Read Chambeali 1 कुरुन्थियों 7 Bible Online

1 कुरुन्थियों 7 - Chambeali bible

1 कुरुन्थियों 7

¹मैं अवे तुसा जो तिन्हा गल्लां रा जवाब दैणा जे तुसा ने मेरे का अपणी चीठ्ठी बिच मेरे का पुच्छे थिये। तुसा रा सवाल थिया “क्‍या लोक्कां तांइ बगैर ब्याह कित्ते रे रैह्णा जादा खरा है?”

²हाँ, ए खरा है पर मणू बड़ी असानी कने व्यभिचारी कम्म करणे रे बहकावे बिच आई जांदे, इधेरे तांइ हर इक्क मर्द री लाड़ी होणा चाएदी ते हर इक्क कुड़ी रा भी लाड़ा होणा चाएदा।

³ए जरुरी है कि हर लाड़ा अपणी लाड़ी तांइ अपणी हर जिम्मेवारी जो निभाए ते हर इक्क लाड़ी अपणे लाड़े तांइ अपणी जिम्मेवारियां जो निभाए।

⁴लाड़ी जो अपणे सरीर पर हक्क नी पर तिसेरे लाड़े रा हक्क है, तिय्यां ही लाड़े रा भी अपणे सरीर पर हक्क नी, पर तिसेरी लाड़ी रा है।

⁵प्रार्थना बिच समय गुजारणे रे अलावा कुसकी होर गल्ल तांइ लाड़ा ते लाड़ी इक्क दूए जो अप्पु-मिते सम्बध बणाणे का मना ना करे, पर तिसेरे बाद से मणू अपणी आम ब्यात्ती री जिन्दगी जो तिय्यां ही जिन्दे रैह्ण। इस तरिक्के कने तुसा संयम री कमी री वजह कने शैतान री परिक्षा बिच पैणे का बची रैह्णा।

⁶पर मैं तुसा जो दस्सी दिंदा कि ए सिर्फ इक्क सुझाव है ना कि कोई हुकम।

⁷मैं ए चांह्दा कि तुसा सारे मेरे सांई बगैर ब्याह रे रैह्‍न्दे पर परमेश्वर ने किच्‍छ लोक्कां जो ब्याह करणे रा वरदान दित्ता रा ओ ते कुसकी जो बगैर ब्याह रे रैह्णे रा।

⁸अवे जे मणू ब्यात्ते रे नी हिन, ते जे जनानियां विधवा हिन, मैं तिन्हा जो ए ही सलाह दिंगा कि से मेरे सांई ही किल्ले रैह्ण।

⁹पर जिन्हा लोक्कां तांइ संयम रखणा मुस्किल है, से मणू ब्याह करी लैण, किजोकी व्यभिचार करणे का खरा ब्याह करणा है।

¹⁰जिन्हेरा ब्याह होई गे रा है, तिन्हा जो मैं नी, बल्कि प्रभु हुकम दिंदे कि लाड़ी अपणे लाड़े जो तलाक ना दे।

¹¹ते जे अगर से तलाक देई करी बखरे होई भी जाये ता से मणू दुज्जा ब्याह ना करे, या फिरी वापिस फिरी मिली जाये। तिय्यां ही लाड़ा भी अपणी लाड़ी जो तलाक ना दे।

¹²बाकि विश्वासियां जो प्रभु नी पर मैं बोल्लेया करदा है कि जे कुसकी संगी विश्वासी री लाड़ी प्रभु पर विश्वास ना करदी हो पर अपणे लाड़े कने रैह्णे बिच कने खुस हो, तां से लाड़ा तिसजो तलाक ना दे।

¹³अते जिस विश्वासी जनानी रा लाड़ा प्रभु पर विश्वास नी करदा हो, पर से अपणी विश्वासी लाड़ी कने रैह्णे बिच खुस हो, तां से जनानी अपणे लाड़े जो तलाक ना दे।

¹⁴किजोकी परमेश्वर तिस जनानी रे अविश्वासी लाड़े जो अपणे ही लोक्कां सांई समजदे किजोकी तिसेरी लाड़ी विश्वासी है। ते परमेश्वर तिस मणू री लाड़ी जो अपणे ही लोक्कां सांई समजदे किजोकी तिस जनानी रा लाड़ा विश्वासी है। जे अगर ए सच नी हुंदा तां तुसा रे बच्चे नाजायज़ होणे थिये, पर परमेश्वर तिन्हा जो जायज़ रे रुप बिच अपणांदे।

