Read Chambeali रोमियों 7 Bible Online

रोमियों 7 - Chambeali bible

रोमियों 7

¹ओ मेरे संगी विश्वासियों, तुसा जाणदे कि [2]जां तांइ कोई मणू जिंदा है, तां तांइ से कानूनां रे हेठ है।

²उदारण रे तौर पर, इक्क जनानी जो अपणे लाड़े कने मरदे दम तिकर रैह्णा चाएदा। पर जां तिसेरा लाड़ा मरी जांदा, तां से कानून तिस जनानी पर लागू नी हुंदा।

³इधेरे तांइ जे अगर से जनानी अपणे लाड़े रे जिन्दे-जी, कुसकी होर कने ब्याह करी लै तां से व्यभिचार करदी। पर जां तिसेरा लाड़ा मरी जाए, तां से तिस कानून का छुटी जांदी, ते कुसकी होर कने ब्याह करणे पर व्यभिचार नी करदी।

⁴तां ओ मेरे संगी विश्वासियों, जां तुसा मसीह यीशु कने मरी गे, तां तुसा कानूनां रे काबू का अजाद होई गे। अवे तुसा मसीह यीशु रे होई गेरे हिन जे मुर्देयां बिच का जिन्दे होई गेरे हिन ताकि तुसा तिन्हा कने परमेश्वर तांइ धार्मिक जिन्दगी जी सको।

⁵किजोकी जां असी अपणे पाप करणे रे स्वभाव रे काबू बिच थिये, तां असा री पाप करणे रे स्वभाव, असा बिच कम्म करेया करदा थिया, ते कानूनां ने तिसजो होर बढ़ावा दित्ता ते तिस कने इदेय कम्म होए, जिसेरा नतीज्जा मौत हुंदा।

⁶पर अवे असी कानूनां रे काबू बिच नी हिन जिस ने असा जो कैदियां सांई रख्खे रा थिया, किजोकी असी तिस तांइ मरी गेरे हिन। अवे असी परमेश्वर री सेवा कानूनां जो मनणे रे पुराणे तरिक्के कने नी, पर पवित्रात्मा बिच जीणे कने करी सकदे।

⁷तां असी कै बोलण? कै मूसा रा कानून पाप है? बिल्कुल भी नी! बल्कि मूसा रे कानून री वजह कने ही मैं अपणे पाप जो पैछाणेया: मूसा रा कानून अगर नी बोलदा, कि लालच मत कर, तां मैं नी जाणना थिया कि लालच करणा पाप है।

⁸पर पाप ने मूसा रे कानून रा फायदा चुक्की करी मेरे अंदर हर तरिक्के रा लालच पैदा कित्ता! अगर कोई कानून नी हुंदा, तां पाप ने इक्क मुर्दे रे बराबर होणा थिया।

⁹पैल्ले मैं मूसा रे कानून जो जाणे बगैर जिन्दा थिया, पर जां मैं मूसा रा कानून जाणेया, तां पाप ने मेरे पर काबू करणा सुरु करी लित्तेया, ते मैं परमेश्वर का बखरा होई गेया।

¹⁰ते से ही कानून जे मेरे जो जिन्दगी दैणे तांइ थिया, से ही कानून मेरे मौत री सजा री वजह बणी गेया।

¹¹किजोकी पाप ने मूसा रे कानून रा फायदा चुक्की करी मेरे जो धोखा दित्ता, तिस ही पाप ने मेरे जो परमेश्वर का बखरा कर दित्ता।

¹²पर फिरी भी मूसा रे कानून ते तिस बिच लिख्खे गे हुकम, धार्मिक, ठीक ते पवित्र हिन।

¹³तां कै से कानून जे ठीक हिन, मेरे मरणे री वजह बणी? बिल्कुल भी नी! पर पाप तिस ठीक कानून रा फायदे चुक्की करी मेरे तांइ मौत री सजा रा वजह बणेया, ताकि असी जाणी सके कि हकीकत बिच पाप बड़ा ही बुरा है।

¹⁴असी जाणदे कि मूसा रा कानून तां आत्मिक है, पर मैं सिर्फ इक्क इन्सान है, ते पाप रे हत्थां गुलाम बणाई करी बेच्चेया गे रा है।

¹⁵ते जे कम्म मैं करदा तिसजो नी जाणदा, किजोकी जे मैं चाह्‍ंदा से नी करदा, पर जिस कम्म का मेरे जो घिन्न आंदी से ही कम्म करदा।

¹⁶जे अगर मैं से ही बुरे कम्म करदा जिस जो पसदं नी करदा, तां मैं मन्नी लिदां कि मूसा रा कानून खरा है।

¹⁷तां ऐसे हाल बिच से बुरा कम्म करणे वाला मैं नी बल्कि पाप है, जे मेरे बिच बसे रा है।

¹⁸किजोकी मैं जाणदा कि मेरे पापी स्वभाव बिच कोई ठीक गल्ल नी है। मैं ठीक कम्म करणा ता चाह्‍ंदा पर से मेरे का नी हुदें।

¹⁹किजोकी मैं जे ठीक कम्म जो करणा चाह्‍ंदा, से ता मैं करदा नी, पर जे बुरे कम्म मैं नी करणा चाह्‍ंदा, से ही करदा।

²⁰अते जे अगर मैं से ही बुरे कम्म करदा जे मैं नी करणा चाह्‍ंदा ता तिन्हा जो करणे वाला मैं नी, पर मेरे अंदर बसे रा पाप है।

²¹मैं जिन्दगी रे इस सिद्वांत जो समजे रा है कि जां मैं ठीक कम्म करणा चाह्‍ंदा, तां मेरे का बुरे ही कम्म हुंदे।

²²मैं पूरे दिल कने परमेश्वर रे कानून कने तां बड़ा खुस रैहन्दा,

²³पर मेरे सरीर रे हर हिस्से बिच इक्क इदेइ कानून मिलदा जे मेरे दिल कने परमेश्वर रे कानून रे खिलाफ लड़ेया करदी है, ते ए मेरे जो पाप रे स्वभाव रा गुलाम बणाई रखदा जे हल्ले भी मेरे अंदर है, ते तिस हर इक्क कम्म जो काबू करदा, जे मैं करदा।

²⁴मैं किन्ना अभागा मणू है। कुनिये मेरे जो परमेश्वर का अलग होणे का बचाणा?

²⁵मैं परमेश्वर रा शुक्रिया करदा कि तिन्हा ने मेरे जो मसीह यीशु रे जरिये छुड़ाई लित्ता। हालांकि अपणे पाप रे स्वभाव री वजह कने मैं पाप रा गुलाम है, पर मैं अपणे मन कने परमेश्वर रे कानून जो मनणा चाह्‍ंदा।