Read Chambeali रोमियों 2 Bible Online

रोमियों 2 - Chambeali bible

रोमियों 2

¹दूज्जेयां पर इल्जाम लाणे वाले लोक्कों, तुसा जे कम्म करदे तिस तांइ तुसा का कोई बहान्ना नी है किजोकी जिस गल्ल बिच तुसा दूज्जे लोक्कां पर इल्जाम लांदे, तिस बिच अप्पु जो गलत ठैहरांदे किजोकी तुसा दूज्जेयां पर जे इल्जाम लांदे, से ही कम्म अप्पु भी करदे।

²असी जाणदे की परमेश्वर धार्मिक तरिक्के कने सारेयां रा हिसाब लिंदे, ते इदेय-इदेय कम्म करणे वालेयां जो परमेश्वर तिन्हा रे कम्मां रे हिसाब कने तिन्हा जो सजा दिंदे।

³ओ इल्जाम लाणे वाले लोक्कों, तुसा जे दुज्जेया पर इल्जाम लांदे ते अप्पु ही से कम्म करदे, तुसा कै ए समजदे कि परमेश्वर ने तुसा जो सजा नी दैणी?

⁴कै तुसा परमेश्वर री भलाई, सहनशीलता, ते सबर करणे रे धन्न जो बेकार समजदे? कै तू ए नी समजदा कि परमेश्वर री भलाई तुसा जो पाप्पां का तौबा करणे जो सिखांदी?

⁵पर किजोकी तुसा ढीठ हिन ते अपणे पाप्पां का तौबा करणे का इन्कार करणे कने तुसा अपणे तांइ बड़ी वरी सजा कठेरेया करदे हिन। किजोकी परमेश्वर रे गुस्सा करणे रा से दिन आया करदा है, जा तिन्हेरा धार्मिक इन्साफ लोक्कां पर ज़ाहिर होणा।

⁶परमेश्वर ने हर इक्क जो तिन्हेरे कम्मां रे हिसाब कने बदला दैणा।

⁷जे ठीक कम्मां बिच टिके रेई करी महिमा, इज्जत ते हमेसा री जिन्दगी री खोज बिच हिन, परमेश्वर ने तिन्हा लोक्कां जो हमेसा री जिन्दगी दैणी।

⁸पर जे मणू मतलबी हिन ते सच्चाई जो नी मनदे, पर बुरे कम्म करणा चाह्‍ंदे, तिन्हा पर परमेश्वर रा गुस्सा ते कहर भड़कणा।

⁹दुख ते मुसीबत बुरे कम्म करणे वाले हर मणू पर पैणे। परमेश्वर ने पैल्ले यहूदी लोक्कां रा हिसाब लैणा ते फिरी गैर यहूदी लोक्कां रा।

¹⁰पर परमेश्वर ने हर इक्क भला कम्म करणे वाले, पैल्ले यहूदी फिरी गैर यहूदी मणू जो महिमा, आदर ते सांती दैणी।

¹¹किजोकी परमेश्वर हर इक्क मणू का इक्क-बराबर हिसाब लिंदे।

¹²इस तांइ जिन्हा गैर यहूदियां ने मूसा रे कानून जो जाणे बगैर पाप कित्ता, परमेश्वर ने तिन्हा जो कानून रे बगैर ही सजा दित्ती जाणी, ते जिन्हा यहूदी लोक्कां ने मूसा रा कानून पाणे रे बाद भी पाप कित्ता, तिन्हेरी सजा कानून रे हिसाब कने होणी।

¹³किजोकी मूसा रे कानून जो सुनणे वाले मणू नी, पर कानून जो मनणे वाले मणू धार्मिक ठैहराए जांदे।

¹⁴फिरी जां गैर यहूदी मणू जिन्हा का मूसा रा कानून नी है, फिरी भी कुदरती ही कानून रे हुकमां री समझ होणे री वजह कने तिन्हा पर चलदे, इस कने से ए साबित करदे कि मूसा रा कानून तिन्हेरे दिल बिच है।

¹⁵किजोकी से मणू अपणे जिन्दगी जीणे रे तरिक्के कने इस गल्ल जो साबित करदे कि कानून रे हुकम, तिन्हेरे दिल बिच लिखित्ते रे हिन। तिन्हेरा विवेक भी इस गल्ल रे बारे बिच गवाई दिंदा। तिन्हेरा विवेक तिन्हा जो कदी सही ते कदी गलत ठेहरांदा रैहन्दा।

