Read Chambeali 2 थिस्सलुनीकियों 3 Bible Online

2 थिस्सलुनीकियों 3 - Chambeali bible

2 थिस्सलुनीकियों 3

¹आखिर बिच, ओ संगी विश्वासियों, असा तांइ प्रार्थना करेया करो कि असी प्रभु रा बसेख तौले-तौले फैलाई सकण ते जिय्यां तुसा तिस पर विश्वास कित्तेया तिय्यां ही दूए मणू भी विश्वास करी सको।

²ते असा तांइ प्रार्थना करेयो कि परमेश्वर असा री रक्षा करे ताकि ए बुरे मणू असा जो नुक्सान ना पूजाई सकण किजोकी ए मणू यीशु मसीह रे बसेख पर विश्वास नी करदे।

³पर प्रभु भरोस्सेमंद हिन, तिन्हा ने तुसा जो आत्मिक रुप कने मजबूत बनाणा ते तुसा जो शैतान का बचाई रखणा।

⁴असा जो प्रभु बिच ए भरोस्सा है कि तुसा असा रे दित्ते रे सारे हुकमां जो मनदे ते तुसा अग्गे भी मनदे रैह्णा।

⁵प्रभु यीशु मसीह तुसा जो ए समजणे री ताकत दे कि परमेश्वर अपणे लोक्कां कने किन्ना जादा प्यार करदे ते जिय्यां मसीह यीशु ने अप्पु सबर रख्खी करी सहन कित्तेया तिय्यां ही तुसा भी सहन करी सको।

⁶ओ संगी विश्वासियों, असी तुसा जो तिस अधिकार कने हुकम दिंदे जे असा जो प्रभु यीशु मसीह ने दित्ते रा है कि तुसा हर इक्क जणा इदेय विश्वासी का दुर रेयो जे आलस बिच जिन्दगी बितांदे ते जे तिस शिक्षा रे हिसाब कने नी चलदे जे असा ने तुसा जो सिखाए री है।

⁷किजोकी तुसा जो अप्पु ठीक तरिक्के कने पता है कि तुसा जो तिस्सी तरिक्के कने जिन्दगी जीणी चाएदी जिय्यां असी जिन्दे किजोकी जां असी तुसा कने रेया करदे थिये तां असी आलस नी कित्ता पर असी मैहनत करदे थिये।

⁸ते कुसकी का मुफ्त बिच रोट्टी नी खाई पर मैहनत-मजदूरी करी के रात-दिन कम्म-काज करदे थिये ताकि असी तुसा बिच का कुसकी पर अपणी जरुरतां तांइ निर्भर ना हो।

⁹असी मैहनत करदे थिये तां इधेरे तांइ नी करदे थिये किजोकी असा जो तुसा का आर्थिक मदद लैणे रा कोई हक नी है पर ए असी इधेरे तांइ करदे थिये ताकि तुसा सामणे इक्क उदारण बणी सके ताकि तुसा भी तिय्यां ही करेया करो।

¹⁰किजोकी जां असी तुसा कने रैहन्दे थिये, तां भी असा ने तुसा जो मती वरी बोल्लेया कि जे अगर कोई कम्म नी करणा चाओ तां से रोट्टी भी ना खाए।

¹¹असी सुणे रा है कि तुसा बिच किच्‍छ मणू बड़े आलसी हिन ते किच्‍छ कम्म नी करदे पर दूज्जे लोक्कां रे कम्मां बिच अड़चणा पांदे रैह्‍न्दे।

¹²इदेय मणू जो असी मसीह यीशु रे दित्ते रे हक कने हुकम दिंदे ते समझांदे कि से चुप्पचाणे कम्म करे ते अपणी रोजी-रोट्टी कमाए।

¹³तुसा ओ संगी विश्वासियों, भले कम्म करणे बिच हिम्मत मत हारो।

¹⁴जे अगर कोई असा री इस चीठ्ठी बिच लिख्खे शिक्षा री गल्लां जो ना मन्ने तां सारेयां सामणे तिस मणू रा खुलासा करी देयो, ते इदेय विश्वासी का दुर रेयो ताकि इय्यां करणे कने तिसजो शर्मिंदगी महसूस हो।

¹⁵तां भी तिस कने दुश्मणां जदेया बर्ताव मत करदे, ते जिय्यां तुसा भ्याल जो समझांदे तिय्यां ही तिसजो भी समझाई देयो।

¹⁶प्रभु जे सांती दैणे वाला है, मैं तिन्हा का प्रार्थना करदा कि से तुसा जो हमेसा ते हर तरिक्के री सांती दिंदे रैह्ण, ते प्रभु तुसा सारे जणेया कने रैह्ण।

¹⁷मैं पौलुस तुसा जो अपणे हत्थां कने नमस्ते लिख्खी करी भेजदा। मैं अपणी चीठ्ठी रे आखिर बिच इय्यां ही लिखदा ताकि हर कुसकी जो ए पता चली जाए कि चीठ्ठी मैं भेज्जी री है।

¹⁸असा रे प्रभु यीशु मसीह रा अनुग्रह तुसा सारे जणेया पर हुंदा रेयो।