Read Chambeali इब्रानियों 1 Bible Online

इब्रानियों 1 - Chambeali bible

इब्रानियों 1

¹पैल्ले जमाने का ही परमेश्वर ने भविष्यद्वक्ता रे जरिए असा रे पूरखां कने मती वरी, अलग-अलग तरिक्के कने गल्लां कित्ती।

²पर आखरी रोज्जां रे बारे बिच परमेश्वर ने अपणे पुत्र रे जरिये असा कने गल्लां कित्ते री हिन, जिन्हेरे जरिए तिन्हा ने सारे ब्रम्हांड जो भी रचेया, ते जिन्हा जो परमेश्वर ने अपणी रचे री हर चीज रा वारिस भी बणाया।

³पुत्र ही परमेश्वर री महिमा री रौसनी है, ते पुत्र रे जरिये ही असी दिखदे कि परमेश्वर कदेय हिन। अते से अपणी ताकत रे वचनां कने से ब्रम्हांड जो चलाया करदे हिन। तिन्हा ने लोक्कां रे पाप्पां जो माफ कित्ता, ते परमेश्वर री महिमामय बिच स्वर्ग अंदर तिन्हेरे सज्जे पास्से बेई गे।

⁴इस तरिक्के कने पुत्र रा ओह्दा स्वर्गदूतां का बड्डा ठैहरेया; किजोकी जे नां पुत्र जो विरासत बिच परमेश्वर का मिल्ले रा है, से बाकियां रे नां का बड्डा है।

⁵किजोकी पवित्रशास्त्र बिच परमेश्वर ने यीशु मसीह रे अलावा कदी अपणे स्वर्गदूतां बिच का कुसकी जो ए नी बोल्लेया, “तू मेरा पुत्तर है! अज्ज मैं सारेयां जो ए एलान करदा कि तेरा पिता मैं है!” ते फिरी पवित्रशास्त्र बिच कुसकी होरसी जगाह् पर यीशु मसीह रे अलावा कदी कुसकी स्वर्गदूत जो ए भी नी बोल्लेया, “मैं तिसेरा पिता बणना, ते तिनिये मेरा पुत्तर बणना।”

⁶जां परमेश्वर ने अपणे महिमामय मुंडे जो इस दुनिया रे लोक्कां बिच भेज्जेया, तां तिन्हा ने अपणे स्वर्गदूतां जो पुत्तर री अराधना करणे रा हुकम दित्ता।

⁷ते परमेश्वर पवित्रशास्त्र बिच अपणे स्वर्गदूतां रे बारे बिच बोलदे, “मैं अपणे स्वर्गदूतां जो हवा सांई बणांदा, ते अपणे सेवकां जो आग्ग री लपटां सांई बणांदा।”

⁸पर परमेश्वर रे पुत्तर रे बारे बिच ए लिख्खे रा गेया है, “ओ परमेश्वर, तेरा राज हमेसा-हमेसा तांइ रैह्णा, अते तुसा ने धार्मिकता कने राज करणा,

⁹तुसा ने धार्मिकता कने प्यार, अते अधार्मिक कने नफरत कित्ती; इस वजह कने मैं, तेरे परमेश्वर ने, तिज्जो तेरे साथियां का बधी करी आदरमान ते आनंद रा अभिषेक दित्ते रा है।”

¹⁰ते पवित्रशास्त्र बिच ए भी लिख्खे रा है, “सुरुआत बिच ही तुसा ने धरती बणाई, ते आसमान तुसा रे हत्थां री कारीगरी है।

¹¹से सारे ता मुकी जाणे; अते तिन्हा कपड़ेयां सांई पुराणे होई जाणा, पर तुसा ने हमेसा तिकर रैह्णा।

¹²तुसा ने तिन्हा जो चादर सांई लपेटणा, ते जिय्यां कपड़े बदले जांदे, तिय्यां ही तुसा इसजो दुनिया जो नौई दुनिया कने बदली दैणा, पर तुसा हमेसा तिकर इक्क जदेय ही रैह्णा। अते तुसा हमेसा-हमेसा तिकर जीणा।”

¹³परमेश्वर ने अपणे स्वर्गदूतां बिच का कुसकी जो कदी ए नी बोल्लेया, “मेरे सज्जे पास्से, महिमा री जगाह् बिच बेई जा, जां तांइ मैं तेरे दुश्मणा जो तेरे अधीन ना करी देयां?”

¹⁴तां फिरी स्वर्गदूत कै करदे? कै से सिर्फ परमेश्वर री सेवा करदे? परमेश्वर तिन्हा जो छुटकारा पाणे वाले लोक्कां री देख-रेख करणे तांइ भेजदे।