Read Chambeali रोमियों 3 Bible Online

रोमियों 3 - Chambeali bible

रोमियों 3

¹ते फिरी यहूदी बणने ते खतने कराणे रा कै फायदा?

²हाँ! इसेरे मते फायदे हिन। सबका पैल्ली गल्ल ता ए है कि तिन्हा पर परमेश्वर रे बसेख जो ज़ाहिर कित्ता गेया।

³जे अगर किच्‍छ यहूदी मणू परमेश्वर कने भरोसेमंद ना रे तां कै होया? तिन्हेरे भरोसेमंद ना होणे रे बावजूद भी परमेश्वर ने तिन्हा कने अपणे वादे जो पूरा करणे बिच भरोसेमंद रैह्णा।

⁴हालांकि, हर कोई झूठ्ठा है, पर परमेश्वर हमेसा सच बोलदे। जिय्यां कि पवित्रशास्त्र बिच परमेश्वर रे बारे बिच लिख्खे रा है, “जिस कने तू अपणी गल्लां बिच सही साबित हो, ते लोक्कां रा हिसाब लिंदे बेल्ले तू जीत हासिल करे।”

⁵जे अगर असा रे अधर्मी कम्म परमेश्वर री धार्मिकता जो ज़ाहिर करदे, तां असी कै बोलणा? कै असी ए बोल्ली सकदे कि परमेश्वर असा जो सजा दैणे अंदर गलत हिन? (ए मैं इन्सानी तौर पर बोल्लेया करदा है।)

⁶बिल्कुल भी नी! जे अगर परमेश्वर असी यहूदी लोक्कां रा हिसाब लैणे बिच धार्मिक नी हिन, तां परमेश्वर दुनिया रे लोक्कां रा हिसाब नी लेई सकदे।

⁷पर कोई अगर इय्यां बोल्ले, “जे मेरे झूठ्ठ री वजह कने परमेश्वर री सच्चाई तिन्हेरी महिमा तांइ, बदधी-चढ़ी करी सामणे आंदी, तां फिरी परमेश्वर किय्यां मेरे पर इल्जाम लाई करी पापी सांई सजा रे काबिल ठैहरांदे?”

⁸किच्‍छ मणू असा पर ए इल्जाम लांदे कि असी लोक्कां जो इय्यां सिखांदे, “आओ असी बुराई करदे रैह्ण, ताकि जादा भलाई हो। पर इदेइ इल्जाम लाणे वाले मणू सजा जोग्गे हिन।”

⁹तां फिरी कै असी यहूदी लोक, गैर यहूदियां का जादा ठीक हिन? ना, बिल्कुल भी नी, किजोकी भले ही कोई यहूदी हो या गैर यहूदी हो, असी सारे जणेया पर इल्जाम लाया गे रा है, कि असी सारे पाप रे काबू बिच हिन।

¹⁰जिय्यां कि पवित्रशास्त्र बिच लिख्खे रा है, “कोई भी मणू परमेश्वर रे सामणे धार्मिक नी है, इक्क भी नी।

¹¹कोई भी मणू समजदार नी है, कोई भी मणू परमेश्वर जो जाणना नी चाह्‍ंदा।

¹²सारे मणूआं परमेश्वर रे रस्ते जो छड्डी दित्ते रा है, हर इक्क मणू निकम्मा बणी गे रा है, इक्क भी मणू खरा कम्म करणे वाला नी है, इक्क भी नी।

¹³तिन्हेरी गल्लां, खुली कब्र री मुस्क सांई हिन। से धोखा दैणे वाली गल्लां बोलदे, तिन्हेरी गल्लां जहरिल्ले सप्प सांई खतरनाक है।

¹⁴तिन्हेरा गल्लां लाणतां ते कड़वाट कने भरे री है।

¹⁵से लोक्कां जो चोट पुजाणे ते खून करणे तांइ उताले रैहन्दे,

¹⁶से मणू जित्ते भी जांदे तित्ते बुरे कम्म ते जुल्म करदे,

¹⁷तिन्हा जो लोक्कां कने लड़ाई-झगड़ा कित्ते बगैर रैह्णा नी आंदा।

¹⁸से मणू परमेश्वर का बिल्कुल भी नी डरदे।”

