Read Chambeali 2 थिस्सलुनीकियों 2 Bible Online

2 थिस्सलुनीकियों 2 - Chambeali bible

2 थिस्सलुनीकियों 2

¹ओ संगी विश्वासियों, असी मसीह यीशु रे हटणे ते तिस बेल्ले रे बारे बिच गल्ल करणा चाह्‍ंदे जां असी तिन्हा कने दुबारा मिलणा।

²जे अगर तुसा सूणदे कि मसीह यीशु रे हटणे रा बेल्ला आई गे रा है तां इन्नी असानी कने उदास मत होई जांदे या डरदे मत।

³तिस दिन रे बारे बिच कुसकी भी तरिक्के कने कुसकी भी मणू रे बहकावे बिच मत आदें, किजोकी मसीह यीशु रे हटणे का पैल्ले ही मते लोक्कां ने परमेश्वर रे खिलाफ होई जाणा। ते तिस दुष्ट ने लोक्कां सामणे आई जाणा जिस जो परमेश्वर ने नरक बिच पूरे तरिक्के कने मुकाई दैणा।

⁴तिनिये परमेश्वर रे ते हर इक्क तिस चीज रे खिलाफ होणा मणू जिसेरी अराधना करदे ते तिनिये ए दावा करणा कि से तिन्हा सारेयां का जादा बड्डा है। इत्ते तिकर कि तिस दुष्ट ने मन्दिर बिच भी बेई जाणा ते सारेयां जो ए बोलणा कि से अप्पु ही परमेश्वर है।

⁵ए मत भूलदे कि जां मैं तुसा कने थिया तां मैं तुसा जो सारी ए गल्लां बोलदा हुंदा थिया।

⁶से दुष्ट हल्ले सामणे नी आए रा है, किजोकी किच्‍छ है जे तिसजो रोक्केया करदा है। तुसा जो पता ही है कि से कै है जिस ने तिसजो रोक्की करी रख्खे रा है। इधेरे तांइ परमेश्वर रे ठैहराए रे समय पर तिस दुष्ट ने सामणे आणा।

⁷तिस दुष्ट री ताकत इस दुनिया बिच लुकी करी कम्म करेया करदी है पर कोई है जे जिस ने तिस ताकत जो रोक्की करी रख्खे रा है। ते तिसने तिस ताकत जो तां तांइ रोक्की रखणा जां तिकर से रस्ते का हटाई नी दित्तेया जाणा।

⁸तां तिस दुष्ट ने सामणे आई जाणा, पर बाद बिच जां मसीह यीशु ने आणा तां तिन्हा ने तिस दुष्ट जो अपणे मुँह का निकले रे हुकम ते अपणे हटी करी आणे री महिमा कने मुकाई दैणा।

⁹तिस दुष्ट ने शैतान री ताकत कने लोक्कां रे सामणे आणा ते तिनिये लोक्कां जो अपणी ताकत कने झूठ्ठे चिन्ह-चमत्कार दिखाणे।

¹⁰तिनिये हर तरिक्के रे बुरे कम्म करणे ते तिनिये तिन्हा लोक्कां जो भटकाणा जिन्हा जो परमेश्वर ने नास करणा किजोकी तिन्हा ने मसीह रे सच्चाई रे बसेख जो नी अपणाया जे तिन्हा लोक्कां जो बचाई सकदा थिया।

¹¹इधेरे तांइ परमेश्वर ने तिन्हा बिच इक्क ताकत भेजणी जिसेरी वजह कने तिन्हा लोक्कां ने तिस झूठ पर भरोस्सा करणा जे तिस दुष्ट ने तिन्हा जो दसणा।

¹²परमेश्वर ने तिन्हा सारे लोक्कां रा हिसाब-किताब लैणा जिन्हा ने मसीह यीशु रे सच्चाई रे बसेख पर विश्वास नी कित्तेया पर अपणे बुराई रे कम्मां कने प्यार कित्तेया।

¹³ओ संगी विश्वासियों ते प्रभु रे प्यारे लोक्कों, ए ठीक गल्ल है कि असी हमेसा तुसा तांइ परमेश्वर रा शुक्रिया करदे रैह्ण किजोकी परमेश्वर ने तुसा जो बचाणे तांइ तुसा जो दुनिया बणाणे का पैल्ले ही चुणी लित्तेया थिया। से तुसा जो पवित्रात्मा रे तिन्हा कम्मां रे जरिये बचांदे जे तुसा जो पवित्र ठैहरांदे ते तुसा रे मसीह बिच विश्वास करणे री वजह कने भी तुसा दैणे तांइ सद्देया ताकि तुसा तिस महिमा बिच हिस्सेदार बणो जे परमेश्वर ने मसीह यीशु जो दित्ते री है।

¹⁵इधेरे तांइ ओ संगी विश्वासियों, विश्वास बिच मजबूत बणो ते जे गल्लां असा ने तुसा जो चीठ्ठी या आमणे-सामणे सिखाए री हिन तिन्हा जो मनणा मत छडदे।

¹⁶असी अपणे प्रभु यीशु मसीह ते पिता परमेश्वर का प्रार्थना करदे जे असा कने प्यार करदे ते जिन्हा ने अपणे अनुग्रह रे जरिये असा जो कदी ना मुकणे वाली हिम्मत ते इक्क पक्की आस भी दित्ते री है।

¹⁷ते असी ए प्रार्थना करदे कि पिता परमेश्वर ते मसीह यीशु तुसा जो हिम्मत ते ताकत दे ताकि तुसा ठीक कम्म करदे ते ठीक गल्लां बोलदे रेयो।