Read Chambeali 1 कुरुन्थियों 13 Bible Online

1 कुरुन्थियों 13 - Chambeali bible

1 कुरुन्थियों 13

¹जे अगर मैं मणूआं ते स्वर्गदूतां री भाषां बोल्लां, पर कुसकी कने प्यार ना करां, तां मेरी गल्ल-बात इक्क ठणठणांदे पित्तल ते झणझणादीं झाज्जं सांई बेमतलब है।

²जे अगर मैं भविष्यवाणी करां ते सारे राज़ ते हर तरिक्के री गल्ल जो समजी सकां, ते मेरे जो परमेश्वर बिच इत्ते तिकर विश्वास हो की मैं पहाड़ां जो हटाई सकदा पर कुसकी कने प्यार ना करां, तां मैं कुसकी कम्मे रा नी है।

³जे अगर मैं अपणी सारी जायदाद गरीब्बां बिच बंड्डी देयां ते जे अगर मैं अप्पु जो कुर्बान होणे तांइ भी देई देयां पर कुसकी कने प्यार ना करां, तां मैं कुसकी कम्मे रा नी है।

⁴प्यार करणे वाले लोक्कां बिच सबर हुंदा ते से दयालू हुंदे, प्यार करणे वाले मणू नफरत नी करदे, से अप्पु री बड़ाई नी करदा ते से घमंड नी करदे।

⁵प्यार करणे वाले मणू दुज्जेया री बेज़ती नी करदे, से मणू मतलबी नी हुंदे, से सिर्फ अपणी खुसी नी तोपदे, से बड़े तौले गुस्सा नी करदे, ते से अपणे कने होए री बुरी गल्लां जो हमेसा चेत्ता नी रखदे।

⁶जां मणू गलत कम्म करदे तां से बड़े दुखी हुंदे, पर से मणू तां बड़े खुस हुंदे जां मणू ठीक कम्म करदे।

⁷से हर गल्ल जो सैह्‍ण करी लिंदे, प्यार करणे वाले मणू परमेश्वर बिच विश्वास नी छडदे, प्यार परमेश्वर बिच असा री आस जो बणाई रखदा, ते मुस्किल ते तकलिफां रे दौर बिच से सबर कने रैहन्दा।

⁸इदेया समय भी आणा जां लोक्कां ने ना ता परमेश्वर रे बसेख री गल्ल करणी ते ना ही बखरी-बखरी भाषां बिच गल्लां करणी, परमेश्वर रे बारे बिच गहरे ज्ञान री भी जरुरत नी रैह्णी पर प्यार हमेसा तांइ रैह्णा।

⁹किजोकी असा रे ज्ञान रा दान ते परमेश्वर रे बसेख रा प्रचार करणे री काबिलियत भी अधुरी है पर जां तिस सर्वसिद्व ने आणा, तां तिस असिद्वता री जरुरत नी रैह्णी।

¹¹ए कुसकी मणू रे बधणे सांई है किजोकी जां मैं बच्चा थिया तां मैं बच्चेयां सांई बोलदा, सोचदा ते समजदा थिया, पर जां बड्डा होई गेया तां बच्चेयां वाली गल्लां छड्डी दित्ती।

¹²ए असी विश्वास करणे वाले लोक्कां तांइ इक्क ही जदेया है किजोकी असी इक्क इदेय मणू सांई हिन जे इक्क धुंधले सीसा बिच अपणी परछाई दिख्खेया करदे हिन, सिर्फ अग्गे चली करी भविष्य बिच असा जो हकीकत बिच सब किच्‍छ समझ बिच आणा किजोकी असा ने परमेश्वर जो आमणे-सामणे दिखणा। परमेश्वर रे बारे बिच हल्ले मेरा ज्ञान अद्दा-अधुरा है पर से समय आणा जां मैं परमेश्वर जो तिन्ना ही जाणना, जिन्ना परमेश्वर मेरे जो जाणदे।

¹³पर अवे ए त्रै तरिक्के री चीजां हिन जे असा जो करणा चाएदी। परमेश्वर बिच विश्वास रखणा, परमेश्वर रे वादेयां री आस रखणा ते सारेयां जो प्यार करणा। पर इन्हा त्रैन्नी चीजां बिच का परमेश्वर ते सारेयां जो प्यार करणा सबका जादा जरुरी है।