¹⁹असी जाणदे की मूसा रा कानून, जे किच्‍छ भी बोलदा, सिर्फ तिन्हा जो ही बोलदा जे तिस कानून थल्ले हिन, ताकि कोई भी मणू बहान्ने ना बणाई सके, ते परमेश्वर दुनिया रे सारे लोक्कां जो पापी ठैहराए ते तिन्हा जो सजा दे।

²⁰किजोकी मूसा रे कानून जो मनणे कने कुसकी भी मणू ने परमेश्वर रे सामणे धार्मिक नी ठैहरणा, किजोकी मूसा रे कानून री वजह कने ए पता चलदा हुंदा कि असा ने पाप कित्ते रा है।

²¹पर अवे मूसा रे कानून जो मन्ने बगैर परमेश्वर ने असा जो धार्मिक ठैहराए रा है, जिसेरे बारे बिच बड़े पैल्ले ही मूसा रे कानून ते भविष्यद्वक्तां री कताबां बिच लिख्खे गे रा है कि कुस तरिक्के कने परमेश्वर ने असा जो धार्मिक ठैहराए रा है।

²²मतलब जां असी मसीह यीशु बिच विश्वास करदे, तां परमेश्वर असा जो धार्मिक ठैहरांदे, ते ए मसीह यीशु बिच विश्वास करणे वाले हर इक्क मणू तांइ है। किजोकी परमेश्वर सारे मणूआं कने इक्क-बराबर ही बर्ताव करदे।

²³किजोकी सारेयां ने पाप कित्तेया ते परमेश्वर री महिमा का दुर होई गेरे हिन।

²⁴पर अवे परमेश्वर ने अपणे अनुग्रह री वजह कने असा जो धार्मिक ठैहराया। ते तिन्हा ने असा जो मसीह यीशु रे जरिये असा रे पाप्पां री सजा का मुफ्त बिच अजाद कित्ता।

²⁵परमेश्वर ने मसीह जो असा रे पाप्पां री कीमत चुकाणे तांइ कुर्बान होणे तांइ भेज्जेया। मसीह ने अपणा खून बहाई करी अपणी जान देई दित्ती, ताकि असी तिन्हा पर विश्वास करणे कने परमेश्वर रे नेड़े आई सकण। ते परमेश्वर ने ए सारा किच्‍छ ए दिखाणे तांइ कित्ता, कि पैल्ले जमाने बिच से पापी लोक्कां कने सबर कने रैह्णे बिच, ते तिन्हा जो माफ करणे बिच धार्मिक थिये जे मसीह यीशु बिच विश्वास करदे, बल्कि अब्बे ही परमेश्वर री धार्मिकता ज़ाहिर होई जाओ, जिस कने से अप्पु ही धार्मिक ठैहरे, ते जे मसीह यीशु बिच विश्वास करदे होण, तिन्हा जो भी धार्मिक ठैहराणे वाले होण।

²⁶

²⁷फिरी असा तांइ धार्मिकता पर घमंड करणा बिल्कुल ही नामुमकिन है किजोकी परमेश्वर असा रे पाप्पां रे लेखे-जोखे जो मूसा रे कानून जो मनणे री वजह कने नी पर मसीह बिच विश्वास करणे री वजह कने मिटांदे।

²⁸ते ए गल्ल साफ है कि परमेश्वर कुसकी भी मणू जो मूसा रे कानून ते नियमां जो मनणे कने नी पर मसीह बिच विश्वास करणे कने धार्मिक ठैहरांदे।

²⁹परमेश्वर सिर्फ यहूदी लोक्कां रे परमेश्वर नी हिन, पर से गैर यहूदियां रे भी परमेश्वर हिन।

³⁰किजोकी इक्क ही परमेश्वर है जिन्हा ने खतना वाले लोक्कां जो, ते बगैर खतना वाले लोक्कां जो भी मसीह बिच विश्वास करणे कने ही धार्मिक ठैहरांदे

³¹तां कै मसीह बिच विश्वास करणा मूसा रे कानून जो रद्द करदा? बिल्कुल भी नी, पर विश्वास करणे रे जरिये असी मूसा रे कानून जो पूरा करदे।