Read Chambeali रोमियों 12 Bible Online

रोमियों 12 - Chambeali bible

रोमियों 12

¹इधेरे तांइ ओ संगी विश्वासियों, मैं तुसा जो परमेश्वर रे दया जो याद दुआई करी तुसा का छन्दे करदा, कि अप्पु जो जिन्दा, ते पवित्र अते परमेश्वर जो भाणे वाले कुर्बानी रे रुप बिच चढ़ाओ। परमेश्वर री सेवा करणे रा ए ही सही तरिक्का है।

²इस दुनिया रे लोक्कां सांई मत बणो, पर तुसा रे मन रे बदली जाणे री वजह कने तुसा रा चाल-चलन भी बदलदा रे, जिस कने तुसा परमेश्वर री भली, ते ठीक लगणे वाली, ते सिद्ध इच्छा जो तजुरबे कने जाणदे रेयो।

³किजोकी जे अनुग्रह मेरे जो मिल्ले रे तिस अनुग्रह री वजह कने मैं तुसा बिच का हर इक्क जो बोलदा कि जिन्ना अप्पु जो समझणा चाएदा, अप्पु जो कोई तिसका जादा ना समजे पर जिय्यां परमेश्वर ने हर इक्क जणे जो दित्ते रा तिस विश्वास रे नाप रे हिसाब कने, ठीक समझ कने अप्पु जो तिन्ना ही समजे।

⁴किजोकी जिय्यां असा रे इक्क जिस्म रे मते सारे अंग हिन, ते तिन्हा सबणी अगां रा इक्क जदेया कम्म नी हुंदा,

⁵तिय्यां ही असी विश्वासी मणू मिली करी मसीह यीशु रे जिस्म रा हिस्सा बणी गेरे हिन, ते असी आपस बिच इक्क-दूए कने जुड़े रे हिन।

⁶हालांकि असा जो परमेश्वर का मिल्ले रे तिस अनुग्रह रे हिसाब कने, बखरे-बखरे वरदान मिल्ले रे हिन। तां जिस जो भविष्यवाणी करणे रा वरदान मिल्ले रा हो, तिसजो पूरे भरोस्से कने से भविष्यवाणी करणा चाएदी जे गल्लां परमेश्वर ने तिसजो दस्से री हिन।

⁷अगर कुसकी जो लोक्कां री सेवा करणे रा वरदान मिल्ले रा हो, तां सेवा करणे बिच लग्गी रेयो। जे अगर कुसकी जो शिक्षा दैणे रा वरदान हो, तां से शिक्षा दैणे बिच लग्गी रेयो।

⁸जे अगर कुसकी जो लोक्कां प्रोत्साहित करणे रा वरदान मिल्ले रा हो, तां से लोक्कां जो प्रोत्साहित करणे बिच लग्गी रेयो। जिस जो दान दैणे रा वरदान मिल्ले रा हो, ता से खुले मन कने दान दे। जिस जो लोक्कां री अगुवाई करणे रा वरदान मिल्ले रा हो, से पूरी मैहनत कने लोक्कां री अगुवाई करे। जिस जो दया करणे रा वरदान मिल्ले रा हो, से खुसी कने करेया करे।

⁹प्यार करणे बिच कदी कोई दिखावा ना हो, पर दिल कने प्यार करेया करो। बुराई कने नफरत रख्खो। भले कम्म करणे बिच लग्गी रेयो।

¹⁰भाईचारे रे प्यार कने इक्क-दूज्जे कने लगाव रख्खो। अप्पु-मिते इक्क दूए री इज्जत दैणे बिच इक्क-दूज्जे का बदधे चलो।

¹¹मैहनत करेया करो ते आलसी मत बणो। आत्मिक जोस कने भरित्ते रे रेयो। पूरे दिल कने प्रभु री सेवा करदे रेयो।

¹²जे परमेश्वर ने असा तांइ करणा तिस आस बिच खुस रेयो, मुसीबतां बिच सबर रख्खो, प्रार्थना बिच लगातार लग्गी रेयो।

¹³पवित्र मणूआं तांइ जे किच्‍छ भी जरुरी हो, तिस अन्दर तिन्हेरी मदद करो। अजनबी लोक्कां री[8]खातिर दारी करणे बिच लग्गी रेयो।

¹⁴जे तुसा पर जुल्म करदे तिन्हा जो श्राप नी पर सिर्फ आशीष ही देयो।

¹⁵खुसियां मनाणे वालेयां कने खुसी मनाओ, ते रोणे वालेयां कने रोओ।

¹⁶हर इक्क मणू कने इक्क जदेया ही बर्ताव करो, ते घमंड मत करो, पर आम लोक्कां कने संगत रख्खो, अप्पु जो जादा ही समजदार मत समझो।

¹⁷बुराई रे बदले कुसकी कने बुराई मत करो, जे गल्लां सबणी मणूआं तांइ भली हो, तिन्हेरा ध्यान रख्खेया करो।

¹⁸जित्ते तांइ होई सको, तुसा सारे लोक्कां कने मेल-मिलाप रख्खो

¹⁹ओ प्यारे लोक्कों, अप्पु कदी बदला मत लिन्दे, पर परमेश्वर जो तुसा तांइ बदला लैणे देयो, किजोकी पवित्रशास्त्र बिच परमेश्वर ने बोल्ले रा है, “बदला लैणा मेरा कम्म है; मैं ही बदला लैणा।”

²⁰पर जिय्यां पवित्रशास्त्र बिच इय्यां भी लिख्खे रा है, “जे अगर तेरा दुश्मण भूख्खा हो, तां तिसजो रोट्टी खुआ, जे अगर तिसजो त्रेह लग्गे री हो, तां तिसजो पाणी पिआ, किजोकी इय्यां करणे कने तू तिसजो शर्मसार करी दैणा।”

²¹बुराई का मत हारो, पर भलाई कने बुराई जो जीत्ती लियो।