Read Chambeali 1 कुरुन्थियों 15 Bible Online

1 कुरुन्थियों 15 - Chambeali bible

1 कुरुन्थियों 15

¹ओ संगी विश्वासियों, अवे मैं तुसा जो तिस ही सुब बसेख रा चेत्ता दुआंदा जे मैं पैल्ले सूणाई चुके रा है, जिस पर तुसा ने विश्वास भी कित्तेया थिया ते जिस बिच तुसा मजबूत भी हिन।

²तिसेरी ही वजह कने तुसा रा छुटकारा भी होणा जे अगर तुसा तिस सुब बसेख बिच विश्वास करणा ना छड्डो जे मैं तुसा जो सुणाया थिया। पर जे अगर तुसा ने तिस बिच विश्वास करणा छड्डी दित्तेया तां तुसा रा मसीह बिच विश्वास करणा बेकार होई जाणा।

³इसी वजह कने मैं सबका पैल्ले तुसा जो से ही गल्ल दस्सी दित्ती, जे मेरे जो मसीह ने दस्सी थी कि पवित्रशास्त्र रे वचन रे हिसाब कने यीशु मसीह असा रे पाप्पां तांइ मरे,

⁴ते दब्बे गे, ते पवित्रशास्त्र रे हिसाब कने परमेश्वर ने त्रिये दिन तिन्हा जो मुर्देयां बिच का जिन्दा भी करी दित्ता,

⁵ते पतरस जो ते बाकि रे सारे प्रेरितां जो भी दिस्से थिये,

⁶फिरी से पांज्ज सौ का भी जादा प्रेरितां जो भी कठ्ठे ही दिस्से, जिन्हा बिच का मते जणे हल्ले तिकर जिन्दे हिन, पर किच्‍छ मरी भी गे।

⁷फिरी से याकूब जो दिस्से तां फिरी सारे प्रेरितां जो भी दिस्से।

⁸आखिर बिच से मेरे जो भी दिस्से, जे इक्क बच्चे सांई है जे मन्नों सही वक्त पर पैदा नी होए रा हो।

⁹किजोकी मैं प्रेरितां बिच सारेयां का छोटा है, बल्कि मैं प्रेरित केहलाणे रे जोग्गा भी नी है, किजोकी मैं परमेश्वर री कलीसिया रे लोक्कां पर जुल्म करदा हुंदा थिया।

¹⁰परमेश्वर रे अनुग्रह री वजह कने ही मैं प्रेरित बणेया, तिन्हेरा से अनुग्रह जे मेरे पर होया, तिसेरा मेरी जिन्दगी बिच बड़ा जादा असर रेया। मैं तिन्हा सारे प्रेरितां का बधी करी मैहनत भी कित्ती: तां भी ए मेरे पास्से का नी होया पर परमेश्वर रे अनुग्रह री वजह जे मेरे पर है।

¹¹इधेरे तांइ चाए मैं हो ते चाए दूए प्रेरित होण, असा सारेयां ने मसीह यीशु रे तिस्सी बसेख रे बारे बिच प्रचार कित्तेया, ते तिस्सी पर तुसा ने विश्वास भी कित्तेया।

¹²इधेरे तांइ अवे मैं तुसा का पूच्छदा कि जां असा सारेयां ने तुसा बिच ए ही प्रचार कित्ते रा है कि मसीह यीशु मरे रे लोक्कां बिच का फिरी जिन्दे होई गे, तां तुसा बिच का किन्ने कियां बोलदे कि मुर्दे लोक्कां रा जिन्दा होणा है ही नी?