¹⁶ए सारा किच्‍छ तिस दिन ज़ाहिर कित्तेया जाणा, जां परमेश्वर ने तिस सुब बसेख रे मुताबिक जिसेरा मैं प्रचार करदा, मसीह यीशु रे जरिये लोक्कां रे लुके री गल्लां रा हिसाब लैणा।

¹⁷जां की तू अप्पु जो यहूदी दसदा, ते मूसा रे कानून पर विश्वास रखदा, ते ए घमंड करदा कि तू परमेश्वर रे खास लोक्कां बिच का है।

¹⁸ते ए जाणदा हो कि परमेश्वर री तेरे तांइ कै इच्छा है, ते जाणदा हो कि कै सही है, किजोकी तिज्जो कानून री शिक्षा दित्ती गे री है, ते खरी-खरी गल्लां जो पसंद करदा हो,

¹⁹ते तिज्जो अपणे पर ए होंसला हो, कि तू तिन्हा लोक्कां जो परमेश्वर रा रस्ता दिखांदा, जे अन्नेयां सांई परमेश्वर रे रस्ते का भटकी गेरे हिन, ते तू न्याहरे बिच पेरे लोक्कां तांइ रौसनी सांई है।

²⁰ते तू ए सोचदा कि तू नासमझ लोक्कां रा शिक्षक, बच्चेयां जो परमेश्वर रा रस्ता सिखाणे वाला है। किजोकी तिज्जो इस गल्ल रा पूरा भरोस्सा है कि मूसा रा कानून तिज्जो हर गल्ल रा ज्ञान ते सच्चाई दिंदे।

²¹इधेरे तांइ जां तू दूज्जेयां जो सिखांदा, तां तू अप्पु जो किजो नी सिखांदा? तू जे चोरी ना करणे जो बोलदा, अप्पु ही चोरी करदा,

²²तू जे बोलदा व्यभिचार मत करदे, अप्पु ही व्यभिचारी करदा, तू जे मूर्तां का नफरत करदा, अप्पु ही मन्दिर जो लुटदा,

²³तू जे अप्पु का परमेश्वर रा कानून होणे बिच घंमड करदा, तिसजो ना मन्नी करी परमेश्वर रा अनादर करदा।

²⁴जिय्यां कि पवित्रशास्त्र बिच लिख्खे रा भी है, “तुसां यहूदियां री वजह कने गैर यहूदी लोक्कां बिच परमेश्वर रे नां री बेजती कित्ती जांदी।”

²⁵जे अगर तू मूसा रे कानून पर चले, तां ता खतने रा फायदा है, पर जे अगर तू कानून जो नी मन्ने, तां तुसा खतना वाले यहूदी लोक, बगैर खतने वाले गैर यहूदियां रे ही बराबर हिन।

²⁶ते जे अगर बिना खतने वाले गैर यहूदी मणू कानून जो मन्ने, तां परमेश्वर ने तिन्हा लोक्कां जो खतना कित्ते रे लोक्कां रे बराबर ही दिखणा।

²⁷हर इक्क मणू ने जिसेरा कदी खतना नी होया हो पर फिरी भी कानून जो मनदा हो, तुसा पर इल्जाम लाणा। हालांकि तुसा रा खतना भी होया ते तुसा का परमेश्वर रा कानून भी है पर तुसा फिरी भी तिसेरा पालण नी करदे।

²⁸इय्यां नी है कि तुसा यहूदी लोक्कां बिच पैदा होए या तुसा रा खतना होए रा है तां तुसा सच्चे यहूदी बणी गे,

²⁹पर सच्चा यहूदी से ही है जिसेरा मन परमेश्वर री नजरां बिच धार्मिक हो। ते सच्चा खतना सिर्फ मूसा रे कानून बिच लिख्खे री गल्लां जो मनणा ही नी है, पर परमेश्वर रे आत्‍मा रे जरिये अपणे दिल रा बदलणा है। इदेय मणू जो मणूआं रे पास्से का नी पर परमेश्वर रे पास्से का प्रशंसा मिलदी।