¹⁵पर जे अगर कुसकी विश्वासी जनानी रा लाड़ा अपणी लाड़ी जो तलाक दैणा चाए, ता तिन्हा जो तलाक देई करी बखरा होणा देयो। इदेयी हालत बिच कोई भी ब्यात्ते रे संगी विश्वासी कुसकी बन्धन बिच नी है किजोकी परमेश्वर ने असा जो सिर्फ सांती बिच रैह्णे तांइ ही सद्दे रा है।

¹⁶पर तुसा विश्वासी जनानियां जो इस गल्ल रा चेत्ता रखणा चाएदा कि होई सकदा कि तुसा रा अपणे लाड़ेयां कन्ने रैह्णे री वजह कने से शायद बदली जाए, ते तिय्यां ही विश्वासी मर्दां जो चेत्ता रखणा चाएदा कि होई सकदा कि तुसा रा अपणी अविश्वासी लाड़ियां कन्ने रैह्णे री वजह से बाद बिच बदली जाण।

¹⁷ते जिय्यां परमेश्वर ने हर इक्क जो जिस तरिक्के री जिन्दगी जीणे रा वरदान दित्ते रा है ते अप्पु का सद्दे रा है, से तिस्सी हिसाब कने अपणी जिन्दगी जीण, ते मैं भी सारी कलीसियां जो ए ही बोलदा।

¹⁸जे अगर कुसकी यहूदी मणू ने मसीह यीशु बिच विश्वास करणे का पैल्ले का ही खतना कराया हो तां से मणू मसीह बिच विश्वास करणे का बाद तिसजो वापिस बदलणे री कोसीस ना करे। तिय्यां ही अगर कुसकी मणू ने मसीह बिच विश्वास करणे का पैल्ले खतना ना कराया हो तां तिस मणू जो खतना कराणे री कोई जरुरत नी है।

¹⁹कुसकी मणू रे खतना कराणा या ना कराणा कोई बड्डी गल्ल नी है, किजोकी परमेश्वर रे हुकमां जो मनणा ही सबका बड्डी गल्ल है।

²⁰हर इक्क मणू तदेई ही जिन्दगी जिये जदेई जिन्दगी जीणे तांइ परमेश्वर ने तिन्हा जो सद्दे रा है।

²¹जां परमेश्वर ने तुसा जो सद्देया तां कै तुसा गुलाम थिये? तुसा इस गल्ल कने दुखी मत हुंदे, पर जे अगर तुसा जो अजाद जिन्दगी जीणे रा मौक्का मिलदा तां तिस मौक्के जो मत छडदे।

²²किजोकी जिस गुलाम जो परमेश्वर ने सद्दे रा है, से मणू परमेश्वर रा अजाद मणू है, तिय्यां ही तुसा बिच का हर इक्क अजाद मणू जिस जो मसीह यीशु ने सद्दे रा है से तिन्हेरा गुलाम है।

²³मसीह यीशु ने सुली पर कुर्बानी देई करी तुसा री कीमत चुकाए री है इधेरे तांइ कुसकी मणू रे नी पर परमेश्वर रे गुलाम बणो।

²⁴ओ संगी विश्वासियों, परमेश्वर ने जिस मणू जो जदेई जिन्दगी जीणे तांइ सद्दे रा है, से मणू परमेश्वर कने तदेई ही जिन्दगी जिए।

²⁵कुंआरी कुड़ियां तांइ प्रभु का कोई भी हुकम मेरे जो नी मिल्लेया, पर परमेश्वर ने अपणी दया कने मेरे जो जे ज्ञान दित्ते रा है से भरोस्से रे लायक है ते मैं तुसा जो सलाह दिंदा,

²⁶किजोकी आज्‍ज-कल विश्वासी मणूआं कने तंगी-मुसीबतां वाली गल्लां होया करदी हिन, इधेरे तांइ मैं ए ही सलाह दैणा चाह्‍ंगा कि जे मणू जिय्यां हिन तिय्यां ही रेयो।

²⁷जे अगर तू ब्यात्ते रा है, तां अपणी लाड़ी जो तलाक मत दे, ते जे अगर तू ब्यात्ते रा नी है, तां ब्याह करणे री कोसीस मत कर।

²⁸पर जे तू ब्याह करगा, तां से कोई पाप नी है, ते जे अगर कुंवारी कुड़ी रा ब्याह कित्तेया जाए, तां से भी कोई पाप नी। ब्यात्ते रे मणू जो अपणी जिन्दगी बिच बड़ी दुख-भरी चीजां सैह्‍णा पैणी ते मैं तुसा जो तिन्हा तकलिफां का बचाणा चाह्‍ंदा।

