Read Chambeali कुलुस्सियों 2 Bible Online

कुलुस्सियों 2 - Chambeali bible

कुलुस्सियों 2

¹मैं चाह्‍ंदा की तुसा जाणो की तुसा तांइ, ते लौदीकिया सहर बिच रैह्णे वाले विश्वासियां तांइ, ते तिन्हा सारे मणूआं तांइ भी जिन्हा जो मैं हल्ले तिकर नी मिल्ले रा है, मैं किन्नी जादा मैहनत करदा।

²ताकि तुसा जो ते तिन्हा लोक्कां जो होंसला मिल्ले, ते से प्यार कने अप्पु बिच कठ्ठे रैह्ण। मैं चाह्‍ंदा कि तिन्हा जो इस गल्ल रा होंसला रेयो किजोकी से परमेश्वर रे हर राज़ री योजनां जो समजदे, जे मसीह यीशु ही हिन।

³परमेश्वर रे बारे बिच ज्ञान ते बुद्वी इक्क लुके रे खजाने सांई है। सिर्फ मसीह यीशु ही तिसजो लोक्कां पर प्रकट करदे।

⁴ए मैं इस तांइ बोलदा की कोई मणू तुसा जो गलत शिक्षा सिखाई करी धोखा ना दे।

⁵हालांकि मैं तुसा का दुर है, तां भी मैं हमेसा तुसा रे बारे बिच सोचदा रैहन्दा, मैं इस गल्ल कने खुस है कि तुसा इक्क-मन होई करी तिय्यां ही रेया करदे हिन जिय्यां तुसा जो रैह्णा भी चाएदा ते मसीह बिच तुसा रा विश्वास भी मजबूत है।

⁶अते जिय्यां तुसा ने मसीह यीशु जो प्रभु मन्नी करी के अपणाई लित्ते रा है, तिय्यां ही तिन्हा पीच्छे चलदे रेयो।

⁷ते मसीह बिच विश्वास रखणे बिच मजबूत बणे रेयो। जिय्यां की तुसा जो सिखाए गे रा है, तिय्यां ही विश्वास बिच मजबूत हुंदे जाओ ते परमेश्वर रा जादा का जादा शुक्रिया करो।

⁸चुकन्ने रेयो की कोई तुसा जो अपणी तिन्हा विचारां ते बेकार गल्लां ते धोखे कने फसाई ना लेयो, जे लोक्कां री परम्परा ते दुनियावी रीति-रीवाज जे सदियां का चली आया करदी हिन, ते इस दुनिया री न्याहरे री ताकत पर आधारित है, पर मसीह यीशु री शिक्षा पर आधारित नी है।

⁹इन्हा जो अप्पु जो धोखा देई करी फसाणे रा मौक्का मत देयो, किजोकी जां मसीह यीशु ने मणू रे रुप बिच भी जन्म लित्तेया थिया, तां भी तिन्हा बिच परमेश्वर रा पूरा स्वभाव थिया।

¹⁰मसीह यीशु हर ताकत ते राज रे उप्पर प्रधान हिन, इधेरे तांइ जां तुसा मसीह यीशु कने जुड़े रे हिन, तां तुसा बिच कुसकी भी गल्ल री कमी नी हुंदी।

¹¹जां तुसा मसीह यीशु बिच विश्वास कित्तेया, तां तुसा रा इदेया खतना होया जे कुसकी इन्सान ने कित्तेया हो, पर से मसीह यीशु रे जरिये होया, जे की तुसा रे पापी स्वभाव रा कट्टेया जाणा थिया।

¹²तिय्यां ही जां तुसा जो बपतिस्मा दित्तेया गेया तां तुसा रे पापी स्वभाव जो इय्यां गाड़ेया गेया जिय्यां मसीह यीशु जो गाड़ेया गेया थिया। ते जिय्यां से फिरी मुर्देयां बिच का जिन्दे होई गे थिये, तिय्यां ही तुसा जो भी नौई जिन्दगी दित्ती गयी, किजोकी तुसा परमेश्वर री बड्डी ताकत पर विश्वास कित्तेया, जिन्हा ने मसीह यीशु जो मुर्देयां बिच का फिरी जिन्दा कित्तेया थिया।

¹³तुसा अपणे पाप्पां ते पापी स्वभाव री वजह कने इक्क मुर्दे मणू सांई थिये, ते अपणे पापी स्वभाव का हल्ले कट्टे नी गे थिये। तां परमेश्वर ने तुसा जो मसीह यीशु कने फिरी जिन्दा कित्ता, ते तिन्हा ने असा रे सारे पाप माफ करी दित्ते।

¹⁴तिन्हा ने असा रे पाप्पां रे लेखे-जोखे जो रद्द करी दित्ता, ते तिसजो सुली पर मेखां कने जड़ी करी दुर करी दित्ता।

¹⁵ते तिस तरिक्के कने तिन्हा ने दुष्ट प्रधानता ते अधिकारां जो हराई दित्ता। ते सुली पर जीत हासिल करी के, खुलेआम तिन्हेरा तमाशा बणाया।

¹⁶इधेरे तांइ तुसा कुसकी जो भी इस बारे बिच अप्पु पर ए इल्जाम मत लाणे देयो कि तुसा कै खांदे-पिंदे, या कोई पवित्र दिन, नौए चाँद रा दिन या विश्राम दिन मनांदे या नी,

¹⁷किजोकी ए सारी गल्लां तां आणे वाली चीजां री परछाई थी, पर असलियत ता मसीह यीशु बिच मिलदी।

¹⁸कुसकी भी मणू जो तुसा जो निकम्मा बणाणे रा मौक्का मत देयो जे झूठ्ठा निमतापन दिखांदा ते स्वर्गदूतां री पूजा करणे बिच खुस हुंदा। इदेय मणू दर्शन दिखदे ते बड्डी बड्डी गल्लां बोलदे, ते तिन्हेरी इन्सानी सोच तिन्हा जो बेवकूफी रे घमंड कने भरी दिंदी।

¹⁹तिन्हा ने मसीह जो छड्डी दित्ते रा है, जे सरीर रूपी कलीसिया रे सिर सांई हिन। किजोकी से ही पूरे सरीर जो अप्पु-मिते तिसेरे जोड़ ते नसां कने जोड़ी करी रखदे, ते से तिय्यां ही बदधे रैहन्दे जिय्यां परमेश्वर चाह्‍ंदे।

²⁰किजोकी तुसा रा पापी स्वभाव मसीह यीशु कने मारी दित्तेया गे रा है, इधेरे तांइ अवे तुसा जो दुनियावी रीति-रीवाज्जां जो मनणे री जरुरत नी है, फिरी भी तुसा तिन्हा गल्लां जो इय्यां मनदे कि जिय्यां कि से हल्ले भी तुसा जो काबू बिच रखदे,

²¹कि ए मत छुंदे, तिसजो मत चखदे, ते तिसजो मत पकड़दे।

²²लोक्कां री ए सारी रीति-रीवाज ते शिक्षां बेकार हिन, किजोकी ए मणूआं रे हुकमां ते शिक्षा पर आधारित है।

²³इदेय रीति-रीवाज, अपणे अराधना रे तौर-तरिक्के, झूठ्ठे निमतेपन ते कड़े शारीरिक अभ्यास कने ता बड़े ज्ञान रा भाव ता लगदा, पर ए रीति-रीवाज लोक्कां जो तिन्हेरे बुरे ख्याल्लां जो रोकणे बिच कोई मदद नी करदे।