Read Chambeali प्रेरितां रे कम्म 19 Bible Online

प्रेरितां रे कम्म 19 - Chambeali bible

प्रेरितां रे कम्म 19

¹ते जां अपुल्लोस कुरिन्थुस सहर बिच थिया, तां पौलुस तिन्हा प्रदेशां रे उपराल्ले हिस्सेयां बिच सफर करदे-करदे इफिसुस सहर बिच आई पूज्जेया तित्ते तिसजो किच्‍छ चेल्‍ले मिल्ले।

²तिन्ने तिन्हा जो बोल्लेया, कै तुसा जो जां तुसा विश्वास कित्तेया थिया तिस बेल्ले पवित्रात्मा मिल्लेया थिया? तिन्हा ने जवाब दित्तेया, असा ने तां सूणेया तक नी कि कोई पवित्रात्मा है भी।

³पौलुस ने तिन्हा जो बोल्लेया तां फिरी तुसा कदेया बपतिस्मा लित्तेया? तिन्हा ने बोल्लेया, से बपतिस्मा जे यूहन्ना दिंदा थिया।

⁴पौलुस ने बोल्लेया, यूहन्ना ने तिन्हा लोक्कां जो ही बपतिस्मा दित्ता जिन्हा ने पाप्पां का तौबा कित्तेया, पर तिनिये ए बोल्लेया कि जे मेरे का बाद आणे वाला है, तिस पर मतलब यीशु पर विश्वास करेयो जे मसीह हिन।

⁵यह सुणी करी तिन्हा ने प्रभु यीशु रे नां पर बपतिस्मा लित्तेया।

⁶ते जां पौलुस ने तिन्हा पर हत्थ रख्खे, तां से मणू पवित्रात्मा कने भरी गे, ते से मणू अलग-अलग भाषा बोलणे लग्गे ते भविष्यवाणी करणे लग्गे।

⁷ए सब कोई बारह मणू थिये

⁸ते पौलुस सभास्थल बिच जाई करी त्रै महिन्ने तांइ बेखोफ होई करी प्रचार करदा रेया, ते परमेश्वर रे राज रे बारे बिच बैह्स करदा ते समझान्दा रेया।

⁹पर जां कितणेयां ने अपणा मन कठोर करी के विश्वास नी कित्तेया, ते मणूआं रे सामणे इस पंथ[21] जो बुरा भला बोलणा लग्गे, ते तिसने तिन्हा जो छड्डेया ते चेल्‍लेयां जो लेई करी चली गेया, ते हर रोज तुरन्नुस री पाठशाला बिच बैह्स करदा थिया ते लोक्कां जो समझांदा थिया।

¹⁰दो साल तांइ इय्यां ही हुन्दा रेया, इत्ते तक कि एशिया प्रदेश रे रैह्णे वाले कै यहूदी, कै यूनानी सबने प्रभु रा वचन सूणेया

¹¹ते परमेश्वर पौलुस रे जरिए का ताकत रे अनौखे चमत्कार करान्दे रे।

¹²इत्ते तक की तिसेरे छुत्ते रे रूमाल ते अँगोछेयां जो बिमार लोक्कां का लिन्दे थिये ते तिन्हेरी बिमारियां ठीक जान्दी थी अते दुष्टात्मा तिन्हा का निकली जान्दी थी।

¹³पर किन्ने ही यहूदी मणू जे झाड़-फूंक करदे फिरदे थिये, ए करणे लग्गे, कि जिन्हा बिच दुष्टात्मा हो तिन्हा जो प्रभु यीशु रे नां कने ए बोल्ली करी कड्डो कि जिस यीशु रा प्रचार पौलुस करदा मैं तुसा जो तिसेरे ही नां कने बाहर निकलणे रा हुकम दिंदा।

¹⁴ते स्क्किवा रे इक्क यहूदी बड्डे पुरोत्त रे सत्त पुत्तर थिये, जे इय्यां ही करदे थिये

¹⁵पर दुष्टात्मा ए जवाब दिंदी थी, कि यीशु जो असा जाणदे हिन, ते पौलुस जो भी पछाणदे, पर तुसा कुण हिन?

¹⁶ते तिस मणू ने जिस बिच दुष्टात्मा थी, तिन्हा पर झपटी करी, ते तिन्हा जो अपणे वस बिच लियाई करी, तिन्हा कने इदेयी जोर-जबरदस्ती कित्ती, कि से नंगे ते जख्मी होई करी तिसेरे घरे का नस्सी गे

¹⁷ते ए गल्ल इफिसुस सहर रे रैह्णे वाले यहूदी ते यूनानी भी जाणी गे, ते सब जणे बड़े डरी गे, ते प्रभु यीशु रे नां री बड़ाई होर जादा होणा लग्गी।

¹⁸ते जिन्हा ने विश्वास कित्तेया थिया, तिन्हा बिच का बड़े जणेया ने आई करी अपणे-अपणे पाप्पां जो मन्नी लेया ते तिन्हा कम्मां जो मन्नी लेया।

¹⁹ते जादू-टोणा करणे वालेयां बिच का बड़े जणेया ने अपणी-अपणी कताबां इकठ्ठी करी के सारेयां रे सामणे फुक्की दित्ती, ते जा तिन्हेरी कीमत जोड़ी, तां पंजाह् हजार चाँदी रे सिक्के[22]यां रे बराबर निकली

²⁰ते प्रभु रा वचन जोरो-शोरो कने दुर-दुर तक फैलदा गेया

²¹जां ए गल्लां होई गई, तां पौलुस ने अपणे मन बिच पवित्रात्मा रे जरिए मकिदुनिया प्रदेश ते अखाया हुन्दे यरुशलेम जाणे रा फैसला लित्ता ते बोल्लेया, कि मेरे जो तित्ते जाणे का बाद मेरे जो रोमी साम्राज्य री राजधानी रोम सहर जो भी जाणा जरुरी है।

