Read Chambeali इफिसियों 5 Bible Online

इफिसियों 5 - Chambeali bible

इफिसियों 5

¹इधेरे तांइ तुसा रा स्वभाव भी परमेश्वर रे स्वभाव जदेया हो किजोकी तुसा परमेश्वर री औलाद्दां हिन।

²जिय्यां मसीह यीशु ने तुसा कने प्यार कित्तेया, तिय्यां ही तुसा भी सारेयां कने प्यार करो। मसीह ने अप्पु जो तुसा रे पाप मिटाणे तांइ कुर्बान करी दित्ता ते से कुर्बानी परमेश्वर रे सामणे इक्क खुशबूदार भेंट सांई थिया।

³किजोकी तुसा परमेश्वर रे अपणे मणू हिन इधेरे तांइ तुसा बिच व्यभिचार ते कुसकी तरिक्के रे बुरे कम्म या लालच री गल्ल-बात भी ना हो।

⁴ते ना गाल-मुआल, ना बेशर्मी री गल्लां, ना बेवकूफी री गल्लां ते ना ही मजाक उड़ाणे री गल्लां हो किजोकी इदेय गल्लां तुसा जो नी जचदी। पर तुसा जो हमेसा परमेश्वर रा शुक्रिया करणा चाएदा।

⁵किजोकी तुसा ए ठीक तरिक्के कने जाणदे की कुसकी व्यभिचारी या बुरे मणू, या लालच करणे वाले मणू जो जे मूर्ति या दुनियावी चीजां री पूजा करणे रे बराबर है, मसीह यीशु ते परमेश्वर रे राज बिच विरासत नी मिलणी।

⁶इधेरे तांइ इदेय लोक्कां का धोख्खा मत खांदे जे इन्हा पाप्पां जो करणे तांइ बहान्ने बणांदे किजोकी इन्हा ही कम्मां री वजह कने परमेश्वर रा गुस्सा तिन्हेरे हुकमां री ना-फरमानी करणे वालेयां पर भड़कदा।

⁷इस तांइ तुसा तिन्हेरे पाप्पां बिच हिस्सेदार मत बणो।

⁸तुसा पैल्ले न्याहरे बिच जीणे वाले मणूआं सांई थिये, पर अवे तुसा रौसनी रे मणू हिन किजोकी तुसा परमेश्वर रे मणू हिन। इधेरे तांइ रौसनी रे मणूआं सांई जिन्दगी जियो।

⁹किजोकी रौसनी बिच जीणे वाले मणूआं रा स्वभाव हर तरिक्के कने भला, ते धार्मिकता ते भरोसेमंद है।

¹⁰ते ए परखो की परमेश्वर जो कै पसंद आदां।

¹¹न्याहरे रे नाकाम पाप्पां बिच हिस्सेदार मत बणो, बल्कि लोक्कां जो फटकार लाई करी दस्सो कि से कम्म गलत हिन।

¹²किजोकी पाप्पी लोक्कां रे लुके रे कम्मां री गल्ल करणा भी शर्म री गल्ल है।

¹³पर जिन्नी गल्लां पर फटकार लाई जांदी से गल्लां लोक्कां जो साफ तरिक्के कने पता चलदी कि से गलत हिन, किजोकी रौसनी हर चीज जो ज़ाहिर करदी।

¹⁴इधेरे तांइ ए बोल्लेया जांदा, “ओ सोणे वाले मणू, जाग, ते मुर्देयां बिच का जिन्दा होई जा! मसीह ने तुसा पर अपणी रौसनी चमकाणी।”

¹⁵इधेरे तांइ ध्यान देयो कि तुसा कदेइ जिन्दगी जिया करदे हिन, बेवकूफ लोक्कां सांई मत बणो पर समजदार बणो।

¹⁶भलाई रे कम्मां तांइ हर इक्क मौक्के जो कीमती समझो, किजोकी दिन बुरे हिन।

¹⁷इस तांइ बेफकुफ मत बणो, पर ध्यान कने समझो की परमेश्वर री मर्जी कै है?

¹⁸सराब पी करी मतवाल्ले मत बणो किजोकी इस कने बेकाबू होई करी बेशर्मी रे गलत कम्म हुंदे। पर इसेरे बजाए पवित्रात्मा रे काबू बिच जिन्दगी बिताओ,

¹⁹ते अप्पु-मिते इक्क दूए जो भजन संहिता सूणाई करी होंसला देया करो। स्तुतीगान ते आत्मिक गीत गाई करी परमेश्वर री महिमा करेया करो, ते अपणे-अपणे मनां बिच परमेश्वर रे सामणे गांदे ते किर्तन करदे रेयो।

²⁰ते हमेसा सारी गल्लां तांइ असा रे प्रभु यीशु मसीह रे नां कने परमेश्वर पिता रा शुकर करदे रेया करो।

²¹मसीह यीशु रा आदरमान करणे तांइ इक्क-दूए रे अधीन रेया करो।

²²ओ लाड़ियों, जिय्यां तुसा मसीह रे अधीन हिन तिय्यां ही अपणे लाड़ेयां रे भी अधीन रेयो।

²³किजोकी लाड़ा तिस्सी तरिक्के कने अपणी लाड़ी रा सिर है जिय्यां मसीह यीशु कलीसिया रे सिर ते छुटकारा दैणे वाले हिन जे तिन्हेरे सरीर है।

²⁴जिय्यां कलीसिया मसीह यीशु रे अधीन है तिय्यां ही लाड़ीया भी हर गल्ल बिच अपणे-अपणे लाड़ेयां रे अधीन रहे।

²⁵ओ लाड़ेयों, अपणी-अपणी लाड़ियां कने प्यार रखो, जिय्यां मसीह यीशु ने भी कलीसिया कने प्यार कित्ता ते अप्पु जो तिस तांइ कुर्बान करी दित्ता

²⁶ताकि तिसजो अपणे वचन रे जरिए जल रे स्नान कने साफ करी के पवित्र बणाए।

²⁷तिन्हा ने इधेरे तांइ भी कुर्बानी दित्ती ताकि से अपणे सारे लोक्कां जो सिद्व बणाए ते तिन्हा सारेयां जो अपणी मौजुदगी बिच लेई आए जिन्हा बिच कोई भी गलती या पाप नी होणा, बल्कि तिसने साफ ते पवित्र होणा।

²⁸इसी तरिक्के कने लाड़ा अपणी लाड़ी कने अपणे सरीर रे बराबर प्यार करे। जे अपणी लाड़ी कने प्यार रखदा, से अप्पु कने प्यार करदा।

²⁹किजोकी कुसकी ने कदी अपणे सरीर कने नफरत नी कित्ती बल्कि तिसेरा ख्याल रखदा, जिय्यां मसीह यीशु भी कलीसिया रा ख्याल रखदे।

³⁰किजोकी असी मसीह रे सरीर रे अगं हिन।

³¹इधेरे तांइ पवित्रशास्त्र बिच लिख्खे रा है, “मणू ने अपणे मां-प्यो जो छड्डी करी अपणी लाड़ी कने रैह्णा, ते तिन्हा ने अप्पु-मिते इक्क सरीर सांई होणा।”

³²ए बड़ा बड्डा राज़ है, पर मैं मसीह यीशु ते कलीसिया रे बारे बिच बोलदा।

³³ए ही गल्ल तुसा बिच का हर इक्क पर लागू हुंदी कि तुसा सारे अपणी लाड़ियां कने अपणे बराबर प्यार रख्खे, ते लाड़ी भी अपणे लाड़े री इज्जत करे।