Read Chambeali याकूब 2 Bible Online

याकूब 2 - Chambeali bible

याकूब 2

¹ओ मेरे संगी विश्वासियों, तुसा असा रे महिमामय मसीह यीशु बिच विश्वास करणे वाले मणू हिन, इधेरे तांइ तुसा बिच दूज करणे रा स्वभाव ना हो।

²जे अगर इक्क मणू सोन्ने रे छल्ले ते छैल कपड़े पाई करी तुसा री कलीसिया बिच आए ते इक्क कगांल भी मैल्ले-कुचैल्ले कपड़े पाई करी आए

³ते तुसा तिस छैल कपड़े वाले मणू पर ध्यान देई करी आदर कने बोलदे, “तुसी इत्ते छैल जगाह् पर बेयो,” ते तिस कगांल जो बोलदे, “तू इत्ते खड़ी रे,” या “मेरे पैरां का बेई जा।”

⁴तां कै तुसा अप्पु अदंर दूज नी कित्ती ते गलत सोच कने फैसला नी लित्तेया?

⁵ओ मेरे प्यारे संगी विश्वासियों, ध्यान देयो, परमेश्वर ने इस दुनिया रे गरीब लोक्कां जो मता विश्वास दित्ते रा है ते से अपणे राज रा हिस्सा तिन्हा सारे लोक्कां जो दैणे रा वादा कित्ते रा है जे परमेश्वर कने प्यार करदे।

⁶पर तुसा कगांल मणू री बेज्जती कित्ती। अमीर मणू ही तुसा पर जुल्म नी करदे, ते से ही तुसा जो कचहरियां अदंर धृड़ी-धृड़ी करी नी लेई जादें।

⁷ए से ही मणू हिन जे तुसा रे मसीह यीशु रे उत्तम नां री बुराई करदे।

⁸तां भी जे अगर तुसा पवित्रशास्त्र रे इस खास हुकम जो मनदे “तू अपणे पड़ोसी कने अप्पु सांई प्यार रख,” तां ठीक करदे।

⁹ते जे अगर तुसा इक्क-दूए कने दूज करदे तां पाप करदे; ते मूसा रे कानून तुसा जो गुनेह्गार ठेहरांदा।

¹⁰किजोकी जे कोई मूसा रे कानून रे इक्क भी हुकम जो मनणे बिच चुकी जाए तां से सारी हुकमां बिच गुनेह्गार ठैहरदा।

¹¹इधेरे तांइ जिनिये बोल्लेया, “तू व्यभिचार मत करदा” तिनिये ही ए भी बोल्लेया, “तू हत्या मत करदा” इधेरे तांइ भले ही तू व्यभिचार नी कित्तेया पर हत्या कित्ती तां भी तैं मूसा रे कानून रा उल्घंन कित्तेया।

¹²तुसा अपणा चालचलन तिन्हा लोक्कां सांई रख्खो करो जिन्हेरा न्याय तिस कानून रे हिसाब कने होणा जे असा जो अजादी दिंदी।

¹³जे अगर तुसा होर लोक्कां कने दया रख्खी हो तां परमेश्वर ने भी हिसाब-किताब करणे रे दिन पर तुसा पर दया करणी।

¹⁴ओ मेरे संगी विश्वासियों, जे अगर कोई बोल्ले कि मेरे जो मसीह यीशु बिच विश्वास है पर से तिसेरे हिसाब कने लोक्कां कने ठीक कम्म ना करदा हो, तां फिरी तिसेरे विश्वास करणे रा कोई फैदा नी। इदेया विश्वास तिसजो छुटकारा नी देई सकदा?

¹⁵मन्नी लेयो जे अगर कुसकी संगी विश्वासी जो कपड़ेयां री जरुरत हो ते तिन्हा जो खाणे जो भी किच्‍छ ना हो,

¹⁶ते तुसा बिच का कोई तिन्हा जो ए बोल्ली करी बिदा करे, “सांती कने जाओ तुसा निग्गे रेयो ते रजी रेयो,” पर तिन्हा जो तिन्हेरे जरुरत री चीजां ना दे तां कै फैदा?

¹⁷तिय्यां ही बगैर ठीक कम्मां रे विश्वास भी मुर्दे सांई है।

¹⁸पर कोई बोल्ले, “तू विश्वास करदा, ते मैं ठीक कम्म करदा।” पर मैं बोलदा कि तू अपणा विश्वास मिन्जो बगैर ठीक कम्मां रे साबित करी के दिखा; ते मैं अपणा विश्वास अपणे ठीक कम्मां रे जरिये तिज्जो साबित करी के दिखांदा।

¹⁹तिज्जो विश्वास है कि परमेश्वर इक्क ही है; तू ठीक करदा; दुष्टात्मा भी विश्वास करदी ते डर कने कमदी।

²⁰पर ओ नासमझ इन्सान, कै तू ए भी नी जाणदा, कि ठीक कम्मां रे बगैर विश्वास कुसकी जोग्गा नी है?

²¹जां असा रे पुरखे अब्राहम ने अपणे मुंडे इसहाक जो वेदी पर चढ़ाया थिया, तां से अपणे ठीक कम्मां री वजह कने धार्मिक ठैहरे थिये।

²²तैं दिख्खी लित्तेया कि तिन्हेरा विश्वास तिन्हेरे ठीक कम्मां री वजह कने सिद्व होया।

²³ते पवित्रशास्त्र रा से वचन पूरा होया कि अब्राहम ने परमेश्वर पर भरोसा कित्तेया, ते तिसेरे विश्वास रे जरिए परमेश्वर ने तिसजो धार्मिक मणू ठैहराया, ते इत्ते तिकर कि से परमेश्वर रा दोस्त केहलाया।

²⁴इसी तरिक्के कने तुसा दिख्खी लित्तेया कि परमेश्वर इन्सान जो सिर्फ विश्वास कने ही नी, बल्कि ठीक कम्मां कने भी धार्मिक ठैहरांदे।

²⁵तिय्यां ही राहाब वेश्या ने भी जां तिन्हा जासुसां जो अपणे घरे रुकाया, ते दूए रस्ते का भेजी दित्तेया, तां तिसजो भी परमेश्वर ने तिसजो तिसेरे कम्मां कने ही धार्मिक ठैहराया।

²⁶जिय्यां सरीर बगैर साह रे मरे रा है तिय्यां ही विश्वास भी ठीक कम्मां रे बिना मुर्दा है।