Read Chambeali 2 कुरुन्थियों 5 Bible Online

2 कुरुन्थियों 5 - Chambeali bible

2 कुरुन्थियों 5

¹जिय्यां कि असी जाणदे कि इस दुनिया बिच असा रा सरीर इक्क तम्बू सांई है जित्ते असी रैहन्दे। जां असी मरी जाणा तां असा जो परमेश्वर रे पास्से का स्वर्ग का इक्क इदेया सरीर मिलणा जे हत्थां रा बणे रा नी पर हमेसा तिकर रैह्णे वाला है।

²इस सरीर बिच ता असी पीड़ां कने किल्दे रैहन्दे ते बड़ी तमन्‍ना रखदे की अपणे स्वर्गीय सरीर जो पाई लैण।

³ताकि जां असी अपणे स्वर्गीय सरीर जो पाई लैण तां असी तिसेरे बगैर ना पाए जाण।

⁴ते असी इस सरीर बिच रैहन्दे होए जे इस दुनिया बिच असा रे तम्बू सांई है, बोझ कने किल्दे रैहन्दे, किजोकी असी अपणे इस दुनिया रे सरीर जो उतारणा नी चाह्‍ंदे पर स्वर्गीय सरीर जो भी पाई लैणा चाह्‍ंदे, ताकि असा रे नौए स्वर्गीय सरीर असा रे इन्हा शरीरां कने बदली जाए जे इक्क दिन मुकी जाणे।

⁵जिन्हा ने असा जो स्वर्गीय सरीर जो पाणे तांइ तैयार कित्ते रा है, से परमेश्वर है, जिन्हा ने असा जो अमानत बिच पवित्रात्मा भी दित्ते रा है।

⁶अते असी हमेसा हिम्मत बणाई रखदे ते ए जाणदे की जां तिकर असी सरीर बिच रैहन्दे, तां तांइ असी प्रभु कने नी स्वर्ग बिच नी रेया करदे हिन।

⁷हल्ले जां असी इस दुनिया बिच जिया करदे हिन, तां असी प्रभु रा अनुसरण तिन्हा जो दिख्खी करी नी पर विश्वास करणे रे जरिये करेया करदे हिन।

⁸इस तांइ असी हिम्मत बणाई रखदे कि मरणे रे बाद सरीर जो छड्डी करी प्रभु कने रैह्णा होर भी जादा खरा समजदे।

⁹इस तांइ असा रे मन री खुसी ए है कि चाए असी तिन्हा कन्ने स्वर्ग बिच रैह्ण या चाए तिन्हा का दुर इस दुनिया बिच रैह्ण, पर असी तिन्हा जो पसंद आंदे रैह्ण।

¹⁰किजोकी जरुरी है असा सारेयां रा हाल मसीह यीशु रे असा रा हिसाब-किताब करदे बेल्ले खुली जाए, की हर इक्क मणू अपणे भले-बुरें कम्मां रा बदला पाए जे तिन्हा ने सरीर रे जरिए कित्ते होण।

¹¹इस तांइ परमेश्वर रा डर मन्नी करी असी लोक्कां जो छंदे करी के परमेश्वर रे सच पर विश्वास करणे तांइ समझांदे ते तिन्हेरे सामणे असा रा हाल प्रकट है, ते मेरे जो ए आस है की तुसा रे विवेक पर भी असा रा हाल प्रकट होया होणा।

¹²असी फिरी भी अपणी तारिफ तुसा अग्गे नी करदे, पर असी तुसा जो असा रे बारे बिच गर्व करणे रा मौक्का दिदें, तुसा तिन्हा जो जवाब देई सको, जे मन पर नी पर दिखावटी गल्लां पर घमंड करदे।

¹³जे अगर कोई बोल्ले कि असी बेसुध हिन तां सिर्फ परमेश्वर तांइ हिन, ते जे अगर असी होश बिच हिन, तां तुसा तांइ हिन।

¹⁴किजोकी मसीह यीशु रा प्यार असा जो मजबूर करी दिंदा, किजोकी असी ए समजदे की जां इक्क मणू सारे लोक्कां तांइ मरेया तां सारे मरी गे।

¹⁵ते मसीह इधेरे तांइ सारेयां तांइ मरेया कि जे मणू जिन्दे हिन, से अग्गे जो अपणे तांइ ना जिन्दगी ना जीण पर तिन्हेरे तांइ जीण जे तिन्हेरे तांइ मरेया ते फिरी मरे रे लोक्कां बिच का जिन्दा होई गेया।

¹⁶अते अवे असी कुसकी होर जो इन्सानी तौर-तरिक्के रे हिसाब कने नी समजगे हालांकि असा ने भी मसीह यीशु जो इन्सानी तौर-तरिक्के रे हिसाब कने समजेया, तां भी अब्बे का असी तिन्हा जो इदेया नी जाणगे।

¹⁷इस तांइ जे कोई मसीह यीशु बिच विश्वास रखदा तां से नौई रचना है: पुराणी जिन्दगी बीती गे री है, अवे नौई जिन्दगी री सुरुआत होए री है।

¹⁸ए सारी गल्लां परमेश्वर रे पास्से का है, जिन्हा ने मसीह यीशु रे जरिए असा रा अप्पु कने मेल जोल करी दित्ता, ते अप्पु कने लोक्कां रा मेल जोल करणे री सेवा असा जो सौंप्पि दित्ती।

¹⁹इसेरा मतलब ए है कि परमेश्वर ने मसीह यीशु बिच होई करी अपणे कन्ने दुनिया रा मेल जोल करी लित्ता, ते लोक्कां रे पाप्पां रा इल्जाम तिन्हा पर नी लाया। ते ए ही मेल जोल कराणे रा से बसेख है, जे परमेश्वर ने लोक्कां जो सुनाणे तांइ असा जो सौंप्पे रा है।

²⁰इस तांइ असी मसीह यीशु रे राजदूत हिन मन्नों परमेश्वर असा रे जरिए बिनती करेया करदे हिन; असी मसीह यीशु रे पास्से का बिनती करेया करदे हिन की परमेश्वर कने मेल जोल करी लेयो।

²¹मसीह जे पाप का अनजाण थिये, तिन्हा ही जो परमेश्वर ने असा तांइ पाप्पी ठैहराया ताकि परमेश्वर असा जो मसीह रे कित्ते रे कम्मां रे जरिये धार्मिक ठैहराण।