Read Chambeali प्रेरितां रे कम्म 20 Bible Online

प्रेरितां रे कम्म 20 - Chambeali bible

प्रेरितां रे कम्म 20

¹जां कहला मुक्की गेई तां पौलुस ने चेल्‍लेयां जो हिम्मत बंधाई करी तिन्हा जो समजाया ते तिन्हा का बिदा लेई करी से मकिदुनिया प्रदेश जो चली पेया।

²तिस पूरे प्रदेश बिच का होई करी ते प्रेरितां री हिम्मत बधाई करी से यूनान देस बिच आई गेया।

³जां त्रै महिन्ने रेई करी से तित्ते का जहाज का सीरिया प्रदेश जाणे वाला थिया, तां तिनिये सूणेया कि रस्ते बिच किच्‍छ यहूदी अधिकारी तिसजो मारणे जो भालेया करदे थिये, इधेरे तांइ तिनिए सोच्चेया कि मैं मकिदुनिया प्रदेश का होई करी हटी जाए।

⁴बिरीया कस्बे रे रैह्णे वाले पुरुर्स पुत्तर सोपत्तरुस ते थिस्सलुनीकियां सहर बिच का अरिस्तर्खुस ते सिकुन्दुस ते दिरबे कस्बे रा गयुस ते लुस्त्रा कस्बे रा तीमुथियुस ते एशिया प्रदेश रा तुखिकुस ते त्रुफिमुस एशिया प्रदेश तांइ तिसेरे कन्ने आये।

⁵से मणू असा का अग्गे जाई करी त्रोआस कस्बे बिच असा जो भालदे रे,

⁶ते असी दोन्नों फिलिप्पी सहर जो चली गे। अखमीरी रोट्टी रे त्योहर रे दिनां का बाद फिलिप्पी सहर का जहाज पर चढ़ी करी पांज्ज रोज्जां बिच त्रोआस बिच हटी गे ते तिसका पूज्जे, अते सत्त रोज्जां तांइ तित्ते ही रे।

⁷हफ्ते रे पैल्ले रोज्जे, जां असी प्रभु भोज मनाणे तांइ कठिये, तां पौलुस ने, जे दूए रोज्जे जाणे वाला थिया, तिन्हा कने गल्लां कित्तियां अते अद्दी रात्ती तांइ गल्लां करदा रेया

⁸जिस अटारी पर असी कठित्ते रे थिये, तिस बिच मते सारे दीये बलेया करदे थिये

⁹ते यूतुखुस नां रा इक्क जवान मुन्ड़ा खिड़की पर बैठे रा गैहरी निदंर बिच टुलणी मारेया करदा थिया जां पौलुस बड़ी हाण तांइ गल्लां करदा रेया, तां निदंर री वजह कने से सोई गेया ते से तिज्जी अटारी का पेई गेया, ते जां तिसजो चुक्केया तां से मरी चुके रा थिया।

¹⁰पर पौलुस उतरी करी तिसका गेया ते तिसजो गले लाई करी बोल्लेया, फिकर मत करो किजोकी ए हल्ले जिन्दा ही है।

¹¹फिरी उप्पर जाई करी प्रभु भोज मनाणे लग्गे ते इतणी देर तांइ तिन्हा कने गल्लां करदा रेया कि भ्याग होई गई। फिरी पौलुस चली गेया।

¹²ते से तिस जवान जो जिन्दा लेई आए ते तिन्हा जो बड़े वरी खुसी होई।

¹³असी पैल्ले ही जहाज पर चढ़ी करी अस्सुस कस्बे पास्से का ए सोच्ची करी अग्गे चली गे कि तित्ते का असी पौलुस जो जहाज चढ़ाई लिगें, किजोकी तिनिए ए इधेरे तांइ ठैह्राया थिया कि से अप्पु ही पैदल जाणे वाला थिया।

¹⁴जां से अस्सुस कस्बे बिच असा जो मिल्लेया तां असी तिसजो चढ़ाई करी मितुलेने कस्बे जो लेई आए।

¹⁵दूए रोज्जे तित्ते का जहाज रा सफर करी असी खियुस रे सामणे पूज्जे, ते अगले रोज्जे सामुस बिच पूजी गे। फिरी दूए रोज्जे मिलेतुस सहर बिच आई रे।

¹⁶किजोकी पौलुस ने इफिसुस सहर रे नेड़े का होई करी जाणे रा मन बणाए रा थिया कि इय्यां ना हो कि तिसजो एशिया प्रदेश बिच देर लगे, किजोकी तिसजो बड़ी तोल लग्गे री थी कि जे होई सको तां से पिन्तेकुस्त रे त्योहर रे रोज्जे यरुशलेम बिच रे।

¹⁷तिनिए मिलेतुस सहर का इफिसुस सहर बिच बसेख भेज्जी करी कलीसिया रे बुजुर्ग लोक्कां जो सदाया।

¹⁸जिस बेल्ले से तिसेरे नेड़े आए तां से तिन्हा जो बोलणा लगेया, तुसा जो पता है कि पैल्ले दिन का ही, जां मैं एशिया प्रदेश बिच पूज्जेया, मैं हल्ले तिकर तुसा कन्ने किय्यां रेया।

