Read Chambeali कुलुस्सियों 4 Bible Online

कुलुस्सियों 4 - Chambeali bible

कुलुस्सियों 4

¹ओ मालिकों, ए जाणदे होए कि स्वर्ग बिच तुसा रा भी इक्क मालिक है, तुसा भी अपणे गुलामां कने जायज़ ते इक्क बराबर बर्ताव करो।

²जां तुसा प्रार्थना करदे, तां पूरी लगन कने करेया करो, हमेसा चुकन्ने रेया करो ते हमेसा परमेश्वर रा शुकर करदे रेया करो।

³ते कने-कने असा तांइ भी प्रार्थना करदे रेया करो ताकि परमेश्वर असा जो मसीह रे बसेख रा प्रचार करणे रा इक्क इदेया मौक्का दैण कि असी मसीह रे तिस राज़ रा वर्णन भी करी सकण। मैं अब्बे कैद बिच है किजोकी मैं इस बसेख रा प्रचार कित्ता।

⁴प्रार्थना करो कि मैं मसीह रे भेद जो खुली करी ते बिल्कुल सफाई कने दस्सी सकां, जे मेरे जो करणा भी चाएदा।

⁵हर मौक्के जो कीमती मन्नी करी गैर यहूदियां कने समजदारी कने बर्ताव करो।

⁶तुसा री गल्ल-बात सोह्णि ते आकर्षित हो, ताकि तुसा मसीह बिच अपणे विश्वास रे बारे बिच हर मणू जो जवाब देई सको।

⁷तुखिकुस मसीह बिच मेरा प्यारा विश्वासी भ्याल ते भरोस्सेमंद साथी है, जे मसीह री सेवकाई रे कम्म बिच मेरा साथी है। तिनिये तुसा जो मेरी हर गल्ल दस्सी दैणी।

⁸मैं तिसजो तुसा का असा रा हाल-चाल दसणे ते तुसा जो विश्वास बिच मजबूत करणे रे मकसद कने भेज्जे रा है।

⁹मैं अपणे भरोस्सेमंद ते प्यारे विश्वासी भ्याल उनेसिमुस जो भी तिस कने भेजेया करदा है, जे तुसा रे ही सहर का है। तिसने तुसा जो से सब किच्‍छ दस्सी दैणा जे इत्ते होया करदा है।

¹⁰अरिस्तर्खुस जे मेरे कने जेल बिच है अते बरनबास रे रिस्तेदार यूहन्ना मरकुस री तरफ का तुसा जो प्रणाम (मैं जाणदा कि तुसा जो यूहन्ना मरकुस रे बारे बिच तुसा जो दस्सी दित्ता गे रा है, कि जां से तुसा का आए तां तिस कने ठीक तरिक्के बर्ताव करेयो।)

¹¹अते यीशु भी जिस जो मणू यूसतुस भी बोलदे, तुसा जो तिसेरा भी प्रणाम। यहूदी विश्वासियां बिच वस ए ही त्रै मणू हिन, जे परमेश्वर रे राज तांइ मेरे कने कम्म करेया करदे हिन, अते तिन्हा ने मेरे जो बड़ा वरी उत्साहित भी कित्ते रा है।

¹²इपफ्रास भी जे तुसा रे ही सहर का है। ते से मसीह यीशु रा दास है, तुसा जो प्रणाम बोल्लेया करदा है। से बड़ी लगन कने तुसा तांइ प्रार्थना करदा रैहन्दा ताकि तुसा मसीह यीशु बिच विश्वास करणे बिच मजबूत होई करी, सिद्व होई करी ते पक्के तौर पर पूरे विश्वास कने परमेश्वर री मर्जी जो पूरा करो।

¹³मैं तिसेरा गवाह है कि से लौदीकिया सहर अते हियरापुलिस सहर रे रैह्णे वाले लोक्कां तांइ बड़ी लगन कने प्रार्थना करदा रैहन्दा ते तिसने तुसा तांइ बड़ी कड़ी मैहनत भी कित्ते री है।

¹⁴प्यारे वैद्द लूका, अते देमास भी तुसा सारेयां जो प्रणाम करदे।

¹⁵लौदीकिया सहर बिच रैह्णे वाले विश्वासियां जो, ते नुमफास अते तिसेरी घर री कलीसिया जो मेरा प्रणाम बोल्लेयां।

¹⁶जां इस चीठ्ठी जो तुसा पढ़ी लिंगे, तां इसजो लौदीकिया सहर री कलीसिया बिच भी पढ़ेयो, ते तुसा तिस चीठ्ठी जो भी पढेयो जे लौदीकिया सहर री कलीसिया ने तुसा जो भेजणी।

¹⁷अरखिप्पुस जो बोल्लेयो, जे सेवा करणे तांइ प्रभु ने तेरे जो चुणे रा है, ध्यान रे कि तू तिस सेवा जो पूरा करे।

¹⁸मैं पौलुस, चीठ्ठी रे इस हिस्से जो अपणे हत्थ कने लिख्खी करी तुसा जो नमस्ते भेज्जेया करदा है। याद रख्खेयो कि मैं कैद बिच है, ते मेरे तांइ प्रार्थना करदे रेयो। तुसा पर परमेश्वर रा अनुग्रह बणे रे। आमीन।