Read Chambeali इब्रानियों 4 Bible Online

इब्रानियों 4 - Chambeali bible

इब्रानियों 4

¹परमेश्वर ने असा जो तिस अराम री जगाह् पर लेई जाणे रा वादा कित्ते रा है, इधेरे तांइ असा जो सावधान रैह्णा चाएदा, इय्यां ना हो कि तुसा बिच का कुसकी जो भी तिस जगाह् बिच जाणे रा मोक्कां नी गुआणा चाएदा।

²जिय्यां असा ने यीशु मसीह रे बारे बिच सुब बसेख सूणेया, तिय्यां ही यहूदियां ने भी तिस अराम री जगाह् बिच जाणे रा सुब बसेख सूणेया, पर तिन्हा ने तिस पर विश्वास नी कित्तेया, इधेरे तांइ से सुब बसेख तिन्हा लोक्कां तांइ बेकार है।

³इधेरे तांइ असा लोक्कां ने तिस अराम री जगाह् बिच जाणा, जिन्हा ने तिस गल्ल पर विश्वास कित्तेया जे परमेश्वर ने बोल्ली थी। जिय्यां कि परमेश्वर ने बोल्लेया थिया, “मैं गुस्से बिच कसम खाई थी, कि तिन्हा लोक्कां ने तिस जगाह् बिच नी जाणा, जित्ते मैं तिन्हा जो अराम दैणा थिया।” हालांकि, दुनिया रे बणाए जाणे का पैल्ले का ही तिन्हेरा कम्म होई चुके रा थिया।

⁴किजोकी पवित्रशास्त्र बिच तिन्हा ने सतमे रोज्जे रे बिच इय्यां बोल्ले रा थिया, “परमेश्वर ने सतमें रोज्जे अपणे सब कम्म करी के अराम कित्तेया।”

⁵अते पवित्रशास्त्र बिच फिरी ए भी बोल्लेया, “से मेरे अराम करणे री जगाह् बिच नी आण।”

⁶इस्राएल रे से मणू जिन्हा जो से सुब बसेख पैल्ले सुणाया गेया थिया, से तिस अराम री जगाह् बिच जाणे बिच नाकाम होए, किजोकी तिन्हा ने परमेश्वर रे हुकम री ना-फरमानी कित्ती थी। फिरी भी परमेश्वर रे अराम री जगाह् बिच जाणे मौक्का हल्ले भी है।

⁷इधेरे तांइ परमेश्वर ने तिस अराम री जगाह् बिच जाणे रा इक्क दुआ समय तय कित्ता, ते से मौक्का “आज्‍ज” है। मते साल्लां बाद असा रे पूरखां ने परमेश्वर रे खिलाफ बगावत कित्ती, तिन्हा ने दाऊद रे जरिये पवित्रशास्त्र बिच इस गल्ल रा एलान भी कित्ते रा है, “जे अज्ज तुसा परमेश्वर री अवाज सुणो, तां तिन्हेरी हुकम री ना-फरमानी मत करदे,”

⁸असी ए भी जाणदे कि जिस अराम री जगाह् रा वादा, से कनान देस नी है जित्ते यहोशू असा रे पूरखां जो लेई करी गेया थिया। किजोकी जे अगर से अराम करणे री कनान देस हुंदा, तां परमेश्वर ने कुसकी होरसी दिन रे अराम रे दिन री गल्ल नी बोलणी थी।

⁹हल्ले भी परमेश्वर रे लोक्कां तांइ इक्क जगाह् तैयार है, जित्ते तिन्हा जो पूरे तरिक्के कने अराम मिलणा। जिय्यां परमेश्वर ने सतमे रोज्जे अपणे सारे कम्म मुकाई करी कित्तेया थिया, तिन्हा लोक्कां ने भी तिय्यां ही अराम करणा।

¹⁰परमेश्वर ने अपणे सारे कम्म मुकाई करी अराम कित्ता। ते ए तिन्हा सारे लोक्कां ताइं तदेया ही होणा जिन्हा ने परमेश्वर कने तिस अराम री जगाह् बिच जाणा। तिन्हा लोक्कां ने भी अपणे सारे कम्म मुकाणे रे बाद अराम करणा।

¹¹इधेरे तांइ असी भी तिस अराम री जगाह् बिच जाणे तांइ हर कोसीस करदे रैह्ण, कुसकी जो भी तिन्हा लोक्कां सांई नी चलणा चाएदा जिन्हा ने परमेश्वर रे हुकमां री ना-फरमानी कित्ती। तां असा ने अराम री जगाह् बिच जाणा।

¹²किजोकी परमेश्वर रा वचन जिन्दा, असरदार ते कुसकी भी दोधारी तलवार का जादा पैन्ना है, से आत्‍मा ते प्राण, ते जिस्म रे जोड़ां ते चर्बी रे आरपार छेदी रखदा, ते मन री इच्छा ते गल्लां जो परखदा।

¹³परमेश्वर का किच्‍छ भी लुके रा नी है, ते असा ने जे किच्‍छ अपणी जिन्दगी बिच कित्ते रा है, तिसेरा लेखा-जोखा परमेश्वर जो दैणा पैणा।

¹⁴यीशु जे स्वर्ग बिच गे थिये, से परमेश्वर रे पुत्तर ते असा रे प्रधान पुरोत्त हिन। से असा सारेयां रे बड्डे पुरोत्त हिन। इधेरे तांइ, असा जो तिस विश्वास जो छड्डे बगैर तिन्हा बिच मजबूती कने बणी रैह्णा चाएदा, जिस जो असी सबका पैल्ले अपणाए रा है।

¹⁵असा रे प्रधान पुरोत्त, जे मसीह यीशु हिन, असा री हर कमजोरी जो समजदे, किजोकी शैतान ने तिन्हा जो असा सांई हर गल्ल बिच परखेया, पर फिरी भी तिन्हा ने कोई पाप नी कित्तेया।

¹⁶आओ, असी बगैर कुसकी डर रे परमेश्वर रे सामणे आए, ताकि परमेश्वर असा पर दया ते अनुग्रह करे, ते असा जो जरुरत पैणे पर असा री मदद भी करण।