Read Chambeali 1 कुरुन्थियों 6 Bible Online

1 कुरुन्थियों 6 - Chambeali bible

1 कुरुन्थियों 6

¹जे अगर कुसकी इक्क विश्वासी रा दूए विश्वासी कने कोई झगड़ा होई जाओ तां से अविश्वासी हाकिम का ना जाए पर से अपणे फैसले तांइ कलीसिया रे दूए विश्वासी लोक्कां का जाए।

²तुसा जो पता ही है कि परमेश्वर रे लोक्कां ने दुनिया रे लोक्कां रा हिसाब-किताब करणा। इधेरे तांइ तुसा हल्की का हल्की लड़ाई रा हिसाब-किताब करणे रे जोग्गे हिन।

³तुसा जो पता ही है कि असा ने शैतान रे दूतां रा भी हिसाब-किताब करणा इधेरे तांइ असी छोटी-मोटी दुनियावी परेसानी रा भी फैसला करी सकदे।

⁴जे अगर तुसा जो इदेइ छोट्टी-मोटी परेसानी रा फैसला करणा पेयो तां तुसा इदेइ गल्लां जो तिन्हा लोक्कां सामणे लेई करी नी जाणा चाएदा जे मसीह यीशु बिच विश्वास नी करदे।

⁵तुसा लोक्कां जो शर्म आणा चाएदी! जरुर तुसा लोक्कां बिच कोई इक्क जणा होणा ही जे संगी विश्वासियां रे झगड़े सुलझाई सके।

⁶पर तिसेरे बजाए इक्क विश्वासी अपणे दूए विश्वासी भाई रे खिलाफ कचेरी बिच कुसकी अविश्वासी मणू का अपणी परेसानी सुलझाणे तांइ जांदे।

⁷पर जां कोई विश्वासी अपणे दूए विश्वासी भाई जो कुसकी मुद्दे तांइ कचेरी बिच लेई जांदे, तां इक्क विश्वासी होणे रे नात्ते जिय्यां असा जो अप्पु-मिते रैह्णा चाएदा, असी तिय्यां रैह्णे बिच नाकाम रैह्‍ंदे। खरा ता ए ही होणा कि तुसा अपणे दूए विश्वासी भाई री गलती जो सहन करी लेया करो। जे अगर दूए विश्वासी भाई ने तुसा का धोख्खे कने किच्‍छ लेई लित्ते रा हो, तां तिसेरे खिलाफ किच्‍छ भी मत करो।

⁸पर तुसा तां अप्पु ही अपणे विश्वासी भ्यालां कने गलत करदे ते तिन्हा जो धोख्खा दिंदे।

⁹तुसा जो ठीक तरिक्के कने पता है धोख्खा दैणे वाले लोक्कां ने कदी परमेश्वर रे राज रे वारिस नी बणना। गलतफहमी बिच मत रेयो किजोकी व्यभिचारी, मूर्तां री पूजा करणे वाले, परस्त्रीगामी, लुच्चे, विकृत समलैंगिक रिस्ता,

¹⁰चोरी करणे वाले, लालची, शराब्बि, गालां दैणे वाले, धोख्खा-धड़ी करणे वाले मणू कदी भी परमेश्वर रे राज रे वारिस नी होई सकदे।

¹¹ते तुसा बिच का मते जणे पैल्ले इदेय ही थिये, पर तुसा प्रभु यीशु मसीह ते परमेश्वर रे आत्‍मा ने तुसा रे पाप साफ कित्ते गे ते तुसा पवित्र ते धार्मिक भी ठैहराया।

¹²तुसा बिच का किच्‍छ मणू बोलदे कि असी जे मर्जी चाए से करी सकदे, पर मैं तुसा जो बोलदा कि हर किच्‍छ असा तांइ खरा नी है। इधेरे तांइ मैं कुसकी भी चीज रे वस बिच नी होणा चाह्‍ंदा।

¹³तुसा मणू बोलदे कि रोट्टी पेट तांइ जरुरी है ते पेट रोट्टी तांइ जरुरी। ए गल्ल सही ता है पर इक्क दिन परमेश्वर ने इन्हा दोन्नां जो मुकाई दैणा।[3] पर कोई भी मणू ए नी बोल्ली सकदा कि असा रे सरीर व्यभिचार तांइ बणे रे हिन। असा रे सरीर प्रभु रे हिन ते असा जो अपणे शरीरां जो प्रभु री इच्छा पूरी करणे तांइ इस्तेमाल करणा चाएदा।

¹⁴परमेश्वर ने अपणी ताकत कने असा जो मुर्देयां बिच का जिन्दा करी दैणा जिय्यां कि तिन्हा ने मसीह यीशु जो भी मुर्देयां बिच का फिरी जिन्दा कित्तेया थिया।

¹⁵तुसा जो पता ही है कि तुसा रे सरीर मसीह यीशु रे अंग हिन। मैं मसीह यीशु रे अंग जो लेई करी तिन्हा जो वेश्या रे अंग नी बणाई सकदा। इय्यां कदी भी नी होई सकदा।

¹⁶तुसा जो ता पता ही है कि जे अगर कोई मणू वेश्या कने नाजायज़ रिस्ता बणांदा तां से तिस कने इक्क तन होई जान्दा, किजोकी पवित्रशास्त्र बिच लिख्खे रा है, “तिन्हा दोन्नां ने इक्क तन होई जाणा।”

¹⁷ते जे मणू प्रभु कने रिस्ता बणाई करी रखदा, तां तिस मणू प्रभु कने इक्क आत्‍मा होई जांदा।

¹⁸व्यभिचार का बची रेयो, किजोकी होर जिन्ने भी पाप मणू करदा से कने सरीर पर इदेया असर नी पांदे जदेया असर व्यभिचार करणे कने पैंदा। किजोकी व्यभिचार करणे वाला अपणे ही सरीर रे खिलाफ ही पाप करदा।

¹⁹तुसा जो पता ही है कि तुसा रा सरीर इक्क मन्दिर सांई है, जिस बिच पवित्रात्मा वास करदा जे तुसा जो परमेश्वर रे पास्से का मिल्ले रा है, ते तुसा रा अप्पु पर कोई हक नी है किजोकी तुसा परमेश्वर रे हिन।

²⁰किजोकी प्रभु ने सुली पर कुर्बानी देई करी तुसा री कीमत चुकाए री है। इधेरे तांइ अपणे सरीर कने ठीक कम्म करी के परमेश्वर री महिमा करो।