Read Chambeali 1 कुरुन्थियों 8 Bible Online

1 कुरुन्थियों 8 - Chambeali bible

1 कुरुन्थियों 8

¹तुसा अपणी चीठ्ठी बिच मेरे का मूर्तां जो भेंट चढ़ाए री रोट्टी रे बारे बिच पूच्छेया थिया। असा सारे ही इस मामले रे बारे बिच थोड़ा-मता जाणदे। पर ज्ञान असा जो घमंडी बणाई दिंदा, जदकी प्यार असा जो बाकि लोक्कां तांइ मददगार बणाई दिंदा।

²तुसा इय्यां समजदे कि तुसा किच्‍छ जाणदे, पर हल्ले तांइ तुसा इस तरिक्के कने नी जाणदे जिस तरिक्के तुसा जो जाणदा चाएदा।

³परमेश्वर अपणे प्यार करणे वालेयां जो पैछाणदे।

⁴ता अवे मैं मूर्तां जो भेंट चढ़ाए री चीजां जो खाणे रे सवाल रा जवाब दैणा चाह्‍ंदा। मूर्तां रे सामणे चढ़ाए री चीजां रे बारे बिच असी जाणदे। मूर्तां कोई सच्ची परमेश्वर नी हिन, सिर्फ इक्क ही सच्चा परमेश्वर है। पर असा तांइ इक्क ही प्रभु हिन ते से असा रे पिता हिन, तिन्हा ने ही सारी चीजां जो बणाया ते असी तिन्हा तांइ ही जिन्दे, पर तां भी असा तांइ तां इक्क ही परमेश्वर हिन ते से असा रे पिता हिन। तिन्हा ने सब किच्‍छ बणाए रा है, ते तिन्हेरी वजह कने ही असी जिन्दे हिन। तिय्यां ही असा रे इक्क ही प्रभु हिन ते से मसीह यीशु हिन। तिन्हेरे जरिये ही सब किच्‍छ बणाया गेया ते तिन्हेरे जरिये ही असी जिया करदे हिन।

⁷पर किच्‍छ विश्वासी मणू हल्ले भी इस गल्ल जो नी समजदे कि मूर्तां बिच कोई ताकत नी है, किजोकी पैल्ले से मणू अप्पु भी तिन्हा मूर्तां री पूजा करदे थिये, पर अवे जां से मणू तिस रोट्टी जो खांदे जे मूर्तां जो भेंट चढ़ाए री हुंदी, तां तिन्हा जो इय्यां लगदा कि से मणू मूर्ति पूजा करेया करदे हिन। तां फिरी से मणू अपणे ही ख्यालां बिच परेशान हुंदे रैह्‍न्दे। अपणे दिल बिच तिन्हा जो इय्यां लगदा रैहन्दा कि तिन्हा ने मूर्ति जो चढ़ाए री रोट्टी खाई करी पाप कित्ते रा है।

⁸पर रोट्टी असा जो परमेश्वर रे नेड़े नी लाई सकदी। खाणे का मना करणे कने असी परमेश्वर जो घट खुस करणे वाला नी बणी जांदे। ते ना ही खाणे कने असी परमेश्वर जो जादा खुस करी सकदे।

⁹पर चुकन्ने रेयो! इय्यां ना हो कि तुसा रे इय्यां करणे री वजह कने कुसकी संगी विश्वासी रा मसीह यीशु बिच विश्वास कमजोर होई जाओ।

¹⁰पर जे अगर कोई मणू जे विश्वास बिच कमजोर है, तेरे जो इक्क मूर्ति जो भेंट चढ़ाए री चीज खांदे दिख्खे, ते ए जाणदे होए भी इय्यां करणा पाप है, पर तां भी तिसजो से चढ़ाए री रोट्टी खाणे री चुक्क मिली जाणी।

¹¹इस तरिक्के कने तेरे जाणदे होए भी तेरा संगी विश्वासी जिसेरा विश्वास कमजोर है तिनिए मसीह बिच विश्वास करणा छड्डी दैणा, जिसेरे तांइ मसीह यीशु ने अपणी जान दित्ती थी।

¹²जां तुसा कुसकी संगी विश्वासी तांइ से कम्म करणे री वजह बणदे जे तिन्हेरी नजर बिच गलत है, तां तुसा मसीह रे खिलाफ पाप करदे।

¹³इस वजह कने अगर मूर्तां रे सामणे चढ़ाए री रोट्टी खाणा मेरे संगी विश्वासी रे मसीह यीशु बिच विश्वास करणे का हटणे री वजह बणदा तां मैं कदी कुसकी भी तरिक्के कने से रोट्टी नी खाणी, इय्यां ना हो कि मैं अपणे संगी विश्वासियां तांइ विश्वास का भटकणे री वजह बणी जां।