Read Chambeali 2 कुरुन्थियों 3 Bible Online

2 कुरुन्थियों 3 - Chambeali bible

2 कुरुन्थियों 3

¹असी फिरी अपणी तारिफ नी हिन करेया करदे। ते असा जो बाकि मणूआं सांई तुसा जो अपणी सिफारिश करणे तांइ चीठ्ठियां दैणे या लैणे री बिल्कुल भी जरुरत नी है।

²तुसा ता अप्पु ही चीठ्ठियां सांई हिन जे परमेश्वर तांइ कित्ते रे मेरे कम्मां री सिफारिश करदे ते जिन्हा जो सारे मणू पढदे ते समजदे।

³साफ तौर पर तुसा मसीह यीशु रे पास्से का चीठ्ठियां सांई हिन जे असा री सेवकाई रा नतीज्जा है, जे सलेट पर नी लिख्खे गेरे हिन पर परमेश्वर री आत्‍मा कने असा रे दिल री सलेट पर लिख्खे गेरे हिन।

⁴असी इय्यां इधेरे तांइ बोलदे किजोकी मसीह यीशु रे जरिए, परमेश्वर रे सामणे असा जो इदेइ हिम्मत हुंदी।

⁵असी नी बोलदे कि असा बिच अप्पु किच्‍छ करणे री काबलियत है, पर परमेश्वर असा जो ए सब करणे री काबलियत दिंदे।

⁶तिन्हा ने असा जो परमेश्वर रे नौए वाचा रे सेवक होणे रे काबिल बणाए रा है, ए नौई वाचा मूसा रे कानून बिच लिख्खे री गल्लां रा नी है पवित्रात्मा रा है। किजोकी मूसा रे कानून पर ना चलणे पर ता मौत मिलदी, पर परमेश्वर री नौई वाचा रे जरिये पवित्रात्मा असा जो हमेसा री जिन्दगी दिंदा।

⁷जां मूसा रा कानून जे पत्थर री सलेटां पर लिख्खेया गेया थिया, तां तिस बेल्ले परमेश्वर री महिमा दिख्खी गयी थी, इस्राएल रे मणू मूसा रे चेहरे जो जादा देर तिकर नी दिख्खी सके, किजोकी से बड़ा चमकेया करदा थिया[2] पर तिसेरी चमक भी जादा देर तिकर नी रेई, इधेरे तांइ जे अगर मूसा रे कानून पर आधारित सेवकाई जे मौत पास्से लेई जांदी, अगर इन्नी जादा चमकदार है, तां फिरी नौई वाचा रे अधीन होई करी परमेश्वर री पवित्रात्मा री सेवकाई करणे बिच इसका भी जादा महिमा होणी।

⁹किजोकी जां कसुरवार ठैहराणे वाला, मूसा रे कानून महिमामय थिया, तां पक्के तौर पर धार्मिक ठैहराणे वाली नौई वाचा बिच होर भी जादा महिमामय होणी।

¹⁰हकीकत बिच नौई वाचा इन्नी जादा अनौखी है कि मूसा रा कानून अवे महिमामय नी रेया।

¹¹मूसा रा कानून इक्क बड़ी महिमा कने दित्तेया गेया थिया जे जादा देर तिकर नी रेई। पर नौई वाचा री महिमा जादा बड्डी है किजोकी से हमेसा तिकर रैह्णी।

¹²इधेरे तांइ इदेइ आस रख्खी करी असी हिम्मत कने बोलदे।

¹³अते असी मूसा सांई नी हिन जे अपणे मुँह पर परदा पाई रखदा थिया ताकि इस्राएल रे मणू तिसेरे चेहरे पर परमेश्वर रे चमक जो घटदे-घटदे ते मुकदे होए ना दिख्खे।

¹⁴तिन्हेरी समझ मंद होई गे री है, किजोकी अज्ज तांइ जां से तिस मूसा रे कानून जो पढ़दे, तां से ही परदा तिन्हेरी समझ पर पेई रैहन्दा, पर से परदा वस मसीह यीशु पर विश्वास करणे रे जरिए ही हटदा।

¹⁵ते अज्ज तांइ जां भी मूसा रा कानून पढ़ेया जांदा तां मणू तिसजो पूरी तरिक्के कने समजी नी पांदे।

¹⁶पर जां कोई मणू मसीह यीशु बिच विश्वास करदा तां तिसेरी समझ का से परदा हटाई दित्ता जांदा।

¹⁷प्रभुता आत्‍मा हिन, अते जित्ते कुते प्रभु रा आत्‍मा है, तित्ते मूसा रे कानून का अजादी है।

¹⁸असी सारे प्रभु री महिमा जो अपणे उघाड़े रे चेहरे कने इक्क सीसा सांई प्रकाशित करदे। असा जो अपणे सांई बणाणे तांइ तिस चमकदार महिमा बिच जादा का जादा बदलेया करदे हिन। ते ए महिमा परमेश्वर रे पास्से का है, जे पवित्रात्मा रे रुप बिच असा का है।