Read Chambeali प्रेरितां रे कम्म 3 Bible Online

प्रेरितां रे कम्म 3 - Chambeali bible

प्रेरितां रे कम्म 3

¹पतरस ते यूहन्ना त्रै बजे[8] री प्रार्थना रे बेल्ले मन्दिर जो जाया करदे थिये।

²ते मणू इक्क पैदाइसी लट्टे मणू जो यरुशलेम मन्दिर रे “सुन्दर” कहलाए जाणे वाले दुआर पर भीख मंगणे तांइ लेई आंदे थिये ताकि से मन्दिर बिच आणे वाले लोक्कां का भीख मंगी सके।

³जां तिन्निए पतरस ते यूहन्ना जो मन्दिर बिच जादें दिख्खेया, तां तिन्हेरे का भीख मगीं।

⁴पतरस ते यूहन्ना कने तिसेरे पास्से ध्यान कने दिख्खी करी बोल्लेया, हमारे पास्से दिख्ख।

⁵अते से तिन्हेरे का किच्‍छ पाणे री उम्मीद रख्खी करी तिन्हेरे पास्से दिखणा लग्गेया,

⁶तां पतरस ने बोल्लेया, : चाँदी ते सोन्ना तां मेरे का नी है, पर जे मेरे का है से तेरे जो दिंदा, नासरत रे यीशु मसीह रे नां कने उठ, ते चल-फिर।

⁷ते पतरस ने तिसेरा सीद्दा हत्थ पकड़ी करी तिसजो चुक्केया, ते तिस्सी बेल्ले तिसेरे पैरां ते गोड्डेयां बिच जोर आई गेया

⁸से उटकी करी खड़ी गेया ते चलणे-फिरणे लग्गी पेया ते चलदा ते उटकदा, ते परमेश्वर री महिमा करदा होया तिन्हेरे कने मन्दिर रे अंगण बिच गेया।

⁹सारे लोक्कां ने तिसजो चलदे-फिरदे ते परमेश्वर री महिमा करदे दिख्खी करी,

¹⁰तिसजो पछाणी लित्तेया कि ए तां से ही लट्टा भिखारी है जे मन्दिर रे सुन्दर दुआर का बेई करी भीख मंगदा थिया। ते तिस गल्ल कने जे तिस कने होई थी से बड़े हैरान होए।

¹¹जां तिन्निए पतरस ते यूहन्ना जो पकड़े रा थिया, तां सारे मणू बड़े हैरान हुदें होए तिस बरांडे बिच जे सुलैमान रा केहलादां, तिन्हेरे का दौड़ी करी आए।

¹²ए दिख्खी करी पतरस ने लोक्कां जो बोल्लेया, ओ इस्राएलियों, तुसा इस मणू पर हैरान किजो होया करदे हिन, ते असा पास्से इय्यां किजो दिख्खेया करदे हिन कि मन्नों असा ही ने अपणी ताकत या भक्ति कने इसजो चलणे-फिरणे जोग्गा बणाई दित्ता।

¹³अब्राहम ते इसहाक ते याकूब रे परमेश्वर, हमारे पूरखां रे परमेश्वर ने अपणे सेवक यीशु री महिमा कित्ती, जिन्हेरे जो तुसा यहूदी अधिकारियां रे हत्थां पकड़वाई दित्ता, ते जां पिलातुस ने तिन्हेरे जो छड्डी दैणे रा फैसला कित्ता, तां तुसा तिसेरे सामणे तिन्हेरा इन्कार कित्ता।

¹⁴तुसा यीशु जो जे पवित्र ते धार्मिक मणू थिये नक्कारी दित्ता, ते बिनती कित्ती कि इक्क हथयारे जो तुसा वास्ते छड्डी दित्ता जाए।

¹⁵ते तुसा ने हमेसा री जिन्दगी रे राजकुमार जो मारी रख्खेया, जिस जो परमेश्वर ने मुर्देयां बिच का जिन्दा कित्ता ते इस गल्ल रे असी गवाह हिन, ते तिन्निए तिसरा सीद्दा हत्थ पकड़ी करी तिसजो चुक्केया ते तिस्सी बेल्ले तिसेरे पैरां ते गोड्डेयां बिच जोर आई गेया।

¹⁶“यीशु रे नां बिच विश्वास करणे री वजह कने ए मणू चंगा होया, ते तुसा जाणदे कि ए मणू कदेया लट्टा थिया, पर यीशु बिच विश्वास करणे री वजह कने ए तुसा री हाख्खियां सामणे बिल्कुल ठीक होई गेया।”

¹⁷अवे ओ भाईयों, मैं जाणदा कि ए कम्म तुसा नासमझी बिच कित्ता, ते तिय्यां ही तुसा रे सरदारां ने भी कित्तेया,

¹⁸पर जिन्हा गल्लां जो परमेश्वर ने सारे भविष्यद्वक्ता रे जरिए पैल्ले ही दस्सी दित्ते रा थिया, कि तिन्हेरे मसीह ने दुख झेलणा ते मारे जाणे, तिन्हा गल्लां जो मसीह ने इस तरिक्के कने पूरा कित्ता।

¹⁹इस तांइ, तौबा करो ते परमेश्वर रे पास्से हटी आओ की तुसा रे पाप मिटाए जाण, जिस कने तुसा जो परमेश्वर रे पास्से का सुख-चैन रे दिन मिलण,

²⁰ते से यीशु जो भेज्जे जे तुसा वास्ते पैह्ल्ले ही का मसीह ठहराए गेरे हिन।

²¹जरुरी है कि से स्वर्ग बिच तिस बेल्ले रैह्ण जां तिकर की से सारी चीजां जो दुबारा नौआ ना बणाई लये, जिस गल्ल रा वादा परमेश्वर ने अपणे पवित्र भविष्यद्वक्ताओं कने बड़े पैल्ले कित्ता थिया।

²²जिय्यां कि मूसा ने बोल्लेया, प्रभु परमेश्वर तुसा रे भाईयां बिच का तुसा वास्ते मेरे सांई इक्क भविष्यद्वक्ता जो भेजणा, जे किच्‍छ से तुसा जो बोल्ले, तिसजो मन्नेयो,

²³पर हर इक्क मणू जे तिस भविष्यद्वक्ता री ना सुणे, लोक्का बिच का नास कित्ता जाणा

²⁴ते शमूएल का लेई करी तिसेरे बाद वालेयां तिकर जिन्ने भविष्यद्वक्ता बोल्ले तिन्हा सारेयां ने इन्हा दिनां रा पैगाम दित्ते रा है

²⁵तुसा सारे भविष्यद्वक्ता री औलादां ते तिस वादे रे हिस्सेदार हो, जे परमेश्वर ने तुसा रे पूरखां कने कित्ता, जां तिन्हा ने अब्राहम कने बोल्लेया, तेरे ‍खानदान रे वजह कने दुनिया रे सारे घरां जो आशीष मिलणी।

²⁶परमेश्वर ने अपणे सेवक जो मरे रे लोक्कां बिच का जिन्दा करी के पैल्ले तुसा का भेज्जेया, कि तुसा बिच का हर इक्क जो तिन्हेरी बुराईयां का हटाई करी तिन्हेरे पास्से लेई आए ते आशीष दे।