Read Chambeali कुलुस्सियों 1 Bible Online

कुलुस्सियों 1 - Chambeali bible

कुलुस्सियों 1

¹मैं पौलुस, जिस जो परमेश्वर ने मसीह यीशु रा प्रेरित बणने तांइ चुणे रा है, विश्वासी भ्याल तीमुथियुस कने मिली करी ए चीठ्ठी कुलुस्सियों सहर बिच रैह्णे वाले मसीह बिच पवित्र ते भरोस्सेमंद संगी विश्वासियां जो लिख्खेया करदा है। असा रे पिता परमेश्वर तुसा जो अनुग्रह ते सांती दिंदे रैह्ण।

³असी हमेसा तुसा तांइ प्रार्थना करदे ते असा रे प्रभु यीशु मसीह रे पिता मतलब कि परमेश्वर रा शुकर करदे।

⁴किजोकी असा ने मसीह बिच तुसा रे विश्वास रे बारे बिच, ते संगी विश्वासियां कने तुसा रे आपसी प्यार रे बारे बिच सुणे रा है,

⁵तुसा ए सब इधेरे तांइ करदे किजोकी तुसा रा विश्वास ते आस, तिन्हा चीजां पर आधारित है जे परमेश्वर ने तुसा तांइ स्वर्ग बिच संभाली करी रख्खे री है। तुसा जो तिसेरी उम्मीद तिस बेल्ले का थी जां तुसा पैल्ली वरी मसीह यीशु रा सुब बसेख सूणेया थिया, जे परमेश्वर रा सच्चा बसेख है।

⁶जे सुब बसेख तुसा जो सुणाया गेया थिया, से ही सुब बसेख अवे सारी दुनिया रे लोक्कां बिच सुणाया जांदा। ते जिय्यां इसने तुसा री जिन्दगी जो बदलेया थिया, जां तुसा ने पैल्ली वरी परमेश्वर रे बसेख जो सूणेया ते समजेया थिया कि तिस बिच किन्ना जादा अनुग्रह है, तिय्यां ही ए लोक्कां री जिन्दगी जो बदली करी जादा का जादा फल्ल लाया करदा है।

⁷तुसा ने इसेरी शिक्षा इपफ्रास [1]का पाई, जे मसीह रे बसेख जो फैलाणे बिच असा रा साथी है ते असा पास्से का मसीह रा विश्वासयोग्य सेवक है।

⁸तिनिये ही असा जो दुज्जेया तांइ तुसा रे प्यार रे बारे बिच दस्सेया जे पवित्रात्मा तुसा लोक्कां जो दित्तेया।

⁹इधेरे तांइ जां रा असी तुसा रे बारे बिच सुणे रा है, तां का ही असी तुसा तांइ प्रार्थना करदे रैहन्दे। असी परमेश्वर का हमेसा प्रार्थना करदे कि से तुसा जो पूरी समझ ते आत्मिक बुद्वी ते समजदारी दैण ताकि तुसा तिन्हेरी इच्छा जो समजी सको।

¹⁰तां तुसा रा चालचलन प्रभु जो पसंद आणे वाला बणना, ते तुसा परमेश्वर जो हर तरिक्के कने खुस करणे वाली जिन्दगी जीणी, ते तिसेरी वजह कने तुसा अपणी जिन्दगी बिच हर तरिक्के रे ठीक कम्म करदे रैह्णा, ते तुसा परमेश्वर जो होर भी ठीक तरिक्के कने जाणदे रैह्णा।

¹¹मैं प्रार्थना करदा कि परमेश्वर री महिमा री ताकत रे मुताबक, हर किस्मे री ताकत कने मजबूत हुन्दे जाओ, ताकि तुसा बड़े सबर कने ते खुसी-खुसी अपणी हर मुसीबत जो सहन करी लेयो।

¹²ते पिता परमेश्वर रा शुकर करदे रेयो, जिन्हा ने असा जो इस जोग्गा बणाया कि स्वर्ग रे राज बिच तिन्हेरे अपणे लोक्कां कने तिस विरासत रे हिस्सेदार बनण, जे तिन्हा ने अपणे लोक्कां तांइ तैयार कित्ते रा है।

¹³किजोकी परमेश्वर ने अप्पु ही तिन्हेरे पुत्तर री कुर्बानी रे जरिये, असा जो छुटकारा दित्तेया, यानी पाप्पां री माफी दित्ती, ते असा जो शैतान रे काबू का छुड़ाया। ते अपणे प्यारे पुत्तर रे राज बिच लेई आए।

¹⁵कोई भी परमेश्वर जो नी दिख्खी सकदा, पर जां तिन्हेरे पुत्तर ने इक्क मणू रे रुप बिच जन्म लित्ता, तां तिसने परमेश्वर जो लोक्कां पर ज़ाहिर कित्ता किजोकी से अप्पु परमेश्वर रे स्वरूप बिच है। परमेश्वर रा पुत्तर पूरे ब्रम्हांड रे बणाए जाणे रे पैल्ले का है, ते परमेश्वर री बणाए री हर चीज पर तिन्हेरा हक है।

