Read Chambeali प्रेरितां रे कम्म 27 Bible Online

प्रेरितां रे कम्म 27 - Chambeali bible

प्रेरितां रे कम्म 27

¹जां फेस्तुस राज्यपाल रे पास्से का ए गल्ल पक्की होई गयी कि असा जहाज पर ईतालिया प्रदेश जाणा, तां तिन्हा ने पौलुस अते थोड़े होरणी कैदियां जो भी यूलियुस नां री औगुस्तुस सम्राट री पलटन रे इक्क हाकिम रे हत्था देई दित्तेया।

²अद्रमुत्तियुम सहर रे इक्क जहाज पर जे एशिया प्रदेश रे कनारे री जगाह् पर जाणे वाला थिया, जहाज पर चढ़ी करी असी तित्ते का निकली गे, ते अरिस्तर्खुस नां रा इक्क थिस्सलुनीके सहर रा इक्क मणू मकिदुनिया प्रदेश असा कने थिया।

³दूए रोज्जे असा सैदा कस्बे बिच पूजी करी तित्ते रुके, ते यूलियुस ने पौलुस पर रहम करी के तिसजो मित्रां का जाणा दित्तेया कि तिसेरी आदर-खातर होई सको।

⁴तित्ते का जहाज पर चढ़ी करी अपणा सफर फिरी सुरु कित्तेया ते ब्यार कने रुकावट होणे री वजह कने असी साइप्रस टापू री आड़ अन्दर चले।

⁵ते किलिकिया ते पंफूलिया सहरां रे समुन्द्र रे किनारे का होई करी लूसिया प्रदेश रे मूरा सहर अन्दर उतरे।

⁶तित्ते हाकिम जो सिकन्दरिया सहर रा इक्क जहाज ईतालिया प्रदेश जो जांदा मिल्लेया, ते तिनिए असा जो तिस पर चढ़ाई लित्तेया।

⁷जां असी मते रोज्जा तांइ मठ्ठे-मठ्ठे चली करी बड़ी मुस्कला कने कनिदुस कस्बे रे सामणे पूज्जे, तां इधेरे तांइ कि ब्यार असा जो अग्गे बधणा नी देया करदी थी, असी सलमोन रे सामणे का होई करी क्रेते टापू री आड़ अन्दर चले।

⁸ते तिसेरे कनारे-कनारे बड़ी मुस्कला कने चली करी सुब लंगरबारी नां री इक्क जगाह् पूज्जे, जित्ते का लसया सहर नेड़े थिया।

⁹किजोकी तौबा करणे रा पर्व अवे मुकी गे रा है ते तिस मौसम बिच समुन्द्र बिच तूफान बधी जांदे, इधेरे तांइ पौलुस ने तिन्हा जो बोल्लेया,

¹⁰ओ सज्जन मणूओ, मेरे जो इय्यां लग्गेया करदा है कि इस सफर अन्दर मुस्किल अते मता सारा नुक्सान होणे वाला है, जे कि सिर्फ माल ते जहाज रा ही नी होणा, पर असा री जान रा भी होणे वाला है

¹¹पर हाकिम ने पौलुस री गल्लां का कप्तान ते जहाज रे मालक री गल्लां जो जादा बधी करी मन्नेया

¹²से सुब लंगरबारी ना रा बन्दरगाह सरदियां कटणे जोग्गा नी थिया, इधेरे तांइ मते जणेया ने सोच्चेया कि तित्ते का जहाज पर चढ़ी करी होई करी अगर कुसकी तरिक्के कने होई सके तां फिनिक्स बंदरगाह पूजी करी सरदियां कट्टी जाण। ए तां क्रेते टापू रा इक्क बन्दरगाह् है जे दक्षिण-पश्चम ते उत्तर-पश्चम रे पास्से का खुले रा है।

¹³जिस बेल्ले थोड़ी-थोड़ी ब्यार चलणा लग्गी, तां ए समजी करी कि असा रा मकसद पूरा करणे तांइ सही समय है तिन्हा ने जहाज रा लंगर चुक्केया ते कनारा पकड़ी करी क्रेते टापू रे नेड़े का जाणा लगे।

¹⁴पर थोड़ी देर अन्दर जमीन पास्से का इक्क बड्डी आंधी आई, जिस जो यूरकुलीन भी बोलदे।

¹⁵जां से आंधी जहाज पर लग्गी तां से तिस हवा रे सामणे टिकी नी सकेया, इधेरे तांइ असा ने जहाज जो हवा रे बहाव रुड़णा दित्तेया ते इय्यां ही हवा रे बहाव बही करी चली गे।

¹⁶तां कौदा नां रे इक्क छोटे जणे टापू री आड़ अन्दर रुड़दे-रुड़दे असी मुस्किल कने डोंगी जो वस अन्दर अणी सके।

¹⁷फिरी जहाज चलाणे वालेयां ने तिसजो चुक्की करी मते तरिक्के लाई करी जहाज जो उप्पर का लेई करी थल्ले तिकर बन्नेया, ते सुरतिस रे खाड़ी रे बंदरगाह पर फसी जाणे रे डरा कने पाल ते समान उतारी दित्ता ते जहाज रा लंगर भी थल्ले उतारी दित्ता ते हवा रे बहाव बिच रुड़दे चली गे।

¹⁸जां असा हवा कने मते सारे हिचकोले अते धक्के खाए, तां दूए रोज्जे से जहाज रा माल सुटणा लगे

¹⁹अते त्रिये रोज्जे तिन्हा ने अपणे हत्थां कने जहाज रा समान भी सूटी दित्तेया।

²⁰जां मते रोज्जा तांइ ना सूरज, ना तारे लिब्बे ते बड़ी हवा चलदी रेई, तां आखर अन्दर असा रे बचणे री सारी आस भी मुकी गई।