¹³जे अगर मरे रे लोक्कां रा फिरी जिन्दा होणा है ही नी, तां मसीह यीशु भी जिन्दा नी होणा थिया।

¹⁴ते जे अगर मसीह यीशु मुर्देयां बिच का जिन्दे नी होए रे हुंदे तां असा रा प्रचार करणा भी बेकार है ते तुसा रा मसीह बिच विश्वास करणा भी बेकार है।

¹⁵असी परमेश्वर रे झूठ्ठे गवाह ठैहरे किजोकी असा ने परमेश्वर रे बारे बिच ए गवाई दित्ती कि तिन्हा ने मसीह यीशु जो मुर्देयां बिच का जिन्दा करी दित्ता पर जे अगर मरे रे मणू जिन्दा नी हुदें तां परमेश्वर ने मसीह जो भी मुर्देयां बिच का जिन्दा नी कित्ते रा है।

¹⁶ते मैं दोबारा बोलदा कि जे अगर मुर्दे जिन्दा नी हुदें तां मसीह यीशु भी जिन्दा नी हिन होए ए।

¹⁷ते जे अगर मसीह यीशु मुर्देयां बिच का जिन्दे नी हिन होए रे तां तुसा रा मसीह बिच विश्वास करणा बेकार है, ते तुसा हल्ले तिकर अपणे पाप्पां बिच फसे रे हिन।

¹⁸ते जे अगर मसीह यीशु मुर्देयां बिच का जिन्दे नी हिन होए रे तां तिन्हा बिच विश्वास करणे वाले जे मणू मरी गेरे हिन, तिन्हेरा छुटकारा नी होए रा है ते इसेरा मतलब ए है कि से मणू हमेसा-हमेसा तांइ परमेश्वर बखरे होई गेरे हिन।

¹⁹जे अगर असी सिर्फ इसी जिन्दगी तांइ मसीह यीशु का आस रखदे ते हमेसा री जिन्दगी तांइ नी तां फिरी असी सबका जादा का अभागे हिन।

²⁰पर हकीकत बिच परमेश्वर ने मसीह यीशु जो मुर्देयां बिच का जिन्दा करी दित्ता, ते मसीह इस गल्ल रा सबूत हिन कि जिन्ने भी विश्वासी मणू मरी गेरे हिन तिन्हा ने उन्हा सारेयां जो जिन्दा करी दैणा।

²¹किजोकी जिय्यां आदम री करणी री वजह कने मौत आई, तिय्यां ही असा ने मसीह यीशु री वजह कने मुर्देयां बिच का फिरी जिन्दे होई जाणा।

²²ते जिय्यां आदम री वजह कने असा सारेयां पर मौत आई मरदे, तिय्यां ही मसीह यीशु रे कने असा सारेयां जो हमेसा री जिन्दगी मिल्ली।

²³पर हर इक्क ने वरी-वरी करी के वापिस जिन्दे होई जाणा, सबका पैल्ले मसीह यीशु मुर्देयां बिच का जिन्दे होए, ते मसीह यीशु रे वापिस हटी आणे का बाद, हर इक्क से मणू वापिस जिन्दा करी दित्ता जाणा जिसेरा मसीह कने गहरा रिस्ता है।

²⁴इसेरे बाद जां मसीह ने सारा किच्‍छ मुकाई दैणा, तां दुनिया रा खात्मा होई जाणा ते मसीह यीशु ने राज परमेश्वर पिता जो सौंप्पि दैणा।

²⁵किजोकी मसीह यीशु रा तिस राज पर शासन करणा जरुरी है जां तांइ परमेश्वर अपणे सारे दुश्मणा जो अपणे पैरां हेठ ना करी लैण।

²⁶ते सारेयां का आखरी दुश्मण “मौत” जो खत्म करी दैणा।

²⁷किजोकी पवित्रशास्त्र बिच लिख्खे रा है परमेश्वर ने सारा किच्‍छ मसीह रे अधीन करी रख्खे रा है, पर जां से बोलदे कि सारा किच्‍छ तिन्हेरे अधीन करी दित्तेया तां ए गल्ल साफ है कि परमेश्वर ने अप्पु जो तिस बिच शामिल नी कित्तेया किजोकी तिन्हा ने ही सब किच्‍छ मसीह रे अधीन कित्तेया।

²⁸ते जां सारा किच्‍छ मसीह रे अधीन होई जाणा, तां पुत्तर ने अप्पु भी तिस परमेश्वर रे अधीन होई जाणा जिनिये सारा किच्‍छ मसीह रे अधीन कित्तेया थिया ताकि सारेयां उप्पर परमेश्वर ही सर्वोच्च हो।

²⁹जे अगर मरे रे मणू मुर्देयां बिच का फिरी जिन्दे नी कित्ते जाणे, तां फिरी लोक्कां रा तिन्हा तांइ बपतिस्मा लैणे रा कै मतलब? जे अगर मुर्दे जिन्दा नी हुंदे तां फिरी लोक्कां रा तिन्हा तांइ बपतिस्मा लैणे रे रीवाज रा कै मतलब?