¹⁶किजोकी तिन्हेरे जरिये ही परमेश्वर ने आसमान ते धरती बिच हर इक्क चीज जो बणाया, चाए से दिख्खे री होण या अणदिख्खी, चाए सिंहासन, चाए मालक, चाए प्रधानतां, चाए हक, सारी चीजां तिन्हेरे ही जरिए बणाई गयी ताकि हर इक्क चीज तिन्हेरी बड़ाई करे।

¹⁷कुसकी भी चीज रे बणाए जाणे रे पैल्ले का ही परमेश्वर रे पुत्तर रा वजूद है, ते तिन्हेरे जरिये ही सारा ब्रम्हांड इक्क कठ बिच कम्म करेया करदा है।

¹⁸से ही कलीसिया जो, जे तिन्हेरे सरीर सांई है, सही मायने बिच चलांदे ते से अप्पु कलीसिया रे सिर हिन। से ही सुरुआत हिन, ते से ही मुर्देयां बिच का फिरी जिन्दे होणे वाले पैल्ले हिन, ताकि हर इक्क चीज बिच से ही प्रधान ठेहरण।

¹⁹किजोकी पिता परमेश्वर री खुसी इस गल्ल बिच ही है, कि तिन्हेरे पुत्तर बिच ही तिन्हेरे स्वभाव री सारी परिपूर्णता हो।

²⁰ते परमेश्वर ने अपणे पुत्तर जो दुनिया बिच भेज्जेया जिन्हा ने सुली पर कुर्बानी दित्ती। परमेश्वर ने ए सब किच्‍छ इधेरे तांइ कित्ता ताकि से हर इक्क चीज कने सांती बणाई करी मेल जोल करी लैण। इसी तरिक्के कने परमेश्वर ने आसमान ते धरती री हर इक्क चीज कने अपणा मेल जोल करी लित्ता।

²¹तुसा मणू पैल्ले परमेश्वर रे खिलाफ थिये, ते तुसा अपणे बुरे कम्मां ते गलत कम्मां री वजह कने तिन्हा का दुर होई गे थिये।

²²अवे परमेश्वर ने अपणे पुत्तर रे मणू रे रुप बिच जन्म लैणे, ते सुली पर कुर्बानी दैणे रे जरिए, तुसा कने भी मेल जोल करी लेया, ताकि तुसा जो अपणी नजर बिच पवित्र, बेकसूर, ते बेगुनाह ठैहराए।

²³मसीह बिच तुसा रा विश्वास, नीं बणे रे मजबूत घर सांई होणा चाएदा। मसीह रे सुब बसेख जो सुणी करी जे आस तुसा जो मिल्ली थी, तिसजो मत छड्डो, ते जिस सुब बसेख रा प्रचार दुनिया रे सारे लोक्कां बिच कित्ता गे रा है। ते मैं पौलुस जिस सुब बसेख रा दास बणेया।

²⁴मेरे जो तुसा तांइ जुल्म झेलणे बिच खुसी हुंदी, मैं इस गल्ल बिच खुस है कि मैं मसीह रे सरीर तांइ, जे तिन्हेरी कलीसिया है, आखरी समय तिकर मसीह रा अपणी कलीसिया तांइ जुल्म झेलणे बिच जे भी कम्म अधुरा रेई गे रा हो, तिसजो पूरा करदे रैह्णा।

²⁵इस कलीसिया तांइ मैं तुसा वास्ते परमेश्वर रे जरिये मेरे जो सौप्पि गे री सेवा तांइ इक्क दास रे रुप बिच चुणेया गे रा है, ताकि मैं परमेश्वर रे बसेख जो पूरे तरिक्के कने प्रचार करी सकां।

²⁶मतलब कि से बसेख जिस जो जे परमेश्वर सदियां ते पीढ़ियां का राज़ रख्खेया, पर अवे परमेश्वर ने अपणे पवित्र मणूआं पर तिसजो जाहिर कित्ते रा है।

²⁷किजोकी परमेश्वर ने चाएया कि तिन्हेरे मणू जाणे कि मसीह री शोहरत ते महिमा गैर यहूदियां तांइ भी है, ते से राज़ मसीह है, जे तुसा बिच वास करदे जे असा री परमेश्वर री महिमा बिच हिस्सेदार बणने री आस है।

²⁸असी मसीह रा प्रचार करदे, ते परमेश्वर रे असा जो दित्ते रे सारे ज्ञान कने हर मणू जो सिखांदे ते चितौणी दिंदे, ताकि जां हर इक्क जणा जां परमेश्वर रा सामणे खड़िये तां से सारे परिपक्व विश्वासी बणी जाण।

²⁹इधेरे तांइ मैं मसीह री ताकत पर, जे मेरे अंदर कम्म करदी, निर्भर होई करी कड़ी मैहनत करदा।