Read Chambeali रोमियों 16 Bible Online

रोमियों 16 - Chambeali bible

रोमियों 16

¹मैं चाह्‍ंदा कि तुसा किंख्रिया सहर री कलीसिया री सेविका, फिबे भैण री इज्जत करो।

²तुसा पवित्र मणूआं जो तिसेरा प्रभु रे मणू रे रुप बिच तिसेरा स्वागत करणा चाएदा। ते जिस गल अन्दर तिसजो तुसा का कोई मदद री जरुरत हो, ता तिस गल्ल अन्दर तिसेरी मदद करो। किजोकी से मते लोक्कां पर, बल्कि मेरे पर भी मते उपकार कित्ते रे हिन।

³प्रिस्किल्ला भैण, ते तिन्हेरे लाड़े अक्विला भ्याल जो मेरा नमस्कार, जे प्रभु यीशु री सेवा करणे बिच मेरे कने कम्म करणे वाले मणू हिन।

⁴तिन्हा ने मेरी जान तिकर अपणा जान दाव पर लाई रख्खे री है, ते सिर्फ मैं ही नी, पर गैर यहूदियां री कलीसियां भी तिन्हा रा शुक्रिया करदी।

⁵उन्हा कलीसिया जो भी मेरा नमस्ते जे तिन्हेरे घर बिच संगती करदे। मेरे प्यारे इपैनितुस जो मेरा नमस्कार, जे एशिया प्रदेश बिच सबका पैल्ले मसीह यीशु बिच विश्वास करणे वाला मणू है।

⁶मरियम जो मेरा नमस्कार, जिन्हा ने तुसा तांइ बड़ी वरी मैहनत कित्ती।

⁷भ्याल अन्द्रुनीकुस ते भैण उनियास जो मेरा नमस्कार, जे मेरे यहूदी संगी विश्वासी हिन, ते मेरे कने कैद भी होए थिये, ते प्रेरित मणू तिन्हेरी बड़ी इज्जत करदे। तिन्हा ने मेरे का पैल्ले ही मसीह यीशु बिच विश्वास कित्ता थिया।

⁸अम्पलियातुस जो मेरा नमस्कार, जे मसीह यीशु बिच मिंजो बड़ा प्यारा है।

⁹उरबानुस जो मेरा नमस्कार, जे मसीह यीशु री सेवा करणे बिच असा रा साथी है, ते प्यारे इस्तखुस जो भी मेरा नमस्कार!

¹⁰अपिल्लेस जो मेरा नमस्कार, जिनिये ए साबित कित्तेया कि से मसीह यीशु तांइ किन्ना जादा विश्वासयोग्य है। अरिस्तुबुलुस ते तिसेरे टब्बर जो भी मेरा नमस्कार!

¹¹मेरे संगी यहूदी हेरोदियोन जो मेरा नमस्कार। नरकिस्सुस रे टब्बर जो भी मेरा नमस्कार, जे प्रभु यीशु मसीह बिच विश्वास करदे।

¹²असा री विश्वासी बहणा, त्रूफैना कने त्रुफोसा जो भी मेरा नमस्कार, जे प्रभु री सेवा तांइ बड़ी मैहनत करदी। प्यारी भैण पिरसिस जो भी मेरा नमस्कार, जिनिए प्रभु तांइ बड़ी जादा मैहनत कित्ते री है।

¹³रुफुस जो भी मेरा नमस्ते जिस जो परमेश्वर ने अपणी खास सेवा तांइ चुणी लित्ते रा है। ते तिसेरी मां जो भी मेरा नमस्कार, जे मेरी भी मां सांई हिन।

¹⁴असुंक्रितुस, फिलगोन, हर्मास, पुत्तरबास, हिर्मेस ते तिन्हा कने बाकि सारे संगी विश्वासियां जो भी मेरा नमस्कार।

¹⁵फिलुलुगुस, युलिया, नेर्युस, ते तिसेरी भैण, ते उलुम्पास, ते सारे संगी विश्वासियां जो मेरा नमस्कार!

¹⁶मसीही प्यार कने इक्क दूए जो नमस्ते करो। मसीह री सारी कलीसियां रा तुसा जो नमस्कार!

¹⁷अवे ओ संगी विश्वासियों, मैं तुसा रे छंदे करी के बोलदा, कि तुसा तिन्हा लोक्कां का अलग होई जाओ, जे दूज्जेयां रे विश्वास जो कमजोर करदे, अते तिन्हा लोक्कां भी दुर रेयो जे असा री सिखाए री गल्लां री ना-फरमानी करी के कलीसिया बिच मुसीबतां ते फूट पांदा।

¹⁸किजोकी ऐसे मणू प्रभु मसीह यीशु री सेवा अपणे मतलब तांइ करदे, से अपणे मतलब जो पूरा करणे तांइ मिठ्ठी-मिठ्ठी गल्लां बोल्ली करी, भोले भाले लोक्कां जो धोखा दिंदे।

¹⁹हर कोई जाणदा कि तुसा प्रभु रे बड़े आज्ञाकारी हिन: ते इस कने मेरे जो बड़ी वरी खुसी हुंदी। मैं चाह्‍ंदा कि तुसा भलाई रे कम्म करणे बिच ता समजदार बणो, पर बुरे कम्म तांइ भोले बणो।

²⁰सांती रा परमेश्वर ने बड़े तौले ही शैतान री ताकत जो मुकाई दैणा ते तिसजो तुसा रे पैरा हेठ करी दैणा, असा रे प्रभु यीशु मसीह री अनुग्रह तुसा पर हुंदी रैह्णी।

²¹मसीह री सेवा करणे बिच मेरे साथी तीमुथियुस, ते मेरे संगी यहूदी लूकियुस, ते यासोन, ते सोसिपत्तरुस, रे पास्से का तुसा जो नमस्कार!

²²मुझ तिरतियुस रे पास्से का तुसा जो प्रभु बिच नमस्कार, जे पौलुस री इस चीठ्ठी जो लिखणे बिच मदद करेया करदा है।

²³गयुस रे पास्से का भी तुसा जो नमस्कार। अब्बे मैं तिसेरे घरे ही रेया करदा है, जित्ते कलीसिया संगती करणे तांइ कठिंदी। इरास्तुस रे पास्से का भी तुसा जो नमस्कार, जे सहर रा भण्डारी है, ते भ्याल क्वारतुस रे पास्से का भी तुसा जो नमस्कार।

²⁴परमेश्वर करे कि असा रे प्रभु यीशु मसीह रा अनुग्रह तुसा पर बणे रे।

²⁵परमेश्वर जो महिमा मिल्ले जे तुसा रे विश्वास जो तिस सुब बसेख रे हिसाब कने मजबूत करी सकदे जिसेरा मैं प्रचार करदा। मसीह यीशु रे इस सुब बसेख ने तुसा गैर यहूदियां तांइ परमेश्वर री तिस योजना जो ज़ाहिर करी दित्तेया, जे सदियां का लुके री थी।

²⁶ते जिय्यां कि परमेश्वर ने पैल्ले का हुकम दित्तेया, ते भविष्यद्वक्तां ने पवित्रशास्त्र बिच दस्से रा है, ए लुके री गल्ल अवे गैर यहूदियां बिच दस्सी दित्ती गे री है, ताकि से मणू अवे परमेश्वर पर विश्वास करणे वाले ते तिन्हेरे हुकमां जो मनणे वाले मणू बणी जाण।

²⁷तिसी इकलौत्ते ते समजदार परमेश्वर री मसीह यीशु रे जरिये महिमा हुंदी रे। आमीन!