Read Chambeali प्रेरितां रे कम्म 18 Bible Online

प्रेरितां रे कम्म 18 - Chambeali bible

प्रेरितां रे कम्म 18

¹इसेरे बाद पौलुस एथेंस सहर जो छड्डी करी कुरिन्थुस सहर बिच आए।

²ते तिस जगाह् पर तिन्हा जो अक्विला नां रा इक्क यहूदी मणू मिल्लेया, जिसेरा जन्म पुन्तुस प्रदेश बिच होए रा थिया। से अपणी लाड़ी प्रिस्किल्ला कने ईतालिया देस बिच हल्ले आया ही थिया, किजोकी क्लौदियुस सम्राट ने सारे यहूदी लोक्कां जो रोम देस छड्डी करी जाणे रा हुकम दित्तया थिया, इधेरे तांइ तिनिये कुरिन्थ सहर छड्डी दित्तेया।

³ते पौलुस तिन्हा जो दिखणे तांइ गेया किजोकी से तिन्हेरे सांई तम्बू रे व्यापारी थिये ते से तित्ते रुकी करी तिन्हेरे कने कम्म करदा थिया।

⁴ते पौलुस हर इक्क विश्राम दिन पर सभास्थल बिच बैहस-बाजी करी के यहूदियां ते यूनानियां जो मसीह बिच विश्वास करणे तांइ समझांदा थिया।

⁵जां सीलास ते तीमुथियुस मकिदुनिया प्रदेश का आये, तां पौलुस ने तम्बू बनाणा छड्डी करी वचन सुनाणे बिच मगन होई करी यहूदियां जो गवाई दिन्दा थिया कि यीशु ही मसीह है:

⁶पर जां तिन्हा लोक्कां ने पौलुस रे खिलाफ होई करी तिसेरी बेजती करणा लग्गे, तां पौलुस ने अपणे कपड़े झाड़ी करी तिन्हा जो बोल्लेया, तुसा अपणी जिन्दगी तांइ अप्पु जिम्मेदार हिन, मैं बेकसूर है, अव्वे मैं गैर यहूदी रे मणूआं का जाई करी तिन्हा जो परमेश्वर रा बसेख सूणाणा।

⁷ते तित्ते का चली गेया ते तीतुस यूस्तुस नां रे परमेश्वर रे भक्त रे घरे आया, जिसेरा घर सभास्थल रे कने ही थिया।

⁸तां सभास्थल रे सरदार क्रिस्पुस ने ते तिसेरे टब्बर ने प्रभु पर विश्वास कित्तेया, ते बड़े कुरुन्थियों ने भी सूणेया ते विश्वास कित्तेया ते बपतिस्मा लित्तेया

⁹राती प्रभु जी ने दर्शन रे जरिए पौलुस जो बोल्लेया, मत डर प्रचार करदा जा ते चुप मत हो

¹⁰किजोकी मैं तेरे कने है, ते कोई भी तिज्जो नुक्सान नी पूजाई सकदा, किजोकी इस सहर बिच मते मणू हिन जिन्हा ने मेरा भरोसा करणा।

¹¹तां पौलुस तित्ते परमेश्वर रा वचन सुणादा रेया ते तित्ते डेढ़ साल रेया।

¹²जां गल्लियो अखाया प्रदेश रा राज्यपाल थिया तां यहूदी मणू पौलुस रे खिलाफ होई गे, ते तिसजो हिसाब-किताब री गद्दी रे सामणे लियाई करी, बोल्णा लग्गे।

¹³कि ए मणूआं जो समझान्दा, कि परमेश्वर री भक्ति इस तरिक्के कने करो, जे मूसा रे कानून रे उलट हो

¹⁴जां पौलुस बोलणे वाला ही थिया, तां गल्लियो ने यहूदियां जो बोल्लेया, ओ यहूदियों, जे ए किच्‍छ बे-न्यायी या बुराई री गल्लां हुंदी तां ठीक थिया ते मैं तुसा री सूणदा

¹⁵पर जे ए बैहस-बाजी री गल्लां, ते नां, ते तुसा रे इत्ते रे मूसा रे कानून रे बारे बिच हिन, तां तुसा ही जाणो, किजोकी मैं इन्हा गल्लां रा फैसला करणे वाला नी बणना चांदा

