Read Chambeali 2 कुरुन्थियों 9 Bible Online

2 कुरुन्थियों 9 - Chambeali bible

2 कुरुन्थियों 9

¹अवे यरुशलेम रे विश्वासियां री आर्थिक रुप बिच सेवा करणे रे बारे बिच मेरे जो तुसा तांइ लिखणे री जरुरत नी है।

²किजोकी मैं जाणदा कि तुसा मदद करणे तांइ बड़े जादा उत्सुक हिन, जिसेरी वजह कने मैं तुसा रे बारे अन्दर मकिदुनिया प्रदेश रे बिच रैह्णे वाले विश्वासियां रे सामणे गर्व करदा कि तुसा मणू अखाया प्रदेश बिच इक्क साल का तैयार हिन, ते तुसा रे जोस ने होर भी मते लोक्कां जो उभारे रा है।

³पर मैं तीतुस ते होर दो विश्वासी भ्यालां जो इधेरे तांइ भेज्जेया करदा है, ताकि तुसा पर असा रा गर्व इस गल्ल बिच बेकार ना जाओ, पर जिय्यां मैं बोल्ले रा है तिय्यां ही तुसा यरुशलेम सहर रे विश्वासियां री आर्थिक रुप बिच सेवा करणे तांइ तैयार रेयो।

⁴इय्यां ना हो कि अगर मकिदुनिया प्रदेश रा रैह्णे वाला कोई विश्वासी मेरे कन्ने आओ, ते से दिख्खो कि तुसा मणू तैयार ही नी हिन, तां होई सकदा कि असी तुसा पर बड़ा भरोस्सा करणे री वजह कने शर्मिंदा होई जाण, पर तुसा असा का भी जादा शर्मिंदा होणा।

⁵इधेरे तांइ मैं विश्वासी भ्यालां का छंदे करणा जरुरी समजेया, कि से पैल्ले का ही तुसा का जाण, ते तुसा रे उदारता रे भाव जिसेरे बारे बिच पैल्ले का दस्सेया गेया थिया, तैयार करी रखण, कि ए दवाब कने नी पर उदारता रे भाव का ही तैयार होण।

⁶पर गल्ल इदेयी है: कि जिन्ने घट्ट बाणा, तिनिए घट्ट ही कटणा है ते जे जादा बांदा, तिनिए मता बडणा।

⁷हर इक्क मणू जदेया से अपणे मन बिच पक्का करी लेयो तदेया ही दान करो। ना ता कुढ़ी-कुढ़ी करी ते नां ही कुसकी दवाब री वजह कने से दान करो, किजोकी परमेश्वर खुसी कने दान दैणे वालेयां कने प्यार करदे हिन।

⁸ते परमेश्वर ने बड़ी उदारता कने तुसा जो हर किस्म री आशीष दे। जिस कने हर गल्ल बिच, हर बेल्ले तुसा का अपणी जरुरत री हर चीज रे, ताकि भले कम्म करणे तांइ तुसा का जरुरत का भी जादा रे।

⁹जिय्यां कि पवित्रशास्त्र बिच लिख्खे रा है, “तिनिए खलारेया, तिनिए कगांला जो दान दित्तेया, तिन्हेरी धार्मिकता हमेसा तिकर बणी रेह्णी।”

¹⁰किजोकी परमेश्वर ही हिन जे किसान जो बाणे तांइ बीह् ते तिसेरे जरिये रोट्टी भी उपलब्ध करांदे। तिस्सी तरिक्के कने, तिन्हा ने तुसा जो साधन उपलब्ध कराणे ते तिन्हा जो बधाणा ते तुसा बिच का उदारता री फसल जो कटणा।

¹¹तुसा ने हर तरिक्के कने आशीष पाणी, ते तिस्सी कने ही तुसा उदारता कने दान दैणे रे जोग्गे भी बणना। ते जां असी तुसा रे उदार दान जो जरुरतमंद लोक्कां तिकर पूजाणा, तां तिन्हा लोक्कां ने परमेश्वर रा शुकर करणा।

¹²किजोकी इस सेवा जो पूरा करणे कने ना सिर्फ गरीब विश्वासियां री जरुरतां पूरी हुंदी, पर मणूआं रे पास्से का परमेश्वर रा भी बड़ा शुकर कित्तेया जान्दा

¹³किजोकी दूज्जेयां जो आर्थिक रीति कने सेवा करणे जो सबूत मन्नी करी तिन्हा ने परमेश्वर री महिमा करणी किजोकी तुसा ने मसीह यीशु रे सुब बसेख जो मन्नी करी तिन्हेरे अधीन रैहन्दे, ते से गरीब विश्वासी भाईयां री ते सारेयां री मदद करणे बिच बड़े उदार रैहन्दे। ते तुसा जो मिलणे री बड़ी लालसा करदे।

¹⁴ते तिन्हा ने तुसा तांइ परमेश्वर का प्रार्थना करणी। से तुसा जो प्यार करदे किजोकी से जाणदे कि परमेश्वर ने तुसा पर बड़ा अनुग्रह ते आशीष दित्ते री है।

¹⁵आओ असी परमेश्वर रा तिन्हेरे पुत्तर जो इक्क दान रे स्वरूप बिच दैणे तांइ तिन्हेरा शुकर करण, जिसेरा कोई ज़िकर नी करी सकदा।