Read Chambeali 1 तीमुथियुस 1 Bible Online

1 तीमुथियुस 1 - Chambeali bible

1 तीमुथियुस 1

¹मैं पौलुस ए चीठ्ठी तीमुथियुस जो लिख्खेया करदा है। मैं परमेश्वर रे हक ते असा जो छुटकारा दैणे वाले मसीह यीशु रे जरिये तिन्हेरा प्रेरित है जे असा री आस भी हिन।

²मसीह यीशु बिच विश्वास करणे री वजह कने तीमुथियुस तू मेरा सच्चा मुंडा है। असा रे पिता परमेश्वर ते मसीह यीशु तेरे जो अनुग्रह ते सांती दिंदे रैह्ण।

³तीमुथियुस, जिय्यां कि तू जाणदा इफिसुस सहर बिच किच्‍छ मणू हिन जे गलत शिक्षां दिंदे। से लगातार मनघड़ंत कहाणियां ते पूरखां रे लंबी सुची रे बारे बिच सिखांदे रैह्‍न्दे। जां मैं इफिसुस सहर का मकिदुनिया रे इलाक्के बिच जाणे तांइ तैयार थिया तां मैं तुसा जो इफिसुस सहर बिच रैह्णे तांइ बोल्लेया थिया ते फिरी तित्ते ही रुकणे ते बोलदा कि तिन्हा लोक्कां जो समझाओ कि से लोक्कां जो झूठ्ठी गल्लां ना सिखाण ते विश्वासी मणू भी इदेइ झूठ्ठी गल्लां बिच मन ना लाण किजोकी जां से इदेइ झूठ्ठी गल्लां सिखांदे तां विश्वासी तिस बारे बिच अप्पु-मिते बैह्स करदे ते इदेइ बैह्सबाजी परमेश्वर रा कम्म करणे बिच मदद नी करदी, परमेश्वर री सेवा रा कम्म सिर्फ तां ही होई सकदे जां कोई मणू परमेश्वर बिच पूरा विश्वास रख्खे।

⁴

⁵ए हुकम दैणे रा मकसद ए है कि तुसा साफ मन, साफ विवेक अते सच्चे विश्वास कने इक्क-दूए कने प्यार करो।

⁶झूठ्ठे शिक्षकां ने तां इन्हा गल्लां जो छड्डी दित्ते रा है ते बेकार री गल्लां री बैह्सबाजी बिच पेई गेरे हिन।

⁷ए झूठ्ठे शिक्षक ता मूसा रा कानून सिखाणे वाले शास्त्रियां सांई बणना चाह्‍ंदे पर से मणू जे बड़ी हिम्मत कने बोलदे ते दूए लोक्कां जो सिखांदे तिस गल्ल जो से अप्पु भी नी जाणदे कि से कै है?

⁸असी जाणदे कि जे अगर मूसा रे कानून जो सही तरिक्के कने इस्तेमाल कित्तेया जाए, तां से खरा है।

⁹असी जाणदे कि मूसा रा कानून धार्मिक लोक्कां तांइ नी है बल्कि अधार्मिक लोक्कां ते परमेश्वर रे विद्रोही लोक्कां तांइ है, परमेश्वर जो ना मनणे वाले ते हमेसा पाप करणे वाले लोक्कां तांइ, दुष्ट लोक्कां ते परमेश्वर री बेजती करणे वाले लोक्कां तांइ, अपणे मां-प्यो ते दूए लोक्कां रे हत्यारेयां तांइ है,

¹⁰व्यभिचारियां तांइ, दूए मर्दां कने अस्वभाविक रिश्ते बणाणे वाले मर्दां तांइ, गुलामी तांइ मणूआं जो बेचणे वाले लोक्कां तांइ, झूठ बोलणे वाले लोक्कां तांइ, झूठ्ठी कसम खाणे वाले लोक्कां तांइ ते सही शिक्षा रे उलट कुसकी भी तरिक्के रा कम्म करणे वाले लोक्कां तांइ है।

¹¹सुब बसेख री ए महिमामय शिक्षा असा रे धन्न परमेश्वर रे पास्से का है जे लोक्कां जो सुनाणे तांइ मेरे जो सौंप्पि गे री है।

¹²मैं असा रे प्रभु यीशु मसीह रा शुकर करदा कि तिन्हा ने मेरे जो ताकत दित्ती ते मेरे जो भरोस्सेमंद समजी करी अपणी सेवा करणे तांइ ठैहराया।

¹³मसीह बिच विश्वास करणे पैल्ले तां मैं तिन्हेरी बुराई करदा थिया, विश्वासी लोक्कां पर जुल्म करी के बड़ी बेरहमी कने तिन्हेरा नुक्सान करदा थिया पर फिरी भी परमेश्वर ने मेरे पर दया कित्ती किजोकी मेरे जो नी पता थिया कि मैं जे करेया करदा है से गलत है किजोकी तिस बेल्ले तक मैं मसीह यीशु बिच विश्वास नी कित्तेया थिया।

¹⁴परमेश्वर ने लगातार मेरे पर भरपूर अनुग्रह कित्तेया, ते तिन्हा ने मेरे जो मसीह यीशु बिच विश्वास ते प्यार दित्तेया।

¹⁵जे गल्लां मैं तुसा जो दस्सी से सच्ची ते पूरी तरिक्के कने भरोस्सेमंद हिन किजोकी मसीह यीशु असी पाप्पी लोक्कां जो छुटकारा दैणे तांइ इस दुनिया बिच आए ते तिन्हा बिच सबका बड्डा पाप्पी मैं है।

¹⁶पर मेरे पर दया कित्ती गई। मेरे जदेय सबका बड्डे पाप्पी जो माफ करणे रे जरिये मसीह यीशु ए दिखाणा चाह्‍ंदे थिये कि तिन्हा बिच किन्ना जादा सबर है। ए तिन्हा लोक्कां तांइ इक्क उदारण बणी जाणा जिन्हा ने बाद बिच मसीह यीशु बिच विश्वास करी के हमेसा री जिन्दगी हासिल करणी।

¹⁷हमेसा तिकर राज करणे वाले राज्जा, अविनाशी, अणदिख्खे ते इकलौत्ते परमेश्वर रा आदरमान ते महिमा हमेसा-हमेसा तिकर हुंदी रे। आमीन!

¹⁸मेरे पुत्तर तीमुथियुस, मेरे तेरे जो ए सलाह देया करदा है, मैं चाह्‍ंदा कि तू भविष्यद्वक्ता रे बोल्ले री गल्लां याद करे कि तेरे कने कै होणा। तेरे जो तिसेरी बोल्ली री गल्लां जो तिन्हा झूठ्ठी शिक्षा दैणे वाले लोक्कां रे खिलाफ हथियार सांई इस्तेमाल करणा जरुरी है।

¹⁹तुसा मसीह यीशु बिच अपणे विश्वास जो बणाई रख्खो ते अपणा विवेक साफ रख्खो। किच्‍छ लोक्कां ने अपणे साफ विवेक जो छड्डी दित्ते रा है जिसेरी वजह कने मसीह यीशु बिच तिन्हेरा विश्वास मुकी गेरा है।

²⁰उन्ही बिच का हुमिनयुस ते सिकन्दर हिन जिन्हा जो मैं कलीसिया बिच का कड्डी दित्ते रा है ते तिन्हा जो शैतान रे वस बिच छड्डी दित्ते रा है ताकि से मणू समजी जाण कि तिन्हा जो परमेश्वर री बेजती नी करणी चाएदी।