Read Chambeali 2 कुरुन्थियों 13 Bible Online

2 कुरुन्थियों 13 - Chambeali bible

2 कुरुन्थियों 13

¹ए तिज्जी वरी है जां मैं तुसा जो मिलणे तांइ आया करदा है, जिय्यां कि पवित्रशास्त्र बिच लिख्खे रा है, “हर मामले जो दो या त्रै गवाह रे सामणे साबित कित्तेया जाए।”

²जां मैं दूज्जी बाहर तुसा कने मिलणे तांइ आया थिया, तां मैं पाप बिच जिन्दगी जीणे वाले मणूआं जो चितौणी दित्ती थी। ते अवे दुबारा, मैं तिन्हा जो ते बाकि सारे जणेया जो चितौणी देया करदा है, जिय्यां कि मैं पैल्ले भी दित्ती थी, कि जां मैं तुसा का फिरी आणा तां तिन्हा जो छडणा नी जे मणू अपणे पाप्पां का तौबा नी करदे।

³हालांकि तुसा इस गल्ल रा सबूत चाह्‍ंदे कि मसीह यीशु मेरे जरिये गल्ल करदे। जां मसीह तुसा री गलतियां जो सुधारदे तां से कमजोर नी हिन; से तुसा लोक्कां बिच ताकतवर हिन।

⁴मसीह यीशु सरीर री कमजोरी बिच सुली पर चढाई करी मारे गे, ते अवे परमेश्वर री ताकत रे जरिये जिया करदे हिन, तिस्सी तरिक्के कने असी भी मसीह यीशु सांई सरीर रे तौर पर कमजोर हिन, पर असी परमेश्वर री ताकत कने तुसा रे मामलेयां जो निपटाणे तांइ, मसीह यीशु कने जीणा।

⁵अपणे आप जो परखो ते समझो कि मसीह यीशु बिच तुसा रा विश्वास सच्चा है या नी। तुसा पक्के तौर पर जाणदे कि मसीह यीशु तुसा बिच वास करदे; ते जे अगर तुसा बिच वास नी करदे, तां तुसा रा विश्वास सच्चा नी है।

⁶मेरी ए आस है कि तुसा ए ही पाओ कि असा रा विश्वास सच्चा है।

⁷असी परमेश्वर का ए प्रार्थना करदे कि तुसा मणू कोई पाप ना करो, ए दिखाणे तांइ नी कि असी कामयाब होई गे, पर सिर्फ इधेरे तांइ कि तुसा भलाई रे कम्म करो, भले ही असी निकम्मे समजे जाण।

⁸किजोकी असी सच्चाई रे खिलाफ किच्‍छ नी करी सकदे, पर सच्चाई तांइ सब किच्‍छ करी सकदे।

⁹पर जिस बेल्ले असी कमजोर हुंदे ते तुसा ताकतवर हुंदे, तां असा जो बड़ी खुसी हुंदी, इसेरे अलावा असी प्रार्थना भी करदे कि तुसा मसीह यीशु बिच विश्वास करणे बिच सिद्व होई जाओ।

¹⁰इधेरे तांइ मैं तुसा का आणे का पैल्ले तुसा जो ए गल्लां चीठ्ठी बिच लिख्खेया करदा है, ताकि मेरे जो प्रभु रे दित्ते रे हक जो तुसा जो सजा देई करी दसणे री जरुरत ना पेयो। किजोकी मैं तिस हक जो तुसा रे विश्वास जो मजबूत करणे तांइ इस्तेमाल करण चाह्‍ंदा ना कि तोड़ने तांइ।

¹¹ओ मेरे संगी विश्वासियों, खुस रेयो; ते मसीह बिच विश्वास करणे बिच सिद्व बणदे जाओ; अप्पु-मिते इक्क मन बणी करी रेयो, ते प्यार ते सांती दैणे वाले परमेश्वर तुसा कने रैह्णा।

¹²इक्क-दूए जो मसीही प्यार कने नमस्ते करो।

¹³सब पवित्र मणू तुसा जो नमस्ते बोलदे।

¹⁴असा रे प्रभु यीशु रा अनुग्रह, ते परमेश्वर रा प्यार ते पवित्रात्मा री संगती, तुसा सबणी कने बणी रेयो।