Read Chambeali याकूब 1 Bible Online

याकूब 1 - Chambeali bible

याकूब 1

¹मैं याकूब परमेश्वर रा ते मसीह यीशु रा दास, तिन्हा बारा गोत्तर रे यहूदी विश्वासियां जो ए चीठ्ठी लिखदा ते नमस्ते करदा जे दुनिया रे अलग-अलग जगाह् बिच बिखरे रे हिन।

²ओ मेरे संगी विश्वासियों, अपणे परखे जाणे जो तुसा खुसी री गल्ल मन्नों,

³किजोकी तुसा जाणदे तुसा रे विश्वास रे परखे जाणे कने तुसा रा सबर बदधा।

⁴तुसा जो हर परिक्षा बिच सबर रखणा सिखणा चाएदा, ताकि तुसा आत्मिक रुप कने परिपक्व ते सिद्व होई जाओ ते अग्गे जो तुसा रे स्वभाव बिच कुसकी गल्ल री घटी ना रे।

⁵पर अगर तुसा बिच का कुसकी जो समझ री कमी हो, तां से परमेश्वर का मगें, जे खुले दिल कने गलतियां कड्डे बगैर दिंदे भी; ते तिन्हा ने तुसा जो समझ दैणी।

⁶पर तुसा विश्वास कने मंगो, ते कोई शक ना करो; किजोकी शक करणे वाला मणू समुद्र री लहर सांई अणटिक है जे ब्यार कने चलदी ते छलारां खादीं।

⁷शक करणे वाला मणू ए ना समजे कि तिसेरी मंगे री कोई भी गल्ल प्रभु ने तिसजो दैणी,

⁸से मणू दोगला है, ते अपणी कुसकी भी गल्ल पर नी टिकदा।

⁹जे विश्वासी मणू गरीब हिन, से इस गल्ल पर खुस होण कि परमेश्वर ने तिन्हा जो आदर दित्ते रा है।

¹⁰ते जे विश्वासी मणू अमीर हिन, अप्पु जो निम्मता करण, किजोकि इक्क दिन तिन्हा ने घा रे फूल्ल सांई मिट्टी जाणा।

¹¹जिय्यां सूरज उगदे कने ही कड़ी धूप्प पैंदी ते घा जो सुखाई दिंदी, ते तिसेरा फूल्ल झड़ी जादां, ते तिसेरी खूबसुरती मिटी जांदी; तिय्यां ही अमीर मणू ने अपणे कम्मां जो करणे बिच ही मुकी जाणा।

¹²धन्न है से मणू, जे परखे जाणे रे बेल्ले टिकी रैहन्दा; किजोकी खरा साबित होणे पर तिसजो हमेसा री जिन्दगी रा से मुकट मिलणा, जिस जो दैणे रा वादा परमेश्वर ने तिन्हा लोक्कां कने कित्ते रा है जे परमेश्वर कने कित्ते रा है।

¹³जां कोई मणू बुराई करणे तांइ उकसाया जाए तां से ए ना बोल्ले कि परमेश्वर मेरे जो उकसाया करदे हिन; किजोकी परमेश्वर जो गलत कम्म करणे तांइ उकसाया नी जांदा ते ना ही से अप्पु ही कुसकी जो गलत कम्म करणे तांइ उकसांदे।

¹⁴पर हर इक्क मणू अपणी ही बुरे कम्म करणे री इच्छा बिच फसी करी परखेया जांदा।

¹⁵फिरी जां बुरे कम्म करणे री इच्छा बदधी तां मणू पाप करदे; ते जां मणू पाप करदे तां तिसेरा नतीज्जा हमेसा री मौत हुंदा।

¹⁶ओ मेरे प्यारे संगी विश्वासियों, धोखा मत खांदे।

¹⁷किजोकी हर इक्क बदिया वरदान ते उत्तम दान परमेश्वर रे पास्से का ही हुदां, ते अम्बरे रे चाँद-तारेयां जो बणाणे वाले पिता परमेश्वर रे पास्से का मिलदा जे हमेसा इक्क जदेय रैहन्दे ते कदी भी नी बदलदे।

¹⁸तिन्हा ने अपणी ही मर्जी कने असा जो सच्चाई रे वचन रे जरिए असा जो अपणी औलाद बणाया, ताकि असी तिन्हेरे बणाए री सृष्टि रे पैल्ले फल्ल सांई [1]सृष्टि रे सबका खास हिस्सा बणन।

¹⁹ओ मेरे प्यारे संगी विश्वासियों, तुसा ए गल्ल जाणी लेयो, हर इक्क मणू सुनणे तांइ हमेसा तयार, सबर कने बोलणे वाला ते अपणे गुस्से जो काबू बिच रखणे वाला हो

²⁰किजोकी कोई मणू गुस्से बिच हो तां से धार्मिकता रे कम्मां जो नी करी सकदा जे परमेश्वर तिसका चाहन्दा।

²¹इधेरे तांइ सारी गन्दगी ते नफरत जो छड्डी करी परमेश्वर रे वचन जो निमते मन कने अपणाई लेयो जे दिल बिच बोया गे रा है ते जे तुसा जो छुटकारा देई सकदा।

²²ते सिर्फ परमेश्वर रे वचन जो सुनणे वाले मत बणो जे अप्पु जो ही धोखा दिदें, पर तिसजो मनणे वाले भी बणो।

²³किजोकी जे कोई परमेश्वर रे वचन जो सूणदा पर तिसजो मनदा नी, से इदेय मणू सांई है जिनिये अपणा मुँह सीसा बिच दिख्खेया

²⁴ते अप्पु जो दिखणे का बाद तिस्सी बेल्ले भुल्ली जांदा कि से कदेया दिसदा।

²⁵पर जे मणू तिस व्यवस्था पर ध्यान करदा रैहन्दा जे अजादी दिंदी, तिस मणू जो अपणे कम्मां बिच इधेरे तांइ आशीष मिलणी किजोकी से सुणी करी भूलदा नी, पर तिसजो पूरे मन कने मनदा।

²⁶जे अगर कोई अप्पु जो परमेश्वर रे भक्त समजे, ते अपणी जिब्ब पर लगाम ना लाए, अपणे दिल जो धोखा दे, तां तिसेरी भक्ति फिजुल है।

²⁷असा रे परमेश्वर पिता री नजर बिच सच्ची ते सुच्ची भक्ति ए है कि अनाथ ते विधवा रे दुख बिच तिन्हेरा ख्याल रखणा, ते अप्पु दुनिया रे बुरे कम्मां का दुर रैह्ण जे तुसा जो बिगाड़दे।