Read Chambeali 1 तीमुथियुस 3 Bible Online

1 तीमुथियुस 3 - Chambeali bible

1 तीमुथियुस 3

¹ए गल्ल ता सच है कि जे मणू कलीसिया रा बड्डा मुखिया बणना चाह्‍ंदा से मणू बड़ी जादा इज्जतदार कम्म री चाह्‍त रखदा।

²इधेरे तांइ ए जरुरी है कि कलीसिया रा मुखिया बेकसूर, तिसेरी सिर्फ इक्क ही लाड़ी हो, हर कम्म बिच अप्पु जो काबू बिच रखणे वाला, सूझ-बूझ कने बर्ताव करणे वाला, इज्जतदार, मेहमान्नां री खैर ख्वाह करणे वाला, ते जिस जो लोक्कां जो परमेश्वर रा बसेख शिक्षां दैणा आंदा हो।

³कलीसिया रा मुखिया पियक्कड़ ते मार-कुटाई करणे वाला ना हो बल्कि से नरमदिल मणू होणा चाएदा। से ना ता झगड़ालू ते ना ही पैसे रा लालची ना हो।

⁴से मणू ठीक तरिक्के कने अपणे परिवार जो चलाणे ते तिन्हेरी ठीक देख-रेख करणे ते काबिल होणा चाएदा ते तिसजो अपणे बच्चेयां जो ए सिखाणा चाएदा कि से पूरी तरिक्के कने तिसेरी इज्जत करण ते तिसेरी गल्लां मन्नेया करण।

⁵जे अगर से मणू अपणे परिवार जो ढंग कने ना चलाई सके तां पक्के तौर पर से मणू परमेश्वर रे लोक्कां री देख-रेख करणे रे काबिल भी नी होई सकदा।

⁶कलीसिया रा बड्डा मुखिया विश्वास बिच भी पक्का होणा चाएदा वरना तिनिये घंमड कने भरी जाणा ते तिसजो से ही सजा मिलणी जे शैतान जो मिल्ली थी।

⁷से मणू मसीह बिच विश्वास ना करणे वाले लोक्कां बिच भी इज्जतदार होणा चाएदा कुथकी इय्यां ना हो कि से शैतान रे फंदे बिच फसी जाए।

⁸तिय्यां ही कलीसिया रे सेवादार मणूआं रा भी लोक्कां बिच खरा नां होणा चाएदा। से दोगली गल्लां करणे वाला, सराबी ते पैसे रा लालची नी होणा चाएदा,

⁹पर परमेश्वर ने जे बसेख साफ विवेक रे जरिये जाहिर कित्ते रा है, तिन्हा जो तिस विश्वास करणे बिच बधणा चाएदा।

¹⁰सेवादारां जो चुनणे का पैल्ले इस गल्ल जो परखेया जाए कि ए कम्म करणे तांइ तिन्हा बिच सही काबलियत है या नी। ते जे अगर कुसकी जो भी तिन्हा बिच कोई गलती नी नजर आंदी तां ही से सेवादार रा कम्म करण।

¹¹सेवादारां री लाड़ियां रा लोक्कां बिच खरा नां होणा चाएदा। से मणूआं पर इल्जाम लाणे वाली नी होणा चाएदी, पर तिन्हा जो चज्ज कने बर्ताव करणा चाएदा ते से पूरे तरिक्के कने भरोस्सेमंद होणा चाएदी।

¹²सेवादार री इक्क लाड़ी होणा चाएदी ते से अपणे परिवार जो ठीक तरिक्के कने संभालणे ते तिन्हेरी देख-रेख करणे वाले होणे चाएदे।

¹³किजोकी जे सेवादार अपणा कम्म ठीक तरिक्के कने करदे तिन्हा जो लोक्कां बिच बड़ी इज्जत मिलणी ते तिन्हा जो लोक्कां जो मसीह बिच तिन्हेरे विश्वास रे बारे दसणे बिच दसणे तांइ हिम्मत मिलणी।

¹⁴मैं तेरे का तौले आणे री आस रखणे रे बावजूद भी ए गल्लां तिज्जो इधेरे तांइ लिख्खेया करदा है

¹⁵कि जे अगर मेरे तित्ते पुजणे बिच देर भी होई जाओ तां मैं चाह्‍ंदा कि तुसा इस गल्ल जो जाणो कि परमेश्वर रे परिवार, जे कलीसिया है तिस बिच लोक्कां जो इक्क-दूए कने किय्यां बर्ताव करणा चाएदा। जिन्दे परमेश्वर री कलीसिया रे मणू सच्चाई री शिक्षा री नीं ते खम्भे सांई हिन।

¹⁶असी इस गल्ल जो पक्के तौर पर दसदे कि परमेश्वर री जाहिर कित्ते री शिक्षां पूरे तरिक्के कने सच्ची हिन, इसेरा मतलब ए है कि मसीह यीशु मणू रे रुप बिच पैदा होए, से पवित्रात्मा रे जरिये परमेश्वर रे पुत्तर साबित कित्ते गे, स्वर्गदूतां ने तिन्हा जो दिख्खेया, परमेश्वर ने तिन्हा जो स्वर्ग जो चुक्की लित्तेया, देस-देस अंदर तिन्हेरे बारे बिच प्रचार कित्तेया जांदा, ते मते लोक्कां ने तिन्हेरा विश्वास कित्तेया।