²²ते तिसने तिसेरी सेवा करणे वालेयां बिच का तीमुथियुस ते इरास्तुस जो मकिदुनिया प्रदेश तिसका पैल्ले भेज्जी करी किच्‍छ रोज एशिया प्रदेश रे इफिसुस सहर बिच रेया।

²³तिन्हा रोज्जां बिच मसीही पंथ[23] जो लेई करी बड़ी लड़ाई होई।

²⁴किजोकी देमेत्रियुस नां रा सुनियारा अरतिमिस नां री यूनानी देवी रे चाँदी रे मन्दिर रे ढांचे बणवाई करी मिस्त्रियां जो बड़ा कम्म दुआन्दा थिया ते तिन्हा जो पैसे देई करी कम्म करवांदा थिया।

²⁵देमेत्रियुस ने तिन्हा जो, ते तिस कम्म कने जुड़े रे होर भी दूज्जे मिस्त्रियां जो इक्कठा करी के बोल्लेया, ओ भाईयों, तुसा जाणदे हिन, कि इस कम्म तांइ असा जो किन्ने पैसे मिलदे हिन

²⁶अते तुसा दिखदे सूणदे हिन, कि सिर्फ इफिसुस सहर बिच ही नी, बल्कि सारे एशिया प्रदेश बिच ए बोल्ली करी की इस पौलुस ने बड़े मणूआं जो बहलाया फुसलाया, कि मणूआं रे हत्थां कने बणाये रे देवते सच्चे देवते नी हिन

²⁷ते अवे सिर्फ इक्क ही गल्ल रा डर नी कि असा रा कम्म धंदा बदनाम होया करदा है, बल्कि ए भी कि महान देवी अरतिमिस रे मन्दिर जो भी घटिया समजेया जाणा जिस जो की सारा एशिया प्रदेश ते सारी दुनिया भक्ति करदी ते तिसेरा गौरव भी जान्दा रैह्णा

²⁸भीड़ ए सुणी करी बड़े वरी गुस्से कने भरी गई, ते जोरे जोरे बोलणा लग्गी, इफिसियों री अरतिमिस महान है

²⁹ते होर लोक्कां ने सारे सहर बिच बड़ी कहला रा शोर सुणी करी तिस भीड़ बिच मिली गे ते गयुस ते अरिस्तर्खुस मकिदुनिया प्रदेश जो, जे कि पौलुस रे कने सफर करेया करदे थिये पकड़ी लेया ते तिन्हा जो रंगशाला बिच लेई गे।

³⁰जां पौलुस मणूआं रे सामणे जाणा चाह्‍ंदा थिया पर चेल्‍लेयां ने तिसजो जाणे नी दित्तेया

³¹एशिया प्रदेश रे अधिकारियां ने जे तिसेरे मित्र थिये, तिन्हा जो ए बोल्ली भेज्जेया, कि रंगशाला बिच जाई करी कोई अपणी जान जो जोखिम बिच मत पांदा।

³²सारी रंगशाला बिच कहला पेई गे री थी ते कोई किच्‍छ होर बोल्लेया करदा थिया, ते कोई किच्‍छ होर, तिन्हा बिच का जादातर मणू ए नी जाणदे थिये कि से इत्ते इकट्ठा किजो होये रे हिन।

³³तां भीड़ बिच का किच्‍छ लोक्कां ने सिकन्दर जो, जिसेरा नां यहूदियां जो सूझ्झेया थिया, तिसजो अग्गे खड़ा कित्तेया, सिकन्दर ने अपणे हत्थां कने लोक्कां जो चुप्प होणे रा इसारा कित्तेया ते मणूआं रे सामणे बचाव रा पक्ष रखणा चाएया।

³⁴पर जां तिन्हा जो पता चलेया कि से इक्क यहूदी है जे मूर्तां री पूजा नी करदा, तां से सब कोई दो घटें तांइ इक्क इस सूर बिच लेरां मारदे ए बोलदे रे, इफिसियों री देवी अरतिमिस महान है।

³⁵तां सहर रे मन्त्री ने मणूआं जो सांत करी के बोल्लेया, ओ इफिसुस सहर रे रैह्णे वाले लोक्कों, कुण नी जाणदा, कि इफिसियों रे सहर री महान देवी अरतिमिस रे मन्दिर, ते स्वर्ग का पेई री मूर्ति री रखवालण है

³⁶किजोकी इन्हा गल्लां का कोई मुकरी नी सकदा इधेरे तांइ तुसा जो सान्त रैह्णा चाएदा ते बिना सोच्चे समजे किच्‍छ नी बोल्णा चाएदा

³⁷किजोकी तुसा इन्हा मणूआं जो लियाये, जे ना मन्दिर जो लूटणे वाले हिन, ते ना असा री देवी री बेजती करदे

³⁸इधेरे तांइ जे अगर देमेत्रियुस ते तिसेरे साथी मिस्त्रियां जो कुसकी कने कोई शिकायत है तां से कचेरी जाई सकदे।

³⁹पर जे तुसा इसका होर जादा जाणना चाह्‍ंदे हिन तां तिसेरा फैसला सहर री सभा बिच कित्तेया जाणा।

⁴⁰किजोकी अज्ज रोमी अधिकारियां रे खिलाफ विरोध होणा रे बाद, असा पर इल्जाम लगणे रा डर है, किजोकी इसेरी कोई वजह नी है, अते असी इस भीड़ रे कठीणे रा कोई जवाब नी देई सकणा।

⁴¹ते ए बोल्ली करी तिन्ने सभा जो भेज्जी दित्तेया।