Read Chambeali प्रेरितां रे कम्म 17 Bible Online

प्रेरितां रे कम्म 17 - Chambeali bible

प्रेरितां रे कम्म 17

¹फिरी पौलुस ते सीलास अम्फिपुलिस ते अपुल्लोनिया कस्बेयां का होई करी थिस्सलुनीके सहर बिच आये, जित्ते यहूदियां री इक्क सभास्थल थिया।

²ते पौलुस अपणे तरिक्के कने तिन्हा का गेया, ते त्रै विश्राम दिन पर पवित्रशास्त्र का तिन्हा कने बैह्स कित्ती।

³ते तिन्हेरा मतलब खोली करी समझान्दा थिया, कि मसीह यीशु रा दुख उठाणा, ते मरे रे बिच का जिंदा होई जाणा जरुरी थिया, ते ऐई यीशु जिसेरी बारे बिच मैं प्रचार करेया करदा है, से ही मसीह हिन।

⁴तिन्हा बिच किन्ने यहूदी लोक्कां ने, ते परमेश्वर रे भक्त यूनानियां बिच का बड़े जणेया ने ते बड़ी सारी कुलीन जनानियां ने मन्नी लेया, ते पौलुस ते सीलास कने मिल्ली गे।

⁵पर यहूदियां ने खून्दक बिच आई करी बजार का केई गुन्डेया जो अपणे कने लेया, ते भीड़ लाई करी सहर बिच दंगे करणा लग्गे, ते यासोन रे घरे पर हमला करी के पौलुस ते सीलास जो सामणे लियाणा चाएया।

⁶पर तिन्हा जो से नी मिल्ले तां तिन्हा ने यासोन ते कितणे ही दूज्जे संगी विश्वासियां जो सहर बिच राज्यपाल रे सामणे धृड़ी करी लेई आये, कि ए मणू जिन्हा ने सारी दुनिया बिच उथल-पुथल मचाई रख्खे री है, अवे इत्ते आई गे।

⁷ते यासोन ने इन्हा जो अपणे घरे रैह्णे री अनुमती दित्ते री है, ते ए सब सम्राट रे हुकमां रे खिलाफ होई करी कम्म करदे हिन ते बोलदे, इक्क राजा होर है जिसेरा नां यीशु है।

⁸जां लोक्कां री भीड़ ते सहर रे अधिकारियां ने ए सूणेया तां से घबराई गे

⁹ते तिन्हा ने यासोन ते बाकि मणूआं का जुर्माना लेई करी तिन्हा जो छड्डी दित्तेया।

¹⁰फिरी झट ही तिन्हा जो रातो रात संगी विश्वासियां ने पौलुस ते सीलास जो बिरीया कस्बे जो भेज्जी दित्तेया तित्ते पूज्जी करी, से यहूदियां रे सभास्थल बिच गे।

¹¹ए मणू थिस्सलुनीके सहर रे मणूआं का जादा ठीक थिये इन्हा ने पूरा मन लगाई करी वचन सूणेया ते हर रोज पवित्रशास्त्र जो उलटदे पलटदे ए जांचदे रे कि पौलुस ने जे गल्लां दस्सी, कै से सच हिन।

¹²तां तिन्हा बिच का बड़े जणे यहूदियां ने ते कुलीन यूनानी जनानी ते मर्दां ने विश्वास कित्तेया

¹³पर जां थिस्सलुनीके सहर बिच रैह्णे वाले यहूदी जाणी गे, कि पौलुस बिरीया सहर बिच भी परमेश्वर रा वचन सुणाया करदा है, तां तित्ते भी आई करी मणूआं जो उकसाणे ते हल्ला मचाणा लग्गे

¹⁴तां विश्वासियां ने झट पौलुस जो भेज्जी दित्तेया, कि समुन्द्र रे कनारे चली जा, पर सीलास ते तीमुथियुस बिरीया बिच ही रे।

¹⁵पौलुस री मदद करणे वाले मणू तिसजो एथेंस सहर तक लेई गे, ते सीलास ते तीमुथियुस तांइ ए हुकम देई करी कि से जल्दी का जल्दी मेरे का आई जाण, तित्ते का चली पये।

¹⁶जां पौलुस एथेंस सहर बिच तिन्हा जो भालेया करदा थिया, तां सहर जो मूर्तां कने भरितेरा दिख्खी करी तिसेरा कलेजा फुक्की गेया।

¹⁷इधेरे तांइ से सभास्थल बिच यहूदियां ते गैर यहूदी परमेश्वर रे भक्तां कने ते चौक बिच जे मणू मिलदे थिये, तिन्हा कने हर रोज बैहस-बाजी करदा थिया।

¹⁸तां इपिकुरी ते स्तोईकी पणतां बिच का किन्ने तिस कने तर्क करणे लग्गे, ते कितणेयां ने बोल्लेया, ए अंट-शंट बोलणे वाला कै बोलणा चांदा? पर होरनियाँ ने बोल्लेया, से दूज्जे देवता रा प्रचारक लगदा, किजोकी ए यीशु रा, ते मरी करी फिरी जिन्दे होई जाणे रा सुब बसेख सुणांदा।

¹⁹तां से तिसजो अपणे कने अरियुपगुस नां रे इक्क महासभा जो लेई गे ते पूच्छेया, कै असा जाणी सकदे, कि ए नौई उपदेस जे सूणान्दा, से कै है?

²⁰किजोकी तू अनौखी गल्लां असा जो सूणान्दा, इधेरे तांइ असा जाणना चाह्‍ंदे कि इसेरा मतलब कै है?

²¹तित्ते रैह्णे वाले एथेंस रे सब मणू ते परदेसी सिर्फ किच्‍छ नौआ सुनणे या तिन्हा गल्लां री चर्चा रे अलावा कुसकी होर गल्ल बिच अपणा वक्त नी जाया नी करदे थिये।

²²तां पौलुस ने अरियुपगुस रे मझाटे खड़ी करी बोल्लेया, ओ एथेंस रे मणूओं मैं दिख्खदा, कि तुसा हर गल्ल पर देवता जो बड़े मनणे वाले हिन

²³किजोकी घूमदे-फिरदे तुसा री भक्ति वाली चीजां जो दिख्खेया करदा थिया, तां इक्क वेदी दिख्खी जिस पर लिख्खे रा थिया, कि अनजाणे परमेश्वर तांइ तां तुसा जिस जो बिना जाणे अराधना करदे, पर मैं तुसा जो तिसेरा सुब बसेख सूणान्दा

²⁴जिस परमेश्वर ने दुनिया ते तिस बिच सब चीजां जो बणाए रा है, से आसमान ते दुनिया रा मालक होई करी भी हत्थां रे बणाये र मन्दिर बिच नी रैहन्दा।

²⁵न कुसकी चीजां तांइ मणू रे हत्थां री जरुरत है, किजोकी से तां अप्पु ही सब जो जिन्दगी ते होर किच्‍छ भी दिन्दा।

²⁶तिन्हा ने इक्क ही मणू का सारे मणूआं री सबणी जातियां, सारी दुनिया पर रैह्णे वालेयां तांइ बणाए री है, ते तिन्हा ने ही मणूआं रा वक्त पक्का करी दित्तेया है ते तिस जगाह् री, जित्ते से रैहन्दे, तिसेरी सीमाये बन्नी दित्ती।

²⁷परमेश्वर ने ए इधेरे तांइ कित्ता ताकि न्याहरे बिच रैह्णे वाले मणू तिन्हा जो तोपण, होई सकदा कि से तिन्हा का पूजी करी तिन्हा जो पाई लेंन, हालांकि से असा का कुसकी का भी से दुर नी हिन:

²⁸किजोकी से असा कने हिन इधेरे तांइ असी जिन्दे हिन, ते हन्डदे-फिरदे, ते मजबूत रैहन्दे। जिय्यां तुसा रे किन्ने सारे कवियां ने ही बोल्ले रा है, कि असा तां तिसेरे ही वंश रे हिन।

²⁹इधेरे तांइ परमेश्वर री औलाद होई करी असा जो ए समझणा ठीक नी, कि से दिव्य सच्चाई सोणे या चाँदी या पत्थर री बणे री मणू री सोच या मिस्रियां रे बणी री कुसकी मूर्ति जदेयी है।

³⁰इधेरे तांइ परमेश्वर लोक्कां री अज्ञानता रे बेल्ले बिच आनाकानी करी के, अवे हर जगाह् सब मणूआं जो अपणे पाप्पां का तौबा करी लैणे रा हुकम दिंदे हिन।

³¹किजोकी तिन्हा ने इक्क रोज पक्का कित्तेया है, तिन्हा मणूआं रे जरिए धर्म कने दुनिया रा हिसाब-किताब करणा, जिन्हा जो तिन्हा ने चुणे रा है तिन्हा जो मरे रेयां बिच का जिंदा करणा, ए गल्ल सबनियां पर प्रमाणित करी दित्ती गे री है।

³²मरे रेयां रे फिरी जिन्दा होई जाणे री गल्ल सुणी करी किन्ने ही मजाक उड़ाणा लग्गे, ते कित्तणेया ने बोल्लेया, ए गल्ल असा तुसा का फिरी कदी सुणगे

³³तां पौलुस तिन्हेरे बिच का निकली गेया

³⁴पर केई मणू तिस कने मिल्ली गे, ते मसीह यीशु पर विश्वास कित्तेया, जिन्हा बिच का दियुनुसियुस अरियुपगी थिया, ते दमरिस नां री इक्क जनानी थी, ते तिन्हा कने होर भी किच्‍छ मणू थिये।