Read Chambeali प्रेरितां रे कम्म 25 Bible Online

प्रेरितां रे कम्म 25 - Chambeali bible

प्रेरितां रे कम्म 25

¹फेस्तुस रे तिस प्रदेश बिच राज्यपाल बणी करी पुजणे रे बाद से कैसरिया का यरुशलेम सहर तांइ निकलेया।

²तां बड्डे पुरोत्तां ते यहूदी अधिकारियां ने तिसेरे सामणे पौलुस पर इल्जाम लाए।

³ते से अप्पु तांइ तिसका छन्दे करी के पौलुस रे खिलाफ बोलणा लगे कि से तिसजो यरुशलेम अन्दर सदवाओ, किजोकी से तिसजो रस्ते अन्दर ही मारी रखणे री भाल बिच थिये।

⁴फेस्तुस ने जवाब दित्तेया, पौलुस कैसरिया अन्दर कैद है, ते मैं अप्पु तौले तित्ते जाणा

⁵फिरी बोल्लेया, तुसा बिच का जे अधिकारी हिन, से कन्ने चलो, ते अगर इस मणू ने किच्‍छ गलत कम्म कित्ते रा ए ता इस पर इल्जाम लाओ

⁶तिन्हेरे बिच पौलुस कोई आठ्ठ-दस रोज रेह्ई करी कैसरिया कस्बे जो चली गेया ते दूए रोज्जे हिसाब-किताब री गद्दी पर बेई करी पौलुस जो अणने रा हुकम दित्तेया।

⁷जां से आया, तां जे यहूदी अधिकारी यरुशलेम का आए रे थिये, तिन्हा ने अपणे-अपणे खड़े होई करी पौलुस पर मते सारे बड्डे-बड्डे इल्जाम लाये, जिन्हेरा सबूत से नी देई सकदे थिये।

⁸पर पौलुस ने जवाब दित्तेया, मैं नां तां यहूदियां रे मूसा रे कानून रे, ते ना मन्दिर रे, अते नां ही सम्राट रे खिलाफ कोई कम्म कित्ते रा है।

⁹तां फेस्तुस राज्यपाल ने यहूदी अधिकारियां जो खुस करणे री इच्छा कने पौलुस जो बोल्लेया, कै तू चाह्‍ंदा कि तू यरुशलेम जो जाओ ते तित्ते मेरे सामणे तेरा ए मुकद्दमा चलाया जाओ?

¹⁰पौलुस ने बोल्लेया, मैं सम्राट रे हिसाब-किताब री गद्दी रे सामणे खड़ित्ते रा है मेरे मुकदमे रा फैसला इत्ते ही होणा चाएदा जिय्यां तिज्जो खरा करी पता है, कि मैं यहूदियां रे खिलाफ कोई गुनाह कित्ते रा नी है।

¹¹अगर मैं गुनेह्गार है ते अगर मैं मारी रखणे जोग्गी कोई गलती कित्ते री है, तां मैं मरणे का नी मुकरदा पर जिन्हा गल्लां रा ए मेरे पर इल्जाम लाया करदे हिन, अगर तिन्हा बिच का कोई भी गल्ल सच साबित नी हुंदी, तां कुसकी जो भी मिन्जो तिन्हेरे हत्थां बिच सौंपणे रा अधिकार नी है, मैं बिनती करदा कि मेरा हिसाब-किताब सम्राट द्वारा कित्तेया जाए।

¹²तां फेस्तुस ने मन्त्रियां री सभा कने गल्लां करी के तिसजो जवाब दित्तेया, तैं अप्पु ही सम्राट का न्याय करवाणे तांइ बिनती कित्ते री है, तां तेरा न्याय सम्राट ने ही करणा।

¹³थोड़े रोज्जां बाद अग्रिप्पा राज्जा ते तिसेरी छोटी भैण बिरनीके, कैसरिया कस्बे अन्दर आई करी फेस्तुस राज्यपाल कने मिल्ले।

¹⁴तिन्हेरे मते रोज्ज रैह्णे का बाद फेस्तुस ने पौलुस रे बारे अन्दर राज्जे जो दस्सेया: इक्क मणू है, जिस जो फेलिक्स कैद अन्दर छड्डी गे रा है

