Read Chambeali रोमियों 13 Bible Online

रोमियों 13 - Chambeali bible

रोमियों 13

¹हर इक्क मणू अपणे शासन करणे वाले अधिकारियां रे अधीन रेयो, किजोकी हर इक्क हक परमेश्वर रे पास्से का हुंदा, ते से सारे हक परमेश्वर ने ठैहराए रे हिन।

²इधेरे तांइ जे अगर कोई मणू अपणे अधिकारियां रे शासन रे अधीन रैह्णे का मना करदा, तां से मणू परमेश्वर री विधि रा विरोध करदा, ते विरोध करणे वाले लोक्कां जो सजा मिलणी।

³किजोकी जे अगर कोई मणू खरा कम्म करेया करदा हो, तां तिज्जो अपणे अधिकारी का डरणे री जरुरत नी है। पर जे अगर कोई मणू गलत कम्म करेया करदा हो तां तिसजो अपणे अधिकारी का डरणे री जरुरत है। इधेरे तांइ ठीक कम्म कर तां तुसा रे अधिकारियां ने तुसा री तारिफ करणी।

⁴किजोकी अधिकारी मणू तुसा री मदद करणे तांइ परमेश्वर रे दास हिन, पर जे अगर तू गलत कम्म करे, तां तिन्हा का डरो। किजोकी से परमेश्वर रे दास हिन ते तिन्हा का परमेश्वर रे पास्से का तिन्हा लोक्कां पर सजा रे हुकम सुनाणे रा हक है, जे गलत कम्म करदे।

⁵इधेरे तांइ ना सिर्फ सजा का बचणे तांइ, पर अपणे विवेक जो साफ रखणे तांइ भी तुसा जो तिन्हेरे अधीन रैह्णा चाएदा।

⁶इधेरे तांइ चुंगी भी देया करो, किजोकी शासन करणे वाले परमेश्वर रे दास हिन ते हमेसा अपणी जिम्मदारियां जो निभाणे बिच लगे रैह्‍न्दे।

⁷इधेरे तांइ तुसा जो तिन्हा अधिकारियां जो से सारी चीजां दैणा चाएदी जे तिन्हेरा हक है। तुसा जो हर तरिक्के री चुंगी, आदर-सम्मान दैणा चाएदा।

⁸प्यार जो छड्डी करी होर कुसकी चीज बिच कुसकी रे कर्जदार मत बणो। किजोकी जे दूज्जे कने प्यार रखदा, तिनिये मूसा रे कानून रे तिन्हा सारे हुकमां जो मन्नी लेया, जे परमेश्वर ने दित्ते री हिन।

⁹किजोकी मूसा रे कानून बिच इदेय मते सारे हुकम हिन, जिय्यां, “व्याभिचार नी करणा, खून नी करणा, चोरी नी करणी, लालच नी करणा, ते इन्हा हुकमां रे अलावा इन्हा सारे हुकमां रा निचोड़ इस हुकम बिच है, अपणे पड़ोसी कने अप्पु बराबर प्यार रख।”

¹⁰प्यार पड़ोसी री कोई बुराई नी करदा, इधेरे तांइ जे अगर असी प्यार करदे तां असी मूसा रे कानूनां जो पूरा करदे।

¹¹तुसा बिच का हर इक्क जणे जो इक्क दूए कने प्यार करदे रैह्णा चाएदा, किजोकी से समय आई गे रा है जां परमेश्वर ने असा जो इस दुष्ट दुनिया का बचाई लैणा। असा रे मसीह बिच विश्वास करणे रे तिस बेल्ले का अवे ए छुटकारे रा समय अवे होर भी तौले पुजणे वाला, असा जो इस गल्ल जो समजी करी असा जो चुकन्ने ते होशियार रैह्णा जरुरी है।

¹²असा रा इस बुरी दुनिया बिच रैह्णे रा समय तिय्यां ही मुकणे वाला है जिय्यां कि रात मुकणे वाली हुंदी। मसीह यीशु रे हटणे रे समय बड़ा नेड़े है। इधेरे तांइ असा जो न्याहरे रे कम्मां जदेय तिन्हा बुरे कम्म करणा छड्डी दैणे चाएदे, जे कम्म इस दुनिया रे मणू करदे, ते असा जो रौसनी रे ठीक कम्मां जदेय हथियार बन्नी लैणे चाएदे।

¹³असा जो रौसनी बिच रैह्णे वाले लोक्कां सांई अपणे चालचलन जो खरा बणाई करी रखणा चाएदा। पर न्याहरे बिच रैह्णे वाले लोक्कां सांई मतवाल्ले, पियक्कड़, रंगरेलियां, व्यभिचारी करणे वाले, अश्लील, झगड़े करणे वाले ते हिर्स करणे वाले ना बणे।

¹⁴बल्कि प्रभु यीशु मसीह जो इक्क कवच सांई पाई लेयो, ते अपणी पाप रे स्वभाव कने जिन्दगी मत जियो।