³⁰ते जे अगर मुर्दे जिन्दा नी होणे तां असा रा भी हर बेल्ले मसीह यीशु रा बसेख सुनाणे तांइ जोखिम चुकणा बेवकूफी है।

³¹ओ संगी विश्वासियों, मेरे जो तुसा पर गर्व है कि तुसा रा मसीह यीशु कने इक्क गहरा रिस्ता है, ते ए गल्ल भी सही है कि मैं हर रोज मसीह रा बसेख सुनाणे री वजह कने मौत रे खतरे बिच रैहन्दा।

³²मैं इफिसुस बिच बड़ी ही जादा तंगी-मुसीबतां का गुजरे रा है। मेरे दुश्मण जंगली-जानवरां सांई खूंखार हिन ते तिन्हा ने मेरे जो नुक्सान पूजाए रा है। जे अगर ए सच है कि आखरी दिनां मुर्देयां जो जिन्दा नी कित्तेया जाणा तां मेरे तांइ ए ही खरा हुंदा कि मैं तिस कहावत सांई मौज-मस्ति करां जिस बिच बोल्ले रा है कि आओ असी खांदे-पिंदे, किजोकी कल ता असी मरी ही जाणा, ते से ही असा रा अंत होणा।

³³तिन्हेरी इदेइ गल्लां कने धोखा मत खांदे, “बुरी सगंत ठीक चरित्र जो खराब करी दिंदी।”

³⁴तुसा जो पाप करणा छड्डी करी वापिस धार्मिकता रे कम्म करणा चाएदे। किजोकी तुसा बिच किच्‍छ लोक्कां रा परमेश्वर कने गहरा रिस्ता नी है। ए गल्ल मैं तुसा जो शर्मिंदा करणे तांइ ए बोलदा।

³⁵ते जे अगर कोई उदारण रे तौर पर इय्यां पूच्छदा कि परमेश्वर मुर्देया जो वापिस जिन्दा किय्यां करदे ते जिन्दा होणे रे बाद तिन्हा का कुण वाले सरीर हुंणे?

³⁶ओ नासमझ! जां तू जमीन बिच कोई बीह् बांदा, तिस बिच जिन्दगी रा अंकुर तां तांइ नी फुटदा, जां तांइ से अप्पु नी मरी जांदा।

³⁷जां तू बांदा ता तू सीद्दे बूट्टे जो ही थोड़ी ना बाई दिंदा, सिर्फ बीह् जो ही बांदा, तां चाए से कणक रा बीह् हो या फिरी कुसकी अनाज रा बीह् हो।

³⁸से बीह् बाणे का बाद परमेश्वर तिस बीह् जो अपणी मर्जी रे हिसाब कने बधांदे ते तिसजो अकार दिंदे। हर तरिक्के रा बीह् अपणे-अपणे अकार बिच बदधा।

³⁹सारे जीव-जंतुआ रा सरीर इक्क जदेया नी है, मणूआं रा सरीर बखरा है, जानवरा रा सरीर बखरा है, पछिंया रा सरीर बखरा है, मच्छियाँ रा सरीर बखरा है।

⁴⁰जे किच्‍छ भी धरती बिच है तिसेरा इक्क अकार ते खूबसुरती है, तिय्यां ही जे किच्‍छ आसमान बिच है तिसेरा भी बखरा ही अकार ते खूबसुरती है।

⁴¹सूरज री बखरी ही खूबसुरती है, ते चाँद री भी बखरी ही खूबसुरती है, ते तारेयां री भी बखरी ही खूबसुरती है, ते तारेयां री भी अप्पु मिते इक्क बखरी ही खूबसुरती है।

⁴²मुर्देयां रा जिन्दा होणा किच्‍छ इदेया ही है। जिस सरीर जो से मरणे का दब्बी दिंदे से सड़ी जांदा, पर जां से फिरी जिन्दा कित्तेया जाणा तां से इदेया बणी जाणा जे दुबारा कदी नी सड़णा।

