Read Chambeali 2 तीमुथियुस 4 Bible Online

2 तीमुथियुस 4 - Chambeali bible

2 तीमुथियुस 4

¹जां मसीह यीशु ने इक्क राज्जे रे रुप बिच राज करणे तांइ आणा, तां तिन्हा ने जिन्दा लोक्कां रा ते मरे रे लोक्कां रा भी हिसाब-किताब करणा। इधेरे तांइ परमेश्वर ते मसीह जो गवाह मन्नी करी मैं तेरे पर इस गल्ल रा जोर पांदा

²कि तू परमेश्वर रे बसेख रा प्रचार कर, ते चाए हालात ठीक होण या बुरे, हर बेल्ले प्रचार करणे तांइ तैयार रे, जरुरी है कि तू तिन्हा जो दस्से कि तिन्हा ने कै गलती कित्ते री है, ते तेरे जो तिन्हा जो तिन्हेरे पाप्पां तांइ बकणा जरुरी है। पर तेरे जो लोक्कां जो बड़े सबर कने सिखांदे होए प्रोत्साहित करणा भी जरुरी है।

³किजोकी इदेया बेल्ला आणा जां लोक्कां ने सही शिक्षा जो सुनणा नी चाह्‍णा, पर तिन्हा ने अपणी मर्जी रे हिसाब कने चलणा ते तिन्हा शिक्षकां जो तोपणा जिन्हा ने से ही बोलणा जे से मणू सुनणा चाह्‍ंदे।

⁴तिन्हा ने सच्चाई री गल्लां जो नी सुनणा पर तिन्हा ने मनघड़ंत कहाणियां सुनणे बिच मन लाणा।

⁵पर तू हर गल्ल बिच अप्पु पर काबू रख्खे, बड़े सबर कने सारी मुसीबतां जो सहन करी लेय। सुब बसेख रा प्रचार करणे तांइ तू कड़ी मैहनत करे, ते परमेश्वर रा सेवादार होणे रे नात्ते तू से सारे कम्म करे जिन्हा तांइ परमेश्वर ने तेरे जो चुणे रा है।

⁶मैं तुसा जो ए हुकम इधेरे तांइ दिंदा किजोकी मेरी जिन्दगी ते परमेश्वर तांइ मेरे कम्म अवे मुकणे वाले हिन किजोकी मैं जाणदा कि मैं तौले मरणे वाला है।

⁷इक्क पहलवान सांई मैं भी इक्क ठीक लड़ाई लड़े री है, मैं से कम्म पूरा कित्ते रा है जे मेरे जो मसीह ने दित्तेया थिया जिय्यां कि इक्क दौड़ लाणे वाला अपणी दौड़ पूरी करदा ते मैं आखिर तिकर भरोस्सेमंद रेया।

⁸अवे परमेश्वर ने मेरे तांइ स्वर्ग बिच इक्क ईनाम रख्खे रा है किजोकी मैं इक्क धार्मिक जिन्दगी जीत्ती री है जिस कने परमेश्वर खुस हुंदे, प्रभु जे धार्मिकता कने फैसला करदे जां तिन्हा ने दुनिया रा हिसाब-किताब करणे तांइ आणा तां तिन्हा ने से मुकुट मेरे जो दैणा। पर तिन्हा ए ईनाम सिर्फ मेरे जो ही नी दैणा पर तिस हर इक्क मणू जो दैणा जे बड़ी बेसबरी कने तिन्हेरे हटणे रा इंतजार करेया करदे हिन।

⁹ओ तीमुथियुस, मेरे का तौले पुजणे री कोसीस कर।

¹⁰किजोकी देमास दुनिया री चीजां जो जादा प्यार करदा इधेरे तांइ तिनिये मेरे जो छड्डी दित्तेया, ते थिस्सलुनीके रे कस्बे जो चली गेया, ते क्रेसकेंस गलातिया रे इलाक्के पास्से चली गेया ते तीतुस दलमतिया रे इलाक्के बिच चली गेया।

¹¹इस बेल्ले सिर्फ लूका मेरे कन्ने है। जां तू आणा तां अप्पु कने मरकुस जो लेई आए किजोकी सेवा रे कम्म बिच से मेरे तांइ बड़े कम्मे रा मणू है।

¹²तुखिकुस जो मैं इफिसुस रे कस्बे बिच भेज्जे रा है।

¹³जां तू आणा तां से कमरी भी लेई आए जे मेरे का त्रोआस रे कस्बे बिच करपुस रे घरे रेई गयी थी, ते कन्ने-कन्ने मेरी कताबां भी लेई आए ते खासतौर पर चमड़े री बणे री चीठ्ठियां लिंदा आए।

¹⁴सिकंदर ठठैरे ने मेरे जो मते तरिक्केयां कने मेरे जो दुखी कित्ते रा है। प्रभु ने तिसजो तिसेरे बुरे कम्मां रे हिसाब कने बदला दैणा।

¹⁵तू भी तिसका सावधान रे, किजोकी तिसने मसीह रे बारे बिच असा री शिक्षां रा बड़ा विरोध कित्ते रा है।

¹⁶पैल्ली वरी मेरे जो रोम सहर बिच हाकिम रे सामणे तिन्हा लोक्कां जो जवाब दैणे तांइ खड़िणा पेया जिन्हा ने मेरे पर किच्‍छ गलत कम्म करणे रा इल्जाम लाया थिया, कोई भी मेरे पास्से का गवाई दैणे तांइ नी आया बल्कि तिन्हा सारे जणेया ने मेरे जो किल्ला छड्डी दित्तेया।

¹⁷पर प्रभु ही मेरे मददगार रे ते तिन्हा ने मेरे जो ताकत दित्ती जिसेरी वजह कने मैं साफ तौर पर मसीह रे बसेख रे बारे बिच प्रचार करी सकेया ते तित्ते मौजूद सारे गैर यहूदी लोक्कां ने मसीह रा बसेख सूणन ते तिन्हा ने मेरे जो मौत रे खतरे का इय्यां बचाया जिय्यां कि मैं भूख्खे शेर रे मुँह का बचाया गे रा हो।

¹⁸ते प्रभु ने मेरे जो हर इक्क बुराई का बचाणा, ते तिन्हा ने मेरे जो स्वर्ग अंदर अपणे राज बिच सुरक्षित तौर पर पूजाणा। तिन्हेरी महिमा हमेसा-हमेसा तांइ हुंदी रेय। आमीन!

¹⁹विश्वासी भैण प्रिस्किल्ला ते तिसेरे लाड़े अक्विला ते उनेसिफुरूस रे परिवार जो मेरे पास्से नमस्ते बोल्ले।

²⁰इरास्तुस, कुरिन्थुस सहर बिच रुकी गेया, ते मैं त्रुफिमुस जो बिमार होणे री वजह कने मिलेतुस रे कस्बे बिच छड्डी दित्ते रा है।

²¹सर्दियां रे मौसम का पैल्ले मेरे का पुजणे री कोसीस कर। यूबूलुस, पूंदेस, ते लिनुस ते क्लौदिया ते सारे संगी विश्वासियां जो मेरे पास्से का नमस्ते बोल्ले।

²²मैं प्रार्थना करदा कि परमेश्वर तुसा कने रे ते तिन्हेरा अनुग्रह भी तुसा पर हुंदा रे।