Read Chambeali प्रेरितां रे कम्म 14 Bible Online

प्रेरितां रे कम्म 14 - Chambeali bible

प्रेरितां रे कम्म 14

¹इकुनियुम सहर बिच इय्यां होया कि से यहूदियां री सभास्थल जो इकठ्ठे गे, ते इदेइ गल्लां कित्ती की, कि यहूदियां ते यूनानियां बिच का केई जणेया ने विश्वास कित्तेया

²पर नी मनणे वाले यहूदियां ने गैर यहूदियां मणूआं जो संगी विश्वासियां रे खिलाफ उकसाए, ते फूट पाई दित्ती।

³ते से बड़े रोज्जां तांइ तित्ते रे, ते प्रभु रे भरोसे पर हिम्मत कने गल्लां कने करदे थिये ते प्रभु तिन्हेरे जरिए का चिन्ह-चमत्कारी कम्म करवाई करी अपणे अनुग्रह रे वचनां पर गवाई दुआंदे थिये।

⁴पर सहर रे मणूआं बिच फूट पेई गई थी, इस कने किन्ने ही तां यहूदियां रे पास्से, ते कितणे ही खास प्रेरितां रे पास्से होई गे,

⁵पर जां गैर यहूदियां ते यहूदी तिन्हेरी बेजती ते तिन्हेरे पर बट्टे बरसाणे तांइ अपणे सरदारां समेत तिन्हा पर दौड़े,

⁶ते इस गल्ल जो जाणी गे, ते लुकाउनिया प्रदेश रे लुस्त्रा ते दिरबे सहरां बिच, ते अख्खी-बख्खी रे देसां बिच दौड़ी गे

⁷ते तित्ते सुब बसेख सूणाणा लग्गे।

⁸लुस्त्रा बिच इक्क मणू थिया, जे पैरां का कमजोर थिया, से जन्म का ही लंगड़ा थिया, ते कदी भी नी चले रा नी थिया

⁹से पौलुस जो गल्लां करदे सूणेया करदा थिया ते पौलुस ने तिसेरे पास्से ध्यान कने दिख्खेया कि इस बिच ठीक होई जाणे रा विश्वास है।

¹⁰ते पौलुस ने जोरे सणे बोल्लेया, अपणे पैरा रे भारे सीद्दा खड़ा होई जा, तां से उटकी करी खड़ी गे ते हंडणा-फिरणा लग्गेया

¹¹मणूआं ने पौलुस रा ए कम्म दिख्खी करी लुकाउनिया री भाषा बिच जोर सणे बोल्लेया, देवता मणू रे रुप अदंर असा का उतरी आये हिन।

¹²ते लोक्कां ने तिन्हा जो यूनानी देवता रे नां रे हिसाब कने बरनबास जो ज़्यूस, ते पौलुस जो हिर्मेस बोल्लेया, किजोकी से गल्लां करणे बिच मुख्य थिया।

¹³ते ज़्यूस रे तिस मन्दिर रा पूजारी जे तिस कस्बे रे सामणे थिया, दान्द ते फूल्ला री माला फाटका पर लियाई करी मणूआं कने कुर्बानी करणा चांदा थिया।

¹⁴पर बरनबास ते पौलुस ने जां सूणेया, तां से बड़े परेशान होए ते अपणे कपड़े फाड़े, ते मणूआं री भीड़ बिच बड़ी गे, ते अवाज देई करी बोलणा लग्गे, तुसा मणू ए कै करेया करदे हिन?

¹⁵असा भी तां तुसा सांई दुख-सुख भोगणे वाले आम मणू हिन, ते तुसा जो सुब बसेख सुणादे, कि तुसा इन्हा बेकार री चीजां का बखरे होई करी जिंदे परमेश्वर जो जाणो, जिन्हा ने आसमान ते जमीन ते समुन्द्र ते जे किच्‍छ तिस बिच है तिन्हा जो बणाया।

¹⁶तिन्हा ने पैल्ले सब जातियां रे मणूआं जो अपणे-अपणे रस्ते चलणे दित्तेया

¹⁷तां भी तिन्हा ने अपणी भले कम्मां रे जरिए अपणे वजूद रा सबूत दिंदे रे, पर से भलाई करदे रे। तिन्हा ने आसमान का बरखा ते फलवन्त मौसम देई करी, तुसा जो रोट्टी ते तुसा रे मनां जो खुसी कने भरदे रे।

¹⁸ए बोल्ली करी भी उन्हा ने मणूआं जो बड़ी मुस्किल कने रोकेया कि तिन्हा तांइ कुर्बानी ना करण

¹⁹पर किन्ने ही यहूदियां अधिकारियां ने अन्ताकिया ते इकुनियुम रे सहरां बिच आई करी मणूआं जो अपणे पास्से करी लेया, ते पौलुस पर बट्टे भणकाये, ते मरे रा समजी करी तिसजो सहर का बाहर धरीड़ी लेई गे।

²⁰पर जां चेल्‍ले तिसेरे चौं पास्से आई खड़े होये, तां से उठी करी सहर बिच आया ते दूज्जे रोज बरनबास कने दिरबे कस्बे जो चली गेया।

²¹ते पौलुस ते बरनबास तिस कस्बे रे मणूआं जो सुब बसेख सूणाई करी, ते बड़े सारे चेल्‍ले बणाई करी, लुस्त्रा हटी करी ते तित्ते का इकुनियुम जो जाई करी अन्ताकिया जो हटी आये।

²²ते हर इक्क कस्बे बिच जाई करी चेल्‍ले रे मन जो मजबूत करदे रे ते ए उपदेस दिंदे थिये, कि विश्वास बिच बणे रेयो, ते ए बोलदे थिये कि असा जो बड़े दुख सहन करी के परमेश्वर रे राज बिच पुजणा है।

²³ते तिन्हा ने हर-इक्क कलीसिया बिच तिन्हेरे तांइ बुजुर्ग मणू रख्खे, ते ब्रत रख्खी करी प्रार्थना करी के, तिन्हा जो प्रभु रे हत्थां बिच सौंपेया जिन्हा पर तिन्हा ने विश्वास कित्तेया थिया।

²⁴ते पिसिदिया प्रदेश जो हुन्दे से पंफूलिया प्रदेश बिच पूज्जे,

²⁵ते पिरगा [19]बिच वचन सूणाई करी अत्तलिया बंदरगाह पर बिच आये।

²⁶ते तित्ते का जहाज बिच अन्ताकिया सहर जो तिस कम्म जो पूरा करी के हटी आये थिये जे करणे तांइ तिन्हा परमेश्वर रे अनुग्रह बिच सौंपेया थिया।

²⁷तिते पूज्जी करी, तिन्हा ने कलीसिया इकठ्ठी कित्ती ते दस्सेया, कि परमेश्वर ने असा कने होई करी कदेय बड्डे-बड्डे कम्म कित्ते ते किय्यां गैर यहूदी जो मसीह यीशु बिच विश्वास करणे तांइ दुआर खोल्ली दित्तेया।

²⁸ते से चेल्‍लेयां कने बड़े रोज तांइ तित्ते ही रे।