Read Chambeali इब्रानियों 8 Bible Online

इब्रानियों 8 - Chambeali bible

इब्रानियों 8

¹अब्बे जे गल्ल असी करेया करदे हिन, तिन्हा बिच का सबका जादा जरुरी गल्ल ए है, कि असा का इक्क इदेया प्रधान पुरोत्त है, जे स्वर्ग बिच परमधन्य परमेश्वर रे सज्जे पास्से बैठ्ठे रे हिन।

²असा रे बड्डे पुरोत्त स्वर्ग बिच, सबका जादा पवित्र जगाह् अंदर, तिस सच्चे तम्बू री सेवा करदे जिस जो परमेश्वर ने बणाए रा है, ना कि कुसकी मणू ने।

³किजोकी हर इक्क पुरोत्त जो पाप्पां री माफी तांइ किच्‍छ भेंट ते कुर्बानी दैणा जरुरी है, तिय्यां ही असा रे प्रधान पुरोत्त यीशु जो भी असा रे पाप्पां री माफी तांइ किच्‍छ भेंट ते कुर्बानी दैणा जरुरी थिया।

⁴जे अगर मसीह यीशु दुनिया बिच हुंदे, तां से बड्डे पुरोत्त नी होई सकदे थिये, किजोकी मूसा रे कानून रे हिसाब कने पैल्ले का ही भेंट चढ़ाणे तांइ पुरोत्तां ठैहराए गेरे थिये।

⁵जे कम्म ए पुरोत्त लोग करदे, से स्वर्ग बिच होणे वाले कम्म नी हिन, पर सिर्फ तिन्हेरी नकल ते परछाई हिन। जां मूसा परमेश्वर रा तम्बू बणाणे री तैयारी करेया करदा थिया, तां परमेश्वर ने तिसजो खबरदार करी के बोल्लेया, “दिख्ख, जे नमूना तेरे जो पहाड़ पर दिखाया गेया थिया, तिसेरे हिसाब कने ही सब किच्‍छ बणाए।”

⁶असा रे बड्डे पुरोत्त, यीशु जो पुरोत्तां वाला जे कम्म जो मिल्ले रा है, से तिन्हा कम्मां का जादा बड्डा है, जे बाकि पुरोत्तां जो मिल्ले रा है, किजोकी से जिस वाचा रे बिचौल्ले हिन, से पुराणे का जादा खरा है, ते ठीक चीजां रे वाचा पर आधारित है।

⁷जे अगर से पैल्ला वाचा सही हुंदा, तां दूए वाचा री जरुरत नी पैणी थी।

⁸पर परमेश्वर इस्राएल रे लोक्कां पर इल्जाम लाई करी बोलदे, “प्रभु बोलदे, से दिन आया करदा है, जां मैं इस्राएल रे लोक्कां ते यहूदा रे लोक्कां कने इक्क नौई वाचा बनणी।

⁹ए वाचा तिस वाचा सांई नी होणी जे मैं तिन्हेरे पूरखां कने बन्नी थी, जां मैं तिन्हा जो मिस्र देस का बाहर कड्डी करी लेई आया थिया। किजोकी प्रभु बोलदे कि तिन्हा ने तिस वाचा जो नी मन्नेया जे मैं तिन्हा कने बन्नी थी। मैं तिन्हा का मुँह मोड़ी लित्ता।

¹⁰फिरी प्रभु बोलदे, कि आणे वाले दिनां बिच जे वाचा मैं इस्राएल रे लोक्कां कने बनणी, से ए है कि मैं तिन्हा जो अपणे कानून री सोच बिच पाई दैणा, ते तिन्हा तिसजो अपणे दिल बिच रखणा, ते मैं तिन्हेरा परमेश्वर ठैहरणा, जिसेरी तिन्हा ने अराधना करणी, ते तिन्हा ने मेरे मणू ठैहरणा।

¹¹ते हर इक्क ने अपणे संगी यहूदी जो, ते अपणे रिस्तेदार जो ए नी सिखाणा, कि तुसा प्रभु जो जाणो। किजोकी छोटे का लेई करी बड्डे तांइ सारे जणेया ने मेरे जो जाणी लैणा कि मैं तिन्हेरा परमेश्वर है।

¹²किजोकी मैं तिन्हेरे अधार्मिक रे कम्मां रे बदले तिन्हा पर दया करणी, ते तिन्हेरे पाप्प जो फिरी याद नी करणा।”

¹³परमेश्वर ने इसजो इक्क नौई वाचा बोल्लेया, इधेरे तांइ तिन्हा ने पैल्ली वाचा जो पुराणा मन्नेया, ते हर इक्क चीज जे पुराणी ते खराब होई गे री हो, से अग्गे जो नी रेई सकदी।