Read Chambeali तीतुस 3 Bible Online

तीतुस 3 - Chambeali bible

तीतुस 3

¹विश्वासी लोक्कां जो समझा कि से हाकिमां ते अधिकारियां री इज्जत करण, ते तिन्हेरे हुकमां जो मनण, ते हर इक्क मणू दुज्जेया तांइ ठीक कम्म करणे तांइ हर बेल्ले तैयार रे।

²कुसकी जो बदनाम ना करण, लड़ाके ना बनण पर दूज्जेयां तांइ बड़े दयालू होण ते तिन्हा कने बड़ी नरमी कने रैह्ण।

³किजोकी मसीह यीशु बिच विश्वास करणे का पैल्ले असी भी नासमझ, परमेश्वर री गल्ल ना मनणे वाले, ते भरम बिच पेय रे ते हर तरिक्के री बुरी इच्छा ते सुख वलास री गुलामी बिच थिये, ते दूज्जेयां कने नफरत करणे ते हिर्स रखणे बिच जिन्दगी बितादें थिये, ते मणू असा कने नफरत करदे थिये ते असी इक्क दूए कने दुश्मणी रखदे थिये।

⁴पर फिरी भी असा जो छुटकारा दैणे वाले परमेश्वर ने असा लोक्कां पर दया कित्ती ते असा कने प्यार कित्तेया

⁵ते परमेश्वर ने असा जो पाप री सजा मिलणे का बचाया ते ए असा रे धार्मिक कम्मां री वजह कने नी पर तिन्हा ने अपणी दया री वजह कने असा जो इक्क नौई जिन्दगी दित्ती। तिन्हा ने असा रे पाप्पां जो मिटाई दित्तेया ते असा जो इक्क नौआ स्वभाव दित्तेया। तिन्हा ए असा जो अपणा पवित्रात्मा दैणे रे जरिये कित्तेया।

⁶परमेश्वर ने असा जो मुफ्त बिच पवित्रात्मा दित्ता ताकि से असा बिच भरपूर ताकत कने कम्म करी सके किजोकी यीशु मसीह असा रे पाप्पां तांइ मरे ते असा जो छुटकारा दैणे वाले बणी गे।

⁷ताकि असी तिस हमेसा री जिन्दगी जो पाणे री आस बिच रे जिस जो दैणे रा वादा परमेश्वर ने अपणे बच्चेयां कने कित्ते रा है। ते असी इस गल्ल बिच निचिंदे रेई सकदे किजोकी परमेश्वर ने अपणे अनुग्रह कने असा जो अपणी नजर बिच धार्मिक ठैहराए रा है।

⁸जे गल्लां मैं तुसा जो इस चीठ्ठी बिच बोल्ली री हिन से सारी भरोस्सेमंद हिन। ते मैं ए चाह्‍ंदा कि तुसा मणू इन्हा गल्लां रे बारे बिच डटी करी विश्वासी लोक्कां जो सिखाओ। ते से मणू भलाई रे कम्म करणे बिच अपणा ध्यान लाई रखण। ए शिक्षा हर इक्क जणे तांइ बदिया ते बड़ी मददगार हिन।

⁹पर तुसा तिन्हा फालतू री बैह्सबाजी ते लड़ाई-झगड़े का दुर रेयो जे पूरखां ते मूसा रे कानून रे बारे बिच हुंदे। किजोकी से बेकार ते कुसकी भी फायदे री नी हिन।

¹⁰जे मणू कलीसिया बिच फूट पांदे तिन्हा जो इक्क-दो वरी समझाई देयो कि से इय्यां करणा बांद्द करी दैण। जे अगर से तां भी ना मन्ने तां तिन्हा का अलग रेयो।

¹¹तुसा जो साफ तौर पर पता है कि इदेया मणू जाणी करी गलत रस्ते पर चलेया करदा है, ते किजोकी से पाप्पी बणी गेरे हिन इधेरे तांइ तिन्हा ने अपणे गलत कम्मां री वजह कने गलत ठैहराणा।

¹²जां मैं अरतिमस या तुखिकुस जो क्रेते टापू बिच तुसा का भेजणा तां तिसेरे तित्ते पुजणे का बाद तुसा मेरे का निकुपुलिस सहर बिच आणे री कोसीस करेयो किजोकी मैं तित्ते ही सर्दियां गुजारणे रा फैसला कित्ते रा है।

¹³जां जेनास नां रे शास्त्रियां ते दुआ मणू अप्पुल्लोस ने अपणे सफर पर निकलणा तां तुसा जे किच्‍छ भी तिन्हेरी मदद तांइ करी सकदे से करेयो। ते इस गल्ल रा ध्यान रख्खेयो कि तिन्हा का से सब किच्‍छ हो जिसेरी तिन्हा जो सफर बिच जरुरत पेई सकदी।

¹⁴सिर्फ इन्ना ही नी पर तुसा जो विश्वासियां जो ए सिखाणे री जरुरत है कि से ठीक कम्म करणे तांइ मैहनत करणे बिच ध्यान लाण ताकि जरुरतमंद लोक्कां री जरुरतां जो पूरा करी सकण। इस कने विश्वासी लोक्कां जो इक्क ठीक मकसद कने जीणे बिच मदद मिलणी।

¹⁵जे विश्वासी मणू मेरे कने इत्ते हिन से तुसा जो नमस्ते बोलदे। क्रेते टापू बिच जे असा जो प्यार करणे वाले संगी विश्वासी हिन तिन्हा जो असा रा नमस्ते बोल्लो। मैं प्रार्थना करदा कि परमेश्वर तुसा सारे जणेया पर अनुग्रह करण।