Read Chambeali 1 कुरुन्थियों 16 Bible Online

1 कुरुन्थियों 16 - Chambeali bible

1 कुरुन्थियों 16

¹अवे मैं तिस आर्थिक मदद रे बारे बिच जे परमेश्वर रे गरीब लोक्कां तांइ कठेरेया गेया थिया, जे हुकम गलातिया प्रदेश रे कलीसिया रे विश्वासियां जो दित्तेया थिया, तिय्यां ही तुसा भी करो!

²हफ्ते रे पैल्ले दिन तुसा बिच हर इक्क जणा अपणी-अपणी कमाई बिच का किच्‍छ अप्पु का जमा करी रख्खे ताकि मेरे आणे का बाद दान ना कठेरणा पेयो।

³ते जां मैं तित्ते होणा, तां मैं तुसा रे भरोस्सेमंद मणूआं रे हत्थां चीठ्ठी देई करी तिन्हा जो भेजी दिंगा ताकि तिन्हा कने तिन्हेरी पहचान होई जाए ते से तुसा री आर्थिक मदद यरुशलेम बिच पूजाई दैण।

⁴जे अगर तुसा जो लगदा कि जाणा जरुरी है तां तिन्हा ने मेरे कने ही जाणा।

⁵जे अगर प्रभु री इच्छा होई तां मैं तुसा कने लम्बे समय तिकर रैह्णा चाह्‍ंदा। मैं हल्ले तुसा कने रैह्णे तांइ नी रूकणा किजोकी मैं मकिदुनिया प्रदेश जो जाया करदा है। थोड़े समय तित्ते रैह्णे का बाद ही मैं तुसा जो मिलणे तांइ आणा, ते तां मैं तुसा कने थोड़े समय य लगभग पूरी सर्दी तुसा कने ही रैह्णा, ताकि तिसेरे बाद तुसा मेरे अगले सफर तांइ किच्‍छ मदद करी सको।

⁸पर मैं पेन्तिकुस्त रे त्योहर तिकर इफिसुस सहर बिच ही रैह्णा!

⁹हालांकि तित्ते मेरे मते सारे विरोधी हिन पर तिसेरे बावजूद मेरे जो तित्ते बड़ा असरदार कम्म करणे रा मौक्का मिल्ले रा है।

¹⁰जे अगर तीमुथियुस तुसा का आए ता तिस कने बड़ी इज्जत कने पेश आओ, किजोकी से मेरे सांई ही परमेश्वर रा कम्म करणे वाला मणू है।

¹¹इधेरे तांइ कोई भी तिसेरी बेज़ती ना करे, पर तिसजो सफर तांइ सारी जरुरी चीजां देई देयो किजोकी मैं तिसजो भालेया करदा है कि संगी विश्वासियां कने मेरे का आए।

¹²ते संगी विश्वासी अपुल्लोस कने मैं बड़ी बिनती कित्ती कि से बाकि विश्वासियां कने तुसा का आये जे पैल्ले तुसा का आई बैठ्ठे रे हिन, पर तिन्हा ने अब्बे आणा नी चाएया, पर सही वक्त दिख्खी करी तिन्हा ने आई जाणा।

¹³चुकन्ने रेयो, मसीह यीशु बिच विश्वास करणे बिच स्थिर बणो, हिम्मतवाले बणो, ते विश्वास बिच मजबूत बणो।

¹⁴ते जे किच्‍छ भी तुसा करदे हिन से प्यार कने करो।

¹⁵ओ संगी विश्वासियों, तुसा स्तिफनास ते तिसेरे घराने जो जाणदे। से अखाया प्रदेश रे पैल्ले मणू हिन जिन्हा ने मसीह यीशु बिच विश्वास कित्तेया थिया। ते से मणू परमेश्वर रे लोक्कां री सेवा करणे तिकर हमेसा तैयार रैह्‍न्दे।

¹⁶इधेरे तांइ मैं तुसा कने बिनती करदा कि ऐसे मणूआं रे अधीन रेयो जे इदेइ सच्ची भक्ति कने मैहनत करदे।

¹⁷मैं स्तिफनास ते फूरतुनातुस अखइकुस रे आणे कने खुस है किजोकी तिन्हा ने मेरी से हर आर्थिक जरुरत पूरा कित्ता जे तुसा पूरी नी करी पांदे थिये।

¹⁸जिय्यां तिन्हा ने मेरे जो प्रोत्साहित कित्ते रा है, तिय्यां ही तिन्हा ने तुसा जो भी प्रोत्साहित करणा जां तिन्हा ने तुसा का आणा। इन्हा लोक्कां सांई तुसा भी लोक्कां रा आदरमान करेया करो।

¹⁹एशिया प्रदेश री कलीसिया रे विश्वासियां रे पास्से का तुसा जो नमस्कार। अक्विला ते तिसेरी लाड़ी प्रिस्किल्ला ते तिन्हेरे घरे कठीणे वाली कलीसिया रे विश्वासियां रा नमस्कार।

²⁰सारे संगी विश्वासियां जो नमस्कार, ते सारे जणे इक्क-दूए जो मसीही प्यार कने नमस्ते करो।

²¹मैं पौलुस, तुसा जो अपणे हत्थां कने ए चीठ्ठी लिख्खे करी, नमस्ते करदा। लाणत है तिस मणू पर जे प्रभु कने प्यार ना करदा हो।

²²हमारे प्रभु यीशु जल्द हटणे वाले हिन।

²³प्रभु यीशु रा अनुग्रह तुसा पर हुंदा रे।

²⁴मेरा प्यार मसीह यीशु बिच तुसा सबणी कने रे जिन्हेरा मसीह यीशु कने गहरा रिस्ता है। आमीन!