¹⁹मतलब कि बड़े निम्मते होई करी, ते रोई-रोई करी, ते तिन्हा परिक्षां बिच का जे यहूदियां री चलाकी री वजह कने मेरे पर आई पेई, मैं प्रभु जी री सेवा करदा ही रेया

²⁰ते जे-जे गल्लां तुसा रे फैदे री थियां, तिन्हा जो दसणे ते मणूआं रे सामणे ते घरे-घरे जाई करी सखाणे का कदी भी नी झिझकेया,

²¹पर यहूदियां ते यूनानियां रे सामणे गवाई दिन्दा रेया कि परमेश्वर रे पास्से मन फेरणा अते असा रे प्रभु मसीह यीशु जी पर विश्वास करणा चाएदा।

²²पर अवे मैं पवित्रात्मा री गल्ल मन्नी करी यरुशलेम सहर जो जाया करदा है ते मेरे जो कोई पता नी है कि तित्ते मेरे कने क्‍या-क्‍या होणा।

²³सिर्फ ए ही कि पवित्रात्मा हर इक्क सहर बिच गवाही देई-देई करी मेरे जो बोलदा कि बंधन ते कहला तेरे तांइ तैयार हिन,

²⁴पर मैं अपणी जान जो किच्‍छ भी नी समजदा कि तिसजो प्यारा समजां, पर तां ए कि, मैं अपणी दौड़ जो ते तिस सेवा जो पूरा करां, जे मैं परमेश्वर रे अनुग्रह री सुब बसेख पर गवाई दैणे तांइ प्रभु यीशु का पाए री है।

²⁵पर मेरे जो पता है कि तुसा सब जणे जिन्हा बिच मैं परमेश्वर रे राज रा प्रचार करदा रेया, तुसा मेरे जो फिरी नी दिख्खणा।

²⁶इधेरे तांइ मैं अज्ज रे दिन तुसा जो गवाई देई करी बोलदा, कि जे अगर तुसा मसीह बिच विश्वास कित्ते बगैर मरी जांदे तां मैं तुसा री जिन्दगी तांइ जिम्मेदार नी है।

²⁷किजोकी मैं तुसा जो परमेश्वर री से सारी गल्लां दसणे का नी झिझकेया जे से तुसा जो दसणा चाह्‍ंदे।

²⁸इधेरे तांइ अपणी ते अपणे सारे झुण्ड री चुकन्ने रेह्ई करी देख-रेख करो जिन्हा परमेश्वर रे लोक्कां बिच पवित्रात्मा ने तुसा जो कलीसिया रे मुखिया बणाए रा है कि तुसा परमेश्वर री कलीसिया री रखवाली करो जिस जो तिसने अपणे खून कने खरीदी लित्ते रा है।

²⁹मैं जाणदा कि खूंखार भेड़िये जदेय झूठ्ठे शिक्षकां ने तुसा रे बिच-मझाटे मण्डली जो तोडणे तांइ घुसी जाणा।

³⁰तुसा बिच मझाटे बिच इदेय-इदेय मणू आई जाणे जिन्हा ने चेल्‍लेयां जो भी भटकाई दैणे तांइ पुठ्ठी-सीद्दी गल्लां बोलणी।

³¹इधेरे तांइ चुकन्ने रेयो ते याद रख्खो कि मैं तुसा कने त्रै साल रेया ते हर बेल्ले तुसा री फिकर कित्ती ते कदी भी समझाणा नी छड्डेया।

³²ते अवे मैं तुसा जो परमेश्वर, ते तिन्हेरे अनुग्रह रे वचन जो सौंपी दिन्दा जे तुसा रे विश्वास बिच तरक्की करांदा ते सारे पवित्र कित्ते रे मणूआं बिच साझ्झी करी के परमेश्वर विरासत बिच दैणा।

³³मैं कुसकी रे चाह्‍ंदी, सोन्ने या कपड़े रा लालच नी कित्तेया

³⁴तुसा जो अप्पु ही पता है कि इन्हा ही हत्थां ने मेरी ते मेरे साथियां री जरुरतां पूरी कित्ती

³⁵मैं तुसा जो सब किच्‍छ करी के दस्सेया कि इस तरिक्के कने मैह्नत करी के कमजोर मणूआं जो सम्भालणा ते प्रभु यीशु रे वचनां जो याद रखणा जरुरी है, जे तिन्हा ने अप्पु ही बोल्ले रा है, लैणे का दैणा धन्न है

³⁶ए बोल्ली करी तिनिये गोड्डे रे भारे बेई करी ते तिन्हा सबणी कने प्रार्थना कित्ती

³⁷तां से सब बड़ा रोये ते पौलुस रे गले कने लिपटी करी तिसजो चुमणा लगे

³⁸से खास कर इस गल्ल कने दुखी थिये जे तिनिए बोल्ली थी कि, तुसा मेरे जो फिरी नी दिखणा तां तिन्हा ने तिसजो जहाज तिकर पूजाया।