¹⁵जां मैं यरुशलेम अन्दर थिया, तां बड्डे पुरोत्त ते यहूदियां रे बुजुर्ग मणू ने तिस पर इल्जाम लाए ते से चाह्‍ंदे थिये कि तिसजो सजा दित्ती जाओ

¹⁶पर मैं तिन्हा जो जवाब दित्तेया कि रोमी मणूआं री ए रीत नी है कि कुसकी मणू जो सजा तांइ सौंपी दैण से तां तांइ इय्यां नी करदे जां तांइ कि आरोपी जो अपणे मुद्देइयाँ रे सामणे खड़े होई करी इल्जामां रा जवाब दैणे रा मौका नी मिल्लो

¹⁷इधेरे तांइ जिस बेल्ले यहूदी अधिकारी तित्ते कठित्ते, तां मैं जरा भी हाण नी लाई, पर दूए ही रोज्जे हिसाब-किताब री गद्दी पर बेई करी पौलुस जो सामणे अणने रा हुकम देई दित्ता।

¹⁸जिस बेल्ले तिसेरे पर इल्जाम लाणे वाले खड़े होये, तां तिन्हा ने इदेय गलत गल्लां रा इल्जाम नी लाया, जदेया मैं समजदा थिया

¹⁹पर से मणू अपणे ही मत ते कुसकी होर यीशु नां रे मणू रे बारे बिच बैह्स करेया करदे थिये जे मरी गेया थिया, ते पौलुस पर ए इल्जाम लाया करदे थिये से ए बोलदा कि यीशु फिरी जिन्दा होई गे रा है।

²⁰किजोकी मैं उलझन बिच थिया कि इन्हा गल्लां रा पता किय्यां लां? इधेरे तांइ मैं पौलुस का पूच्छेया, के तैं यरुशलेम जो जाणा कि तित्ते जाई करी तेरी इन्हा गल्लां रा फैसला होई सको?

²¹पर जां पौलुस ने बिनती कित्ती कि तिसेरे मुकद्दमे रा फैसला सम्राट का होये, तां मैं हुकम दित्तेया कि जां तांइ तिसजो सम्राट का नी भेज्जां, तिसजो कैद अन्दर रख्खेया जाओ

²²तां अग्रिप्पा ने फेस्तुस जो बोल्लेया, मैं भी तिस मणू री सुनणा चाह्‍ंदा तिनिए बोल्लेया, तैं कल्ल सुणी लैणा

²³ते दूए रोज्जे जां अग्रिप्पा ते बिरनीके बड़ी धूम-धाम कने आये ते पलटन रे सरदारां ते सहर रे खास मणूआं कने दरबार अन्दर पूज्जे तां फेस्तुस ने हुकम दित्ता कि से पौलुस जो लेई आण

²⁴फेस्तुस ने बोल्लेया, ओ राजा अग्रिप्पा, ते सब मणू जे इत्ते असा कने हिन, तुसा इस मणू जो दिखदे, जिसेरे बारे बिच सारे यहूदियां ने यरुशलेम बिच ते इत्ते भी लेरां मारी-मारी करी मेरे का बिनती कित्ती, कि इसेरा जिन्दा रैह्णा सही नी

²⁵पर मेरे जो पता लग्गी गेया कि इनिए इदेया किच्‍छ भी नी कित्ते रा है कि इसजो मारी रख्खेया जाओ अते हालांकि इनिए अप्पु ही सम्राट का अपणा न्याय करणे री बिनती कित्ती, तां मैं इसजो रोम सहर जो भेजणे रा फैसला लित्तेया।

²⁶मैं इसेरे बारे अन्दर कोई पक्की गल्ल नी दिख्खी कि अपणे सम्राट जो लिख्खां इधेरे तांइ मैं इसजो तुसा रे सामणे ते खास कर राजा अग्रिप्पा, तुसा रे सामणे लेई आया ताकि परखणे का बाद मेरे जो किच्‍छ लिखणे जो मिली जाओ।

²⁷कुसकी कैदी जो तिसेरी गलती दस्से बगैर तिसजो रोम भेजणा मेरे जो बेमतलब लगदा।