिल्लेया, जिय्यां असा जो मिल्लेया थिया। तिसने हुकम दित्तेया कि तिन्हा जो मसीह यीशु रे नां कने बपतिस्मा दित्तेया जाये, तां तिन्हा ने तिसेरे छन्दे कित्ते, कि किच्‍छ रोज असा कने रुकी जाण

⁴⁸ते पतरस ने हुकम दित्तेया कि तिन्हा जो मसीह यीशु रे नां कने बपतिस्मा दित्तेया जाये, तां तिन्हा ने पतरस रे छन्दे कित्ते कि किच्‍छ रोज होर तिन्हा का रुकी जाये, ते से तिन्हा लोक्कां कने किच्‍छ दिनां तांइ रुके।