Read Chambeali 1 तीमुथियुस 6 Bible Online

1 तीमुथियुस 6 - Chambeali bible

1 तीमुथियुस 6

¹जिन्ने भी विश्वासी मणू गुलाम हिन, तिन्हा जो अपणे मालिकां री पूरी तरिक्के कने हर गल्ल बिच इज्जत करणा चाएदी, ताकि गैर-विश्वासी मणू परमेश्वर री ते असा री सिखाए री शिक्षां री बेजती ना करे।

²ते जे अगर कुसकी विश्वासी रा मालिक भी कोई विश्वासी है, तां से तिन्हा जो अपणे संगी विश्वासी होणे री वजह कने तुच्छ ना समजे बल्कि से तिन्हेरी होर भी जादा सेवा करेया करे किजोकी से मालिक जिन्हा जो अपणे गुलाम्मां का फायदा मिलदा, से अपणे गुलाम्मां रे संगी विश्वासी होणे री वजह कने तिन्हा कने बड़े ठीक ते भरोस्सेमंद हिन। सारेयां जो ए गल्लां मनणा सिखांदा रेय।

³जे अगर कोई मणू गलत शिक्षा सिखांदा ते मसीह यीशु री दित्ते री सही शिक्षा जो नी मनदा,

⁴तां से मणू घमंडी है, ते से किच्‍छ भी नी समजदा। इदेया मणू वस बुरी, हिर्स, झगड़े ते गंदी गल्लां रे बारे बिच बैह्स ते झगड़े करणा पसंद करदा।

⁵जिन्हा लोक्कां री समझ बिगड़ी गे री है, तिन्हा लोक्कां बिच बेकार रे झगड़े हुदें ते से मणू नी समजी सकदे कि सच कै है। से मणू सोचदे कि परमेश्वर री शिक्षा सिखाणा पैसा कमाणे रा जरिया है।

⁶पर असा तांइ ए खरा है कि असी से कम्म करिये जिस कने परमेश्वर खुस हुंदे ते तिस बिच संतुष्ट रैह्ण जे परमेश्वर असा जो दिंदे।

⁷जां असी पैदा होए थिये तां अपणे कन्ने किच्‍छ नी लियाये थिये, ते जां असी मरणा तां भी अपणे कन्ने किच्‍छ नी लै जाई सकदे।

⁸खाणे ते लाणे तांइ जे किच्‍छ असा का है, असा जो तिस बिच संतुष्ट रैह्णा चाएदा।

⁹पर जे मणू अमीर होणे री परिक्षा बिच पेई करी कुसकी जानवर सांई पाप रे जाल बिच फसी जांदे। से मणू इदेइ चीजां करणा चाह्‍ंदे जे बेकार ते तिन्हा तांइ खतरनाक हिन ते इदेइ चीजां री वजह कने तिन्हा ने बर्बाद होई जाणा।

¹⁰किजोकी पैसे रा लालच हर तरिक्के री बुराई री जड़ है, किच्‍छ लोक्कां बिच पैसे री चाह्‍त इन्नी जादा है कि तिन्हा ने मसीह यीशु री शिक्षा जो मनणा ही छड्डी दित्तेया, ते से मणू इन्ना जादा तड़पेया करदे हिन जिय्यां कि कुसकी मणू ने अप्पु जो कुसकी हथियार कने छलनी करी दित्तेया हो।

¹¹पर ओ तीमुथियुस, तू परमेश्वर री सेवा करणे वाला मणू है, तेरे जो जाणी करी इदेइ चीजां का टलणा चाएदा। हमेसा धार्मिकता, भक्ति ते विश्वास रे कम्म करणे री कोसीस करो। इक्क इदेइ जिन्दगी जियो जिस कने परमेश्वर जो आदरमान मिल्ले। मसीह रा आदरमान करो, सारे लोक्कां कने प्यार रख्खो, मुस्किल हालात्तां बिच हार मत मन्नों, लोक्कां कने नरमदिल होई करी रेयो।

¹²जिय्यां इक्क खरा सिपाई लड़ाई रे मैदान बिच कदी हार नी मनदा तिय्यां ही तुसा जो भी परमेश्वर बिच विश्वास करणा ते तिन्हा रे हुकमां जो मनणा नी छडणा चाएदा ते हमेसा री जिन्दगी जो थाम्मि लेयो।

¹³परमेश्वर जे सारी चीजां जो जिन्दगी दिंदे ते मसीह यीशु जिन्हा पर पुन्तियुस पिलातुस रे सामणे मुकद्दमा चलणे रे बावजूद भी सच बोल्लेया थिया तिन्हा दोन्नों जो मैं अपणा गवाह बणाई करी तिज्जो ए हुकम दिंदा,

¹⁴कि तू पूरी तरिक्के कने तिन्हा सारी गल्लां जो मन्ने जिसेरा हुकम मैं तिज्जो दित्ते रा है ताकि मसीह यीशु रे हटणे रे दिन तिकर कोई भी तेरे पर गलत कम्म करणे रा इल्जाम ना लाई सके।

¹⁵परमेश्वर जे परमधन्न ते इकलौत्ते अधिपति हिन, ते जे राज्जेयां रे राज्जे ते प्रभुआं रे प्रभु हिन, तिन्हा ने अपणे ठैहराए रे समय पर मसीह जो लोक्कां रे सामणे जाहिर करणा।

¹⁶ते सिर्फ से ही हिन जिन्हा ने हमेसा तांइ रैह्णा, से इन्नी जादा चमकदार रौसनी बिच रैह्‍न्दे। कुसकी मणू ने तिन्हा जो कदी नी दिख्खेया ते ना ही दिख्खी सकदा, तिन्हेरी महिमा ते ताकत हमेसा-हमेसा तांइ रैह्णी। आमीन!

¹⁷इस दुनिया रे अमीर लोक्कां जो हुकम दे कि से घमंडी ना होण ते अपणे तिस पैसे पर आस ना रख्खे जे इक्क दिन मुकी जाणा, पर परमेश्वर उम्मीद रख्खे, जे असा जो बड़ी दयालुता कने से सारी चीजां दिंदे जे असा का है ताकि असी तिन्हेरा लुफ्त लेई सके।

¹⁸तिन्हा जो बड़े जादा ठीक काम्म, ते दयालू ते इक्क-दूए री जरुरत रे हिसाब कने बडंणा सिखाओ।

¹⁹जे अगर से मणू इय्यां करदे तां ए इदेया होणा कि जिय्यां से अपणी आणे वाली जिन्दगी तांइ अप्पु तांइ स्वर्ग बिच दौलत कठेरेया करेया करदे होण ते से दौलत कदी भी नी गोचणा। ते तिन्हा जो सच्ची जिन्दगी दित्ती जाणी जे कि हमेसा री जिन्दगी है।

²⁰ओ तीमुथियुस, इस जिम्मेदारी रा ध्यान रख्खे कि तू से कम्म जरुर करे जे करणे तांइ परमेश्वर ने तिज्जो चुणे रा है, मनघड़ंत ते खोखली गल्लां का दुर रेयो जे सुनणे बिच समजदारी री गल्लां लगदी।

²¹किच्‍छ लोक्कां ने इन्हा झूठ्ठी शिक्षां जो मन्नी लित्ते रा है ते इय्यां करणे री वजह कने अवे से अग्गे जो मसीह यीशु बिच विश्वास नी रखदे। मैं प्रार्थना करदा कि परमेश्वर री अनुग्रह तुसा सारे लोक्कां पर हुंदी रेय।