²¹जां से मते रोज्जा तांइ भूख्खे रे, तां पौलुस ने तिन्हेरे बिच खड़े होई करी बोल्लेया, ओ मणूओ, इय्यां करणा चाएदा थिया कि तुसा मेरी गल्ल मन्नी करी क्रेते टापू का जहाज नी चलांदे, ते फिरी नां ए मुस्किल आणी थी ते नां ए नुक्सान सैह्‍णा पैणा थिया।

²²पर अवे मैं तुसा जो समझान्दा कि हिम्मत रखो, किजोकी तुसा बिच का कुसकी री भी जान नी जाणी, पर सिर्फ जहाज रा नुक्सान होई जाणा

²³किजोकी परमेश्वर जिन्हेरा मैं है, ते जिन्हेरी भक्ति करदा, तिन्हेरे स्वर्गदूत ने पिछली रात्ती मेरे का आई के बोल्लेया,

²⁴ओ पौलुस, डर मत! तिज्जो सम्राट रे सामणे खड़े होणा ही पैणा, परमेश्वर ने सबणी जो, जे तेरे कने सफर करेया करदे हिन, बचाए रा है।

²⁵इधेरे तांइ, ओ सज्जन मणूओ, हिम्मत रखो किजोकी मैं परमेश्वर रा विश्वास करदा, कि जदेया मेरे कने बोल्लेया गे रा है, तदेया ही होणा।

²⁶पर असा जो कुसकी टापू पर जाई करी टिकणा पैणा।

²⁷जां चौह्दवीं रात आई, ते असी अद्रिया समुन्दर अन्दर भटकदे फिरेया करदे थिये, तां अद्दी रात्ती जो जहाज चलाणे वालेयां ने अंदाजा लाई करी पता लगाया कि कुसकी देस रे नेड़े पूज्जेया करदे हिन।

²⁸पाणी री गहराई नाप्पी करी ते तिन्हा जो सैंती मीटर[27] डुग्गा मिल्लेया, ते थोड़े अग्गे बद्धी करी फिरी पाणी री गहराई तां सताई मीटर[28] थिया।

²⁹तां पथरील्ली जगाह् कने टक्कर होणे रे डर कने तिन्हा ने जहाज री पिछाड़ी चार लंगर पाए, ते भ्याग होणे री भाल्ला बेई रेय।

³⁰पर जे जहाज चलाणे वाले का नह्सणा चाह्‍ंदे थिये, ते जहाज रे सामणे वाले हिस्से का लंगर पाणे रे बहान्ने डोंगी जो समुन्दर अन्दर उतारी दित्ता।

³¹तां पौलुस ने हाकिम ते सैनिकां जो बोल्लेया, अगर ए मणू जहाज पर नी रैह्न्गे, तां तुसा भी नी बची सकणा

³²तां सैनिकां ने रस्से कटी करी डोंगी सूटी दित्ती।

³³जिस बेल्ले भ्याग होणे वाली थी, तां पौलुस ने ए बोल्ली करी, सबणी जो रोट्टी खाणे तांइ बिनती कित्ती, अज्ज चौदह रोज होई गे कि तुसा फिकर करी-करी के भूख्खे रे, ते किच्‍छ भी नी खाया।

³⁴इधेरे तांइ तुसा जो समजाया करदा है कि किच्‍छ खाई लेयो, जिस कने तुसा रा बचाव होई सको किजोकी तुसा बिच का कुसकी रे सरे रा इक्क भी बाल नी पैणा

³⁵ए बोल्ली करी तिनिए रोट्टी लेई करी सबणा रे सामणे परमेश्वर रा धन्नवाद कित्तेया ते रोट्टी भन्नी करी खाणा लग्गेया।

³⁶तां से सब जणे भी हिम्मत करी कने रोट्टी खाणा लगे।

³⁷असी सारे जणे मिली करी जहाज पर दो सौ छिहत्तर मणू थिये।

³⁸जां से रोट्टी खाई करी रज्जी गे, तां कणक जो समुन्दर अन्दर सूटी करी जहाज जो पोला करणा लगे

³⁹जिस बेल्ले भ्याग होई तां तिन्हा ने तिस देस जो नी पछाणेया, पर इक्क खाली जगाह् दिख्खी, जिसेरा कनारा चौरस थिया, ते सोच्चेया कि अगर होई सको तां इस पर ही जहाज जो टिकाई दैण।

⁴⁰तां तिन्हा ने लंगरां जो ढिल्ला करी के समुन्दर अन्दर छड्डी दित्तेया ते तिस्सी बेल्ले पतवारां रे बन्धन ढिल्ले करी दित्ते, ते ब्यार रे सामणे अगला पाल चढ़ाई करी कनारे पास्से चले।

⁴¹पर दो समुन्दरां रे मिलणे री जगाह् पर तिन्हा ने जहाज जो टिकाया, ते जहाज रा अगला हिस्सा धक्का खाई करी टिकी गेया ते टली नी सकी पर पीच्छे पास्से री छलारां रे जोर कने टूटणा लग्गी।

⁴²तां सपाईयां जो ए सोच आई कि कैदियां जो मारी रखदे, इय्यां ना हो कि कोई तैह्री करी नह्सी जाओ

⁴³पर हाकिम ने पौलुस जो बचाणे री मरजी कने तिन्हा जो रोकणे तांइ ए बोल्लेया कि, जे तैह्री सकदे, से पैल्ले छाल मारी करी कनारे जो चली जाण

⁴⁴ते बाकि कोई पटरेयाँ पर, ते कोई जहाज री होरणी चीजां रे सहारे निकली जाण, इस तरिक्के कने सब जणे बची करी जमीन पर पूजी गे।