²⁹ओ संगी विश्वासियों, मैं ए बोलदा कि असा का इस दुनिया बिच जादा समय नी है, इधेरे तांइ जरुरी है कि से ब्याह होणे रे बावजूद भी परमेश्वर री सेवा इय्यां करण कि जिय्यां से हल्ले भी कुंवारे हिन।

³⁰जे मणू दुख मनाया करदे हिन, ते जे मणू खुसी मनाया करदे हिन या जे मणू चीजां खरिद्देया करदे हिन तिन्हा सारेयां जो परमेश्वर री सेवा करणे बिच इय्यां मन लाणा चाएदा जिय्यां कि से मणू इन्हा बिच का कोई भी चीज ना करदे होण।

³¹किजोकी असी जाणदे कि इस दुनिया ने बड़े तौले ही मुकी जाणा इधेरे तांइ तुसा बिच का कुसकी जो भी दुनिया री कुसकी भी चीज कने बड़ा जादा दिल नी लाई लैणा चाएदा।

³²इधेरे तांइ मैं चाह्‍ंदा कि तुसा जो रोज़-मर्रा री जिन्दगी री फिकर का अजाद रेयो। जे मर्द बगैर ब्याह कित्ते रे रैहन्दा, से सिर्फ प्रभु री गल्लां री फिकर बिच रैहन्दा ते तिन्हा जो खुस करदा रैहन्दा

³³पर ब्यात्ते रा मणू दुनिया री गल्लां री फिकर बिच रैहन्दा, कि किय्यां अपणी लाड़ी जो खुस रख्खे। तिस मणू री रूचियां बडीं गे री हिन।

³⁴दो तरिक्के री जनानियां हुंदी, इक्क ता बगैर ब्याए री जनानियां हुंदी ते दुई ब्यात्ते री जनानियां हुंदी। ब्यात्ती री जनानियां ते बगैर ब्याए री कुड़ी बिच भी ए फरक है कि बगैर ब्याए री जनानियां प्रभु री सेवा री फिकर बिच रेह्न्दी कि से हमेसा परमेश्वर जो खुस करे। पर ब्याए री जनानियां दुनिया री गल्लां फिकर बिच रेह्न्दी कि अपणे लाड़े जो किय्यां खुस रख्खे।

³⁵ए गल्लां तुसा जो फसाणे तांइ नी पर तुसा रे फायदे तांइ ही बोल्लेया करदा है, बल्कि इधेरे तांइ कि जे सही है तिय्यां ही कित्तेया जाये, कि तुसा इक्क मन होई करी प्रभु री सेवा बिच लग्गी रेयो।

³⁶जे अगर तुसा बिच कोई मणू अपणी जुआन कुड़ी रा ब्याह नी करांदा पर अवे तिसजो ए लगदा कि इय्यां करणा सही नी है, पर तिसजो अवे इय्यां लगदा कि तिसजो अपणी कुड़ी रा ब्याह कराणा चाएदा, तां इस मामले बिच तिसजो से ही करणा चाएदा जे तिसजो सही लगदा। से अपणी कुड़ी रा ब्याह कराई करी पाप नी है करेया करदा। तिसजो अपणी कुड़ी रा ब्याह कराणे रा इंतजाम करणा चाएदा।

³⁷पर जे अगर तिस मणू ने अपणे मन बिच ठाणी लेरां हो कि तिसेरी कुड़ी तांइ बगैर ब्याए ही रैह्णा सही है, तां तिस मणू जो से करणे रा पूरा हक्क है जे तिसजो इस मामले बिच सही लगदा। ते जे अगर से अपणी कुड़ी जो बगैर ब्याए ही रखणा चाह्‍ंदा, तां से सही करदा।

³⁸इधेरे तांइ जे कोई अपणी कुंवारी कुड़ी रा ब्याह कराई दिंदा, से खरा करदा। ते जे ब्याह नी करांदा से भी खरा ही करदा।

³⁹जां तांइ कुसकी जनानी रा लाड़ा जिंदा है, तां तांइ तिसजो अपणे लाड़े जो नी छडणा चाएदा। पर जां तिसेरा लाड़ा मरी जाये तां फिरी से जिस मर्जी कने चाए ब्याह करी सकदी, पर सिर्फ कुसकी विश्वासी कने ही।

⁴⁰पर जे अगर से बगैर ब्याए ही रेह्न्दी, तां मैं समजदा कि से होर भी जादा खरा है। मेरे जो कि मैं परमेश्वर रे पास्से का तुसा जो ए सब किच्‍छ सिखाया करदा है।