⁴³जां कुसकी रे मुर्दा सरीर जो दब्बेया जांदा तां से बदसुरत ते कमजोर हुंदा पर जां से फिरी जिन्दा कित्तेया जाणा तां से छैल ते ताकतवर होणा, जे बड़ा महिमामय है।

⁴⁴जिय्यां असा खून ते मांस वाला ए इन्सानी सरीर है, तिय्यां ही इदेय सरीर भी हिन जिन्हा बिच परमेश्वर रे आत्‍मा ने हमेसा री जिन्दगी दित्ते री है। ते इन्सानी सरीर तिन्हा शरीरां बिच बदली जाणे जिन्हा बिच परमेश्वर रे आत्मां ने हमेसा री जिन्दगी दित्ते री है।

⁴⁵पवित्रशास्त्र बिच इय्यां भी लिख्खे रा है, “पैल्ला मणू, मतलब आदम जिन्दा मणू बणेया, ते आखरी आदम, जे मसीह यीशु हिन, हमेसा री जिन्दगी दैणे वाला बणेया।”

⁴⁶असी दिखदे कि आत्मिक सरीर वाला मणू जे मसीह यीशु हिन पैल्ले नी आए, से आदम का बाद आए जिस का इन्सानी सरीर थिया।

⁴⁷पैल्ला मणू जे आदम है, से मिट्टी का बणेया थिया, पर दुआ मणू जे मसीह यीशु हिन, से स्वर्ग का आए।

⁴⁸धरती रे मणू से पैल्ले मणू आदम सांई हिन पर जे मणू मसीह यीशु जो मनदे से मणू अप्पु भी तिस्सी सांई हिन जे स्वर्ग का हिन।

⁴⁹ते जिय्यां असा ने तिसेरा रुप धारण जे मिट्टी का बणे रा थिया, तिय्यां ही असा ने तिस स्वर्गीय मणू रा रुप भी धारण करी लैणा जे मसीह यीशु हिन।

⁵⁰ओ संगी विश्वासियों, मैं चाह्‍ंदा कि तुसा इस गल्ल जो जाणो कि असा रे हड्ड-मांस वाले ए सरीर सड़ी जाणे जिसेरा मतलब ए है कि से कदी परमेश्वर रे राज बिच वास नी करी सकदे जिनिये हमेसा-हमेसा तिकर रैह्णा ते नाशवान कदी अविनाशी नी बणी सकदा।

⁵¹सुणो, मैं तुसा जो राज़ री गल्ल दसदा, जां आखरी तुरही बजणी तां असा विश्वासियां ने चाणचक्के ही बदली जाणा ते जां तुरही बजणी तां मुर्देयां ने भी जिन्दे होई जाणा ते फिरी कदी नी मरणा।

⁵²

⁵³किजोकी जरुरी है कि असा रे नाशवान सरीर जे अविनाशी सरीर रे रुप बिच बदली जाण जे ना कदी मुकदे ते ना ही सड़दे।

⁵⁴ते जां इस नाशवान सरीर ने अविनाशी सरीर रा रुप बिच बदली जाणा तां से इय्यां होणा जिय्यां कि पवित्रशास्त्र बिच लिख्खे रा है, “जय ने मौत जो निगली लित्तेया।”

⁵⁵ओ मौत, तेरी जीत कुते गई? ओ मौत, तेरा डकं कुते रेया?

⁵⁶मौत री ताकत पाप है, ते पाप री ताकत कानून है।

⁵⁷पर परमेश्वर रा शुक्रिया हो, कि से असा जो पाप ते मौत पर मसीह यीशु रे कित्ते रे कम्म रे जरिये जीत दुआंदे।

⁵⁸इधेरे तांइ ओ मेरे प्यारे संगी विश्वासियों, विश्वास बिच मजबूत बणे रेयो ते गलत शिक्षां री वजह कने मत भटकदे, ते प्रभु रे कम्मां बिच हमेसा बदधे रेयो, किजोकी जे मैहनत तुसा प्रभु तांइ करदे से कदी बेकार नी जांदी।