Read Chambeali 2 तीमुथियुस 2 Bible Online

2 तीमुथियुस 2 - Chambeali bible

2 तीमुथियुस 2

¹इधेरे तांइ ओ मेरे पुत्तर तीमुथियुस, होंसला रख, किजोकी तू जाणदा कि परमेश्वर ने तेरे जो से अनुग्रह दित्ते रा है जे सिर्फ मसीह कने रिस्ता बणाणे रे जरिये मिलदी।

²तुसा ने मते लोक्कां सामणे मेरे का मसीह रे बसेख रे बारे बिच सुणे रा है। इधेरे तांइ मैं चाह्‍ंदा कि तुसा भी तिस ही बसेख री शिक्षा तिन्हा भरोस्सेमंद विश्वासियां जो देयो जे होर लोक्कां जो सिखाणे रे काबिल हिन।

³काफी हद तिकर जिय्यां इक्क सिपाई लड़ाई रे मैदान बिच मुस्किल हालात रा सामणा करदा, तिय्यां ही तुसा जो भी मुस्किल हालात रा सामणा करणा चाएदा जिय्यां असी मसीह तांइ मुसीबतां सैह्‍ण करेया करदे हिन।

⁴इक्क सिपाई जे सैना बिच कम्म करदा से आम मणूआं सांई होर कम्मां बिच नी उलझदा, किजोकी से अपणे अफसर जो खुस करणा चाह्‍ंदा।

⁵फिरी, जे अगर कोई मणू कुश्ति बिच लड़े, पर कुश्ति रे नियमां जो ना मन्ने तां तिसजो ईनाम नी मिलणा।

⁶फसल रे पैल्ले हिस्से रा हकदार भी से किसान ही है जिनिये तिसजो बाणे बिच मैहनत कित्ते री है।

⁷अवे सोच्चो कि ए सारे उदारण कै सिखांदे, ते प्रभु ने तुसा जो ए सारी गल्लां समजणे बिच मदद करणी।

⁸मसीह यीशु पर ध्यान लाई रख्खो, से दाऊद रे ‍खानदान का जम्मे, जिन्हा जो परमेश्वर ने तिन्हा जो मरे रे लोक्कां बिच का फिरी जिन्दा करी दित्तेया, ते मैं ए ही सुब बसेख सुणांदा।

⁹मैं मुजरिमां सांई तकलिफां सहन करेया करदा है किजोकी मैं सुब बसेख रा प्रचार करदा, इत्ते तिकर मैं कैद बिच भी पाया गे रा है, पर परमेश्वर रे बसेख जो फैलणे का कोई नी रोक्की सकदा।

¹⁰इधेरे तांइ मैं परमेश्वर रे चुणे रे लोक्कां री भलाई तिकर हर तरिक्के रे दुख-तकलीफ जो सहन करी लिंदा, ताकि से मणू भी मसीह यीशु बिच विश्वास करण ते छुटकारा पाण, ते तिस महिमा जो हासिल करण जे हमेसा-हमेसा तांइ रैह्णी।

¹¹ए गल्ल सच्ची ते भरोस्सेमंद है कि जे अगर असी मसीह कने मरी गेरे हिन, तां असी तिन्हा कने जिन्दे भी होई जाणा।

¹²जे अगर असी मसीह तांइ सबर कने सहन करदे रैह्‍ंगे, तां असी तिन्हा कने राज भी करणा, पर जे अगर असी तिन्हेरा इन्कार करगे, तां तिन्हा ने भी असा रा इन्कार करणा।

¹³भले ही अगर असी मसीह कने भरोस्सेमंद बणी करी नी रैह्‍न्दे तां भी मसीह ने असा कने भरोस्सेमंद रैह्णा, किजोकी से अपणे असली स्वभाव रे उलट कम्म नी करी सकदे।

¹⁴विश्वासियां जो लगातार इन्हा गल्लां री शिक्षा दे, ते प्रभु जो गवाह मन्नी करी तिन्हा लोक्कां जो चिताइ दे कि से शब्दां रे मतलबां पर बैह्सबाजी ना करेया करण जिस कने कोई फायदा नी हुंदा, बल्कि तिन्हा जो सुनणे के विश्वासियां रे विश्वास कमजोर होई जांदा।