¹⁶ते गल्लियो ने तिन्हा जो हिसाब-किताब री गद्दी रे सामणे का कड्डी दित्तेया

¹⁷तां सब, मणूआं ने सभास्थल रे सरदार सोस्थिनेस जो पकड़ी करी हिसाब-किताब री गद्दी रे सामणे मारेया, पर गल्लियो ने इन्हा सब गल्लां री फिकर नी कित्ती।

¹⁸तां पौलुस बड़े रोज्जां तांइ कुरिन्थ सहर बिच ही रेया, पौलुस ने किंख्रिया कस्बे बिच अपणे बाल मुण्डवाये किजोकी तिसने इक्क मन्नत मन्नी थी फिरी विश्वासियां का बिदा लेई करी से किस्ती पर बेई करी सीरिया जो चली गेया तिसेरे कने प्रिस्किल्ला कने अक्विला भी थिये।

¹⁹फिरी से त्रैन्नी जणे इफिसुस सहर बिच पूज्जे ते पौलुस ने प्रिस्किल्ला ते अक्विला जो तित्ते ही छड्डी दित्तेया ते अप्पु सभास्थल बिच जाई करी यहूदियां कने बैह्स करणे लग्गेया।

²⁰जां तित्ते रे मणूआं ने तिसजो किच्‍छ रोज होर रैह्णे तांइ जो बोल्लेया तां तिसने मना करी दित्तेया।

²¹पर जांदे बेल्ले तिसने बोल्लेया, जे परमेश्वर री मर्जी हुन्गी तां मैं तुसा का फिरी आंगा फिर तिसने इफिसुस सहर कने किस्ती बिच सफर कित्तेया

²²फिरी कैसरिया कस्बे पूज्जी करी से यरुशलेम सहर जो गेया ते कलीसिया रे मणूआं जो नमस्ते करी के, फिरी से अन्ताकिया सहर जो चली गेया।

²³तित्ते किच्‍छ दिन रुकेया ते तिसेरे बाद तित्ते का चली गेया ते गलातिया ते फ्रूगिया रे प्रदेशां बिच इक्क जगाह् का दूज्जी जगाह् पर सफर करदे सबणी चेल्‍लेयां जो विश्वास बिच बधाणे लग्गेया।

²⁴तित्ते ही अपुल्लोस नां रा इक्क यहूदी मणू थिया जिसेरा जन्म सिकन्दरिया सहर बिच होया थिया से विद्वान मणू थिया से इफिसुस सहर बिच आया पवित्रशास्त्र रा तिसजो पूरा ज्ञान थिया

²⁵तिसजो प्रभु रे रस्ते री शिक्षा हासिल कित्ती थी ते से मन लाई करी यीशु रे बारे बिच खरी-खरी गल्लां सुणादां ते सखादां थिया पर तिसजो सिर्फ यूहन्ना रे बपतिस्मा रे बारे अन्दर ही ज्ञान थिया

²⁶से सभास्थल बिच निडर होई करी बोलणा लग्गेया, पर प्रिस्किल्ला ते अक्विला ने तिसेरी गल्लां सुणी करी, तिसजो अपणे घरे लेई आये ते परमेश्वर रा रस्ता तिसजो होर भी सह्ई-सह्ई बताया।

²⁷ते जां तिसने पक्का करी लित्तेया कि समुन्द्र रे पार उतरी करी से अखाया प्रदेश जो जाण तां विश्वासियां ने तिसजो हिम्मत देई करी भेज्जेया ते तित्ते रे चेल्‍लेयां जो इसेरा स्वागत करणे तांइ चीठ्ठी लिख्खी भेज्जी, ते तिसने पूज्जी करी तित्ते तिन्हा मणूआं री बड़ी मदद कित्ती जिन्हा ने परमेश्वर री अनुग्रह री वजह कने विश्वास कित्तेया थिया।

²⁸किजोकी पवित्रशास्त्र का प्रमाण देई-देई करी कि यीशु ही मसीह हिन, से यहूदियां जो लोक्कां रे बिच-मझाटे शास्त्र बिच का जबरदस्त गल्लां बोल्ली करी चुप्प करांदा रेया।