Read Chambeali इब्रानियों 9 Bible Online

इब्रानियों 9 - Chambeali bible

इब्रानियों 9

¹परमेश्वर ते इस्राएली लोक्कां बिच होए री पैल्ली वाचा अंदर अराधना करणे रे कानून ते अराधना करणे तांइ इक्क पवित्र जगाह् हुंदी थी।

²इक्क तम्बू बणाया गेया, जित्ते दो कमरे थिये। तम्बू रे पैल्ले कमरे बिच धूपदान, मेज, ते तिस मेज पर परमेश्वर जो चढ़ाए री रोट्टियां थी, ते से कमरा पवित्र जगाह् केहलांदा थिया।

³ते दूए परदे रे पीच्छे जे कमरा थिया, तिसजो सबका जादा पवित्र जगाह् बोलदे थिये।

⁴ते तित्ते धूप फुकणे तांइ सबका जादा पवित्र जगाह् बिच सोन्ने री वेदी थी। सोन्ने कने ढके रा वाचा रा सन्दूक भी तित्ते थिया, ते तिसेरे बिच त्रै चीजां थी। पैल्ले ता मन्ने कने भरे रा भांडा। दूज्जी चीज हारून रा डंडा थिया, जिस बिच फूल्ल-पत्तियां लग्गी गे री थी। ते आखिरकार, दस हुकमां री बट्टे री बणे री पट्टियां भी तिस बिच थी।

⁵सन्दूक रे उप्पर महिमामय करूब [2]थिये, जिन्हा ने प्रायश्चित री जगाह् पर छां कित्ते री थी। पर इस बेल्ले असी इन्हा रे बारे बिच गल्लां जो नी समझाई सकदे।

⁶जां हर इक्क चीज अपणी-अपणी जगाह् पर रख्खे गे री थी, तां पुरोत्त हर रोज तम्बू रे पैल्ले कमरे बिच आई करी अपणी सेवा रा कम्म जारी रखदे थिये।

⁷ते दूए कमरे बिच जे सबका जादा पवित्र जगाह् है, प्रधान पुरोत्त तित्ते साल बिच सिर्फ इक्क ही वरी जादां थिया, ते बगैर कुर्बानी रे जानवर खून जो नी जादां थिया। ते तिस खून जो से अपणे तांइ ते लोक्कां री पाप्पां तांइ चढांदा थिया।

⁸इन्हा रीति-रीवाज रे जरिये पवित्रात्मा असा पर ए ही ज़ाहिर करदे कि जां तिकर से तम्बू ते रीति-रीवाज इस्तेमाल बिच थिये, तां तांइ सबका जादा पवित्र जगाह् जे स्वर्ग बिच है तिसेरा रस्ता खुले रा नी थिया।

⁹ए सारी चीजां अज्ज रे समय री निशानियां हिन। जे भेंट ते कुर्बानी परमेश्वर जो चढ़ाए जांदे थिये, से तिन्हा लोक्कां रे विवेक जो साफ नी करी पांदे थिये, जे मणू तिन्हा भेंट ते बलिदान्नां जो लेई करी आंदे थिये।

¹⁰किजोकी से रीति-रीवाज सिर्फ खाणे-पीणे ते शुद्वीकरण रे बारे बिच ही थिये, जे सारे नियम-कायदे बाहरी थिये। से कानून अवे फायदेमंद नी हिन किजोकी परमेश्वर ने अवे असा कने नौई वाचा बन्ने री है। ए नौई वाचा पैल्ले री रीति का जादा बदिया है।

¹¹पर जां मसीह यीशु असा रे प्रधान पुरोत्त बणे, तां से तिन्हा सारी चीजां जो लेई करी आए जे अवे असा का हिन। से मूसा रे तम्बू का जादा महान तम्बू बिच गे, जे स्वर्ग बिच है, ते से मणूआं रे हत्थां कने बणाए रा नी है, ते ना ही इस दुनिया रा हिस्सा है।

¹²ते फिरी मसीह इक्क ही वरी बिच हमेसा तांइ तिस सबका जादा पवित्र जगाह् बिच गे, ते असा जो असा रे पाप्पां का हमेसा तांइ छुटकारा देई दित्तेया। तिन्हा ने ए बकरे ते बछुआं रा खून बहाई करी तिन्हेरा कुर्बानी देई नी कित्तेया, बल्कि अपणा खून बहाई करी ते अपणी जान देई करी कित्तेया।

¹³किजोकी मूसा रे कानून रे मुताबिक जां बकरे, बैलां रा खून ते बछडे री राख अधार्मिक लोक्कां पर छिड़के जाणे कने से अपणे भिठ्ठेपन का तिन्हा जो सुच्चा करी दिंदा,

¹⁴पर मसीह रा बेकसूर खून असा रे विवेक जो असा रे पाप्पां, जे असा री मौत री वजह बणदे, तिन्हा का साफ करदे, ताकि असी जिन्दे परमेश्वर री अराधना करी सकण। किजोकी पवित्रात्मा री ताकत रे जरिये मसीह ने अप्पु जो इक्क सिद्व कुर्बानी रे तौर पर परमेश्वर जो अर्पित करी दित्तेया।

¹⁵मसीह ने अपणी जान देई करी तिन्हा लोक्कां जो तिन्हेरे पाप्पां का छुटकारा दित्तेया जिन्हा ने पाप कित्तेया थिया, ते तिन्हा जो भी बचाई लित्तेया जिन्हा ने पैल्ली वाचा रे कानूनां जो तोडे़या थिया। किजोकी कोई भी मणू पुराणी वाचा रे कानूनां जो मन्नी करी सिद्व नी बणी सकदा थिया। पर अवे मसीह असा रे ते परमेश्वर रे बिच नौई वाचा रे स्थापित करी दित्ती। ए तिन्हा ने इधेरे तांइ कित्तेया ताकि जिन्हा लोक्कां जो परमेश्वर ने चुणे रा है, से मणू हमेसा-हमेसा तिकर तिन्हेरे वारिस बणी जाण, जिय्यां कि परमेश्वर ने तिन्हा कने वादा कित्तेया थिया।

¹⁶वाचा इक्क वसियत सांई हुंदी। इक्क वसियत रे कानून जो लागू करणे तांइ, इस गल्ल जो साबित करणा जरुरी हुंदा, कि जिनिये से वसियत बणाए री हो, से मरी चुके रा हो।

¹⁷किजोकी इक्क वसियत तांइ ही लागू होई सकदी, जां तिसेरे बणाणे वाले री मौत होई चुके री हो। से तां तांइ लागू नी होई सकदी, जां तांइ तिसेरा बणाणे वाला जिन्दा हो।

¹⁸इधेरे तांइ पैल्ली वाचा रा कानून भी जानवर रे खून बहाई करी मारे जाणे पर ही लागू होई पांदा थिया।

¹⁹किजोकी जां मूसा सारे लोक्कां जो परमेश्वर रे हुकमां जो पढ़ी करी सूणाई चुक्केया, तां तिनिये बछुआं ते बकरे रा खून कने पाणी मिलाई करी, जूफे री टहणी ते लाल ऊन कने कानून री कताब ते लोक्कां पर छिड़केया।

²⁰तां तिनिये बोल्लेया, “ए खून परमेश्वर री तिस वाचा जो पक्का करदा, जे परमेश्वर ने तुसा कने बन्ने री है, जिस जो मनणे रा हुकम परमेश्वर ने तुसा जो दित्ते रा है।”

²¹ते इसी तरिक्के कने तिसने तम्बू ते अराधना तांइ इस्तेमाल होणे वाली हर चीज पर से खून छिड़केया।

²²कानून ए बोलदा कि लगभग हर इक्क चीज पर खून रा छिड़काव होणा जरुरी है, ते कोई भी पाप बगैर जानवर रे कुर्बानी रे खून रे बगैर माफ नी होई सकदा।

²³ए सारी चीजां स्वर्ग री चीजां री इक्क नकल है, इधेरे तांइ इन्हा जो रीतियां रे जरिये पवित्र बणाणे री जरुरत पैंदी। पर परमेश्वर ने तिन्हा लोक्कां जो कुसकी जानवर रे खून रे बजाए, कुसकी बड्डे कुर्बानी रे जरिये पवित्र करणा।

²⁴इधेरे तांइ मसीह मणूआं रे हत्थ रे बणाए रे तम्बू बिच नी गे। से तिस असली तम्बू री सिर्फ इक्क नकल है। बल्कि से स्वर्ग बिच गे ते अवे तित्ते परमेश्वर कने हिन, ताकि से असा री मदद करी सकण।

²⁵मसीह स्वर्ग बिच इधेरे तांइ नी गे ताकि से घड़ी-घड़ी लोक्कां रे पाप्पां तांइ अप्पु जो कुर्बानी करदे रे। से इदेय प्रधान पुरोत्त सांई नी हिन जिस जो हर साल सबका जादा पवित्र जगाह् बिच जाई करी कुसकी जानवर जो कुर्बानी करी के तिसेरा खून चढाणा पेयो।

²⁶जे अगर तिन्हा जो अप्पु जो हर साल कुर्बानी होणे तांइ दैणा पैंदा, तां तिन्हा जो दुनिया रे बणाए जाणे रे समय ला लेई करी अब्बे तिकर, घड़ी-घड़ी कुर्बानी दैणे पैंदे। पर इसेरे बजाए, तिन्हा ने इक्क ही वरी, हमेसा तांइ सारे लोक्कां तांइ अपणा कुर्बानी देई करी असा सारेयां रे पाप्पां जो मिटाई दित्तेया।

²⁷जिय्यां हर इक्क मणू रा इक्क वरी मरणा, ते फिरी परमेश्वर का तिन्हेरा हिसाब-किताब होणा तय है,

²⁸तिय्यां ही मसीह भी मते जणेया रे पाप्पां री माफी तांइ इक्क वरी कुर्बानी होए। तिन्हा ने इक्क वरी फिरी हटी करी आणा, पर असा रे पाप्पां तांइ नी, पर तिन्हा लोक्कां जो बचाए जाणे तांइ जे बड़ी लगन कने तिन्हेरा इंतजार करेया करदे हिन।