¹⁵जिन्नी जादा होई सके तुसा उन्नी जादा मैहनत करो ताकि परमेश्वर तुसा जो तिन्हेरे इदेय कम्म करणे वाले मणू रे रुप बिच पसंद करी सके जे तिन्हेरे कम्म का शर्मिंदा ना हुंदा हो ते जे सही तरिक्के कने तिन्हेरे सच्चाई रे बसेख जो सुणांदा हो।

¹⁶पर अभक्त ते खोखली चीजां रे बारे बिच गल्ल-बात करणे का टलो, किजोकी जे मणू इदेइ अभक्ति वाली चीजां री गल्ल-बात करणे शामिल हुंदे से अप्पु भी अभक्त बणी जांदे।

¹⁷तिन्हेरे बसेख ने फैलदे जाणा ते लोक्कां रे विश्वास जो नुक्सान पूजाणा, जिय्यां इक्क खुले रा जख्म फैलदा ते कुसकी मणू जो संक्रमित करदा। हुमिनयुस ते फिलेतुस इदेय लोक्कां बिच का ही हिन।

¹⁸तिन्हा ने सच्चाई बिच विश्वास करणा छड्डी दित्ते रा है। से बोलदे कि परमेश्वर ने विश्वासी लोक्कां जो हमेसा री जिन्दगी तांइ मुर्देयां बिच का फिरी जिन्दा करी दित्ते रा है। इसेरे नतीज्जे रे तौर पर से मते विश्वासियां जो ए सिखाया करदे हिन कि से मसीह यीशु री शिक्षां जो मनणा छड्डी दैण।

¹⁹तां भी परमेश्वर रे लोक्कां रा विश्वास कुसकी घरे री नीं सांई मजबूत है जे बिल्कुल भी हिलदी नी। तिस नीं पर ए गल्लां लिखित्ते री हिन, “परमेश्वर जाणदे कि तिन्हेरे मणू कुण हिन” ते ए भी “जे मणू परमेश्वर री अराधना करदे तिन्हा जो बुराई करणा छड्डी दैणा चाएदा।”

²⁰बड्डे घरां बिच सोन्ने-चाँदी रे बर्तन हुंदे, किच्‍छ भांडे खास अवसर तांइ इस्तेमाल हुंदे ते किच्‍छ भांडे आम कम्मां तांइ इस्तेमाल हुंदे।

²¹तिय्यां ही जे अगर कोई विश्वासी मणू अप्पु जो हर तरिक्के री बुराई का बखरा करगा, तां तिसने तिस भांडे सांई ठैहरणा जे खास अवसर पर इस्तेमाल होणे तांइ ठैहराए गे रा है, जिस विश्वासी मणू री जिन्दगी पवित्र होणी तिसने अपणे मालिक तांइ बड़े कम्मे रा होणा।

²²इधेरे तांइ जुआन्नी री बुरी इच्छा का दुर रेयो ते जे मणू प्रभु रा नां लिंदे रैह्‍न्दे तिन्हा मणूआं कने धार्मिकता, ते विश्वास, ते प्यार ते मेल जोल री कोसीस बिच रेयो।

²³पर बेकार री गल्लां रे बारे बिच बैह्सबाजी करणे का दुर रेयो, किजोकी तू जाणदा तिन्हेरा नतीज्जा सिर्फ लड़ाई-झगड़ा ही हुंदा।

²⁴प्रभु रे सेवादार रे होणे रे नात्ते तुसा जो झगड़ालू नी होणा चाएदा, पर सारे लोक्कां कने नरमदिल ते साफ-तौर पर परमेश्वर रा बसेख सुनाणे बिच काबिल होणा चाएदा ते लोक्कां कने सबर कने रैह्णा आणा चाएदा।

²⁵ते तिसजो तिन्हा लोक्कां जो बड़ी नरमदिली कने समझाणा चाएदा जे तिसेरे खिलाफ हिन, मुमकिन है कि परमेश्वर तिन्हा जो अपणा मन बदलणे बिच मदद करे ताकि से मणू भी मसीह री सच्चाई जो जाणे।

²⁶ताकि से मणू भी चुकन्ने होई जाण ते शैतान रे चंगुल का छुड़की जाण, जिस ने तिन्हा जो अपणी मर्जी पूरी करवाणे तांइ धोख्खे बिच पाई रख्खे रा है।