Read Chambeali 1 तीमुथियुस 5 Bible Online

1 तीमुथियुस 5 - Chambeali bible

1 तीमुथियुस 5

¹कुसकी बुजुर्ग मणू जो बकी करी मती समझांदा, पर तिसजो अपणे प्यो जदेया मन्नी करी समजाए, ते जुआन मुंडेया जो अपणा भ्याल जदेया मन्नी करी समजाए।

²बुजुर्ग जनानियां जो अपणी मां जदेया मन्नी करी तिन्हा जो सलाह देया करो ते जुआन कुड़ियां जो अपणी भैण मन्नी करी समजाया कर। ए सब किच्‍छ अपणे पूरे दिल कने करेया करो।

³विधवा जनानियां री इज्जत करेया करो जिन्हा जो संभालणे ते तिन्हेरी देख-रेख करणे वाला कोई नी है।

⁴जे कुसकी विधवा जनानी रे बच्चे या नाती-पोते होण तां तिन्हा जो अपणे परिवार कने इज्जत कने बर्ताव करणे रे जरिये परमेश्वर री भक्ति-भाव दिखाणा चाएदा, ते तिन्हा जो अपणे मां-प्यो री देख-रेख करणे रे जरिये तिन्हेरा एहसान चुकाणा चाएदा किजोकी परमेश्वर जो ए खुस करदा।

⁵विधवा जनानियां परमेश्वर बिच विश्वास रखदी किजोकी तिन्हेरे जो संभालणे वाला कोई नी हुंदा ते से दिन-रात अपणी मदद तांइ परमेश्वर का छंदे-मिन्नतां ते प्रार्थना करणे बिच लग्गी रेह्न्दी।

⁶पर जे विधवा जनानियां अपणा पूरा वक्त ऐश-मस्ति बिच कडदी से शरीरी तौर पर ता जिंदी है पर आत्मिक तौर पर मरी चुके री है।

⁷इन्हा सारी गल्लां रे बावजूद भी कलीसिया रे मणूआं जो ए शिक्षां देया कर ताकि कोई तिन्हा विधवा जनानियां पर इल्जाम ना लाए।

⁸पर जे अगर कोई मणू अपणे रिस्तेदारां री ते खासतौर पर अपणे परिवार रे मणूआं री फिकर ना करे तां से मणू मसीह बिच विश्वास करणे का मुकरी गे रा है ते अविश्वासी का भी जादा बत्तर होई गे रा है।

⁹जां कोई विधवा जनानी साठ्ठ साल री उमर री होई जांदी तां तिसेरा ही नां विधवा जनानियां री सुची बिच लिख्खेया जाए ते से विधवा जनानी सिर्फ इक्क ही मणू री लाड़ी रेई री हो।

¹⁰से विधवा जनानी अपणे भलाई रे कम्मां तांइ जाणी जांदी हो जिय्यां कि बच्चेयां रा पालण-पोषण करणा, मेहमान-नवाजी करणा, प्रभु रे लोक्कां री सेवा करणा, मुसीबत बिच पेय रे लोक्कां री मदद करणा ते हर तरिक्के रे भलाई रे कम्मां बिच मन लाणा।

¹¹पर जुआन विधवा जनानियां रे नां तिस सुची बिच मत लिखदा किजोकी जां तिन्हेरी शरीरी इच्छा तिन्हेरे मसीह री सेवा करणे री इच्छा का जादा बधी जांदी तां से फिरी ब्याह करी लिंदे।

¹²से दुबारा ब्याह करणे री वजह कने गलत ठेहरदी किजोकी से दुबारा ब्याह ना करणे रे अपणे पैल्ले वादे जो तोड़ी दिंदी।

¹³ते इस कने से लोक्कां रे घरे-घरे घुम्मी-फिरी करी आलसी होई जांदी ते लोक्कां रे बारे बिच चुगलखोरी करणा सुरु करी दिंदी, से लोक्कां रे मामलेयां बिच दखलअंदाजी करदी ते पुठ्ठी-सीद्दी चीजां बोलदी।

¹⁴इधेरे तांइ तिन्हा जो ब्याह करी लैणा चाएदा, ते बच्चे पैदा करी के ते घर-बार सम्भालणा चाएदा। तां कुसकी दुश्मण जो तिन्हेरे खिलाफ किच्‍छ बोलणे रे मौक्का नी मिलणा।

¹⁵मैं इय्यां इधेरे तांइ बोल्लेया करदा है किजोकी किच्‍छ जनानियां ता परमेश्वर रे रस्ते जो छड्डी करी से ही कम्म करेया करदी हिन जे शैतान तिन्हा का करवाणा चाह्‍ंदा।

¹⁶जे अगर कुसकी विश्वासी मणू रे घरे कोई विधवा जनानी हो ता तिस विधवा जो अपणी जरुरतां तांइ कलीसिया का मदद नी मंगणी चाएदी, तां ही कलीसिया रे विश्वासियां ने तिन्हा विधवा जनानियां री मदद करी सकणी जिन्हेरी देख-भाल करणे वाला कोई नी है।

¹⁷कलीसिया रा कोई भी मुखिया जे अगर अपणा कम्म सही तरिक्के कने करदा तां तिसेरी इज्जत होणा चाएदी खासतौर पर कलीसिया रे से बुजुर्ग मणू जे परमेश्वर रे बसेख जो सिखांदे ते प्रचार करदे।

¹⁸किजोकी पवित्रशास्त्र बिच लिख्खे रा है, “जोतणे वाले दांद रा मुँह मत बन्दे कि से खाई ना सके, किजोकी पवित्रशास्त्र बिच इक्क होर जगाह् बिच ए लिख्खे रा है, मजदूर अपणी मजदूरी पाणे रा हकदार है।”

¹⁹जां तांइ दो या त्रै लोक्कां री गवाई ना हो तां तांइ कलीसिया रे कुसकी बुजुर्ग पर पाप करणे रे इल्जाम जो मत मन्नो।

²⁰जे मणू पाप करदे तिन्हा जो पूरी कलीसिया रे लोक्कां सामणे बको ताकि कलीसिया रे बाकि लोक्कां पर डर बणेया रे।

²¹परमेश्वर ते मसीह यीशु ते चुणे रे स्वर्गदूतां जो असा बिच मझाटे हाजिर मन्नी करी मैं तेरे जो मेरी गल्लां मनणे रा हुकम दिंदा ते पक्षपात कने कोई कम्म मत करदा।

²²जल्दबाजी बिच कुसकी भी मणू पर हत्थ रख्खी करी तिसजो परमेश्वर री सेवा करणे तांइ मुखिया मत बणांदे। कुसकी रे पाप बिच हिस्सेदार मत बणदे, अप्पु जो पवित्र बणाई रख्खो।

²³भविष्य बिच सिर्फ पाणी पीणे वाला ही मत बणदा पर अपणे पेट रे ते बार-बार बिमार होणे री वजह कने अंगूर रा रस्स भी कम्म बिच लाया कर

²⁴मैं तुसा जो बोलदा कि कुसकी जो कलीसिया रे बुजुर्ग रे तौर पर इक्क-दम मत चुणो किजोकी किच्‍छ मणू ता खुलेआम पाप करदे ते से मणू अपणा हिसाब-किताब होणे रे पैल्ले का ही विश्वासी लोक्कां रे सामणे साफ तौर पर गलत हुंदे। दूज्जे लोक्कां रे पाप तिस्सी बेल्ले सामणे नी आंदे पर बाद बिच जाहिर हुंदे।

²⁵तिय्यां ही भले कम्म भी सामणे आदें ते जे इदेय नी हुदें, से भी लुकी नी सकदे।