Read Chambeali इफिसियों 6 Bible Online

इफिसियों 6 - Chambeali bible

इफिसियों 6

¹पवित्रशास्त्र बिच लिख्खे रा है, “अपणे मां-प्यो रा आदरमान करो, तां फिरी तुसा तांइ हर चीज ठीक होणी, ते तुसा लम्बी उमर तिकर जीणा।” ए पैल्ला हुकम है जे परमेश्वर ने इक्क वादे कने दित्ते रा है, इधेरे तांइ तुसा बच्चे जिन्हेरा मसीह यीशु कने रिस्ता है, अपणे मां-प्यो री गल्ल मनणा सही है।

⁴प्यो अपणे बच्चेयां कने हमेसा गुस्सा दुआणे वाले तरिक्के कने पेश ना आण। पर प्रभु री शिक्षा ते चितौणी दिंदे होए तिन्हेरे जो पालो-पोस्सो।

⁵ओ गुलामों, इस दुनिया बिच जे तुसा रे मालक हिन, तिन्हेरे हुकमां जो मन्नों ते अपणे मन रे सिद्देपन कने तिन्हेरे तिन्ने ही भरोसेमंद रेयो जिन्ना तुसा मसीह कने हिन,

⁶ते मणूआं जो खुस करणे वालेयां सांई दिखावे री सेवा मत करो, पर मसीह यीशु रे दास सांई मन लाई करी परमेश्वर री मर्जी पर चलो,

⁷ते तिस सेवा जो मणूआं री सेवा नी पर परमेश्वर री सेवा समजी करी पूरे दिल कने करो।

⁸किजोकी तुसा जाणदे कि परमेश्वर ने हर कुसकी जो, चाए से अजाद हो या गुलाम तिन्हेरे हर ठीक तांइ ईनाम दैणा।

⁹ओ मालकों, तुसा जो अपणे गुलाम्मां जो डराणा नी चाएदा, बल्कि तुसा जो तिन्हा जो तिय्यां ही इज्जत दैणी चाएदी जिय्यां मैं तिन्हा जो तुसा री इज्जत करणे तांइ बोल्ले रा है। किजोकी तुसा जाणदे कि तिन्हेरा ते तुसा रा मालक स्वर्ग बिच है ते से कुसकी कने पक्षपात नी करदा।

¹⁰आखिरकार तुसा परमेश्वर री ताकत बिच आत्मिक रुप बिच अप्पु भी ताकतवर बणदे जाओ।

¹¹असी मणूआं रे खिलाफ नी लड़ेया करदे हिन। असी न्याहरे रे अधिकारी, अधिपति, शासक ते आत्मिक दुनिया री ताकतां रे खिलाफ लड़ेया करदे हिन। इधेरे तांइ परमेश्वर रे दित्ते री झीलम पाई लेयो ताकि जां से बुरा दिन आए तां तुसा अप्पु जो शैतान री चलाकियां का बचाई सको। ते जां ए लड़ाई मुकी जाओ, तां भी तुसा मजबूती कने खड़ी रेयो।

¹⁴तैयार रेयो! सच्चाई जो अपणी कमर रा पटुका बणाओ, ते तुसा री धार्मिकता जो इक्क झीलम सांई तुसा री रक्षा करणा देयो। परमेश्वर रा सांती रा सुब बसेख सुनाणे री तुसा री इच्छा तुसा रे पैरां बिच तैयारी रे जूत्ते सांई होणे चाएदे। तुसा रा विश्वास इक्क ढाल सांई होणा चाएदा, तां तुसा ने शैतान रे भखदे तीरां जो रोक्की सकणा। परमेश्वर री तुसा जो बचाणे री ताकत तुसा तांइ इक्क टोप सांई होणी चाएदी, ते परमेश्वर रे सुब बसेख रे वचन जो इक्क तलवार सांई इस्तेमाल करो जो पवित्रात्मा रे पास्से का मिल्ले रा है।

¹⁸हर बेल्ले ते हर तरिक्के कने पवित्रात्मा रे कहे मुताबिक प्रार्थना ते बिनती करदे रेयो, ते इस गल्ल तांइ जागदे रेयो की परमेश्वर रे सारे लोक्कां तांइ लगातार बिनती करेया करो।

¹⁹ते मेरे तांइ भी प्रार्थना करेया करो ताकि मेरे जो बोलदे बेल्ले इदेया सही शब्द दित्ता जाए कि मैं हिम्मत कने सुब बसेख रा राज़ दस्सी सकां,

²⁰हालांकि मैं कैद बिच है फिरी भी मैं सुब बसेख तांइ इक्क राजदूत सांई है। मेरे तांइ प्रार्थना करेयो कि मैं सुब बसेख सुनाणे बिच हिम्मत वाला बणां, जदेया मेरे जो होणा भी चाएदा।

²¹मैं तुखिकुस जो तुसा का भेज्जेया करदा है जे प्यारा संगी विश्वासी ते प्रभु बिच भरोस्सेमंद सेवक है। तिसने तुसा जो मेरे बारे बिच सारा किच्‍छ दस्सी दैणा कि असी कदेय हिन ते मैं किय्यां रैंह्दा।

²³मैं परमेश्वर पिता ते प्रभु मसीह यीशु का ए प्रार्थना करदा कि से तुसा जो सांती दे। ते इस कने तुसा बिच प्यार बधे ते तुसा मसीह यीशु बिच विश्वास करणे बिच बणी रेयो।

²⁴जे असा रे प्रभु यीशु मसीह कने सच्चा प्यार करदे, तिन्हा सारेयां पर परमेश्वर रा अनुग्